ಪುಣೆ: ಪಂದ್ಯದ ಅಂತಿಮ ಹಂತದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ತೆಲುಗು ಟೈಟಾನ್ಸ್ ತಂಡ ಪ್ರೊ ಕಬಡ್ಡಿ 5ನೇ ಆವೃತ್ತಿಯಲ್ಲಿ ಬೆಂಗಾಲ್‌ ವಾರಿಯರ್ ವಿರುದ್ಧ 37-37ರಿಂದ ಟೈ ಸಾಧಿಸಿದೆ. ಇನ್ನೊಂದು ಪಂದ್ಯದಲ್ಲಿ ಗುಜರಾತ್ 23-22ರಿಂದ ಪುಣೆಯನ್ನು ಮಣಿಸಿ ಲೀಗ್‌ ಹಂತದ ಟಾಪರ್‌ ತಂಡವಾಗಿ ಹೊರಹೊಮ್ಮಿತು (87 ಅಂಕ). ಇಲ್ಲಿಗೆ ಲೀಗ್‌ ಹಂತ ಮುಗಿದಿದ್ದು, ಅ. 23ರಿಂದ ಪ್ಲೇ-ಆಫ್ ಪಂದ್ಯಗಳು ಆರಂಭವಾಗಲಿವೆ.
ಬೆಂಗಾಲ್‌-ತೆಲುಗು ತಂಡಗಳ ನಡುವೆ ತೀವ್ರ ಸ್ಪರ್ಧೆಯಿತ್ತು. ಪಂದ್ಯ ಮುಗಿಯಲು ಕೇವಲ 5 ನಿಮಿಷ ಬಾಕಿ ಇರುವಾಗಲೂ ಬೆಂಗಾಲ್‌ ಮುನ್ನಡೆಯಲ್ಲಿತ್ತು. ಹೀಗಾಗಿ ಸಹಜವಾಗಿ ಬೆಂಗಾಲ್‌ ಜಯ ಸಾಧಿಸಲಿದೆ ಎಂದೇ ಅಂದಾ ಜಿಸಲಾಗಿತ್ತು. ಆದರೆ ಟೈಟಾನ್ಸ್ ಆಟಗಾರರು ಅದಕ್ಕೆ ಅವಕಾಶ ನೀಡಲಿಲ್ಲ. ಕೊನೆಯ ಕ್ಷಣದಲ್ಲಿ ಉತ್ತಮ ಹೋರಾಟ ಪ್ರದರ್ಶಿಸಿ ಟೈ ಮಾಡಿಕೊಂಡರು.
ಮೊದಲ ಅವಧಿಯ ಅಂತ್ಯದಲ್ಲಿ ಬೆಂಗಾಲ್‌ 20-17ರಿಂದ ಮುನ್ನಡೆ ಪಡೆದಿತ್ತು. 2ನೇ ಅವಧಿಯ ಆರಂಭ ದಲ್ಲಿಯೂ ಬೆಂಗಾಲ್‌ ತಂಡ ಮುನ್ನಡೆ ಯಲ್ಲಿಯೇ ಇತ್ತು. 34ನೇ ನಿಮಿಷದಲ್ಲಿ ಬೆಂಗಾಲ್‌ 30-24ರಿಂದ ಮುನ್ನಡೆ ಪಡೆದಿತ್ತು. ಅನಂತರ ಹೋರಾಟವನ್ನು ಚುರುಕು ಗೊಳಿಸಿದ ಟೈಟಾನ್ಸ್ 35ನೇ ನಿಮಿಷದಲ್ಲಿ 33-33ರಿಂದ ಸಮಬಲ ಸಾಧಿಸುವಲ್ಲಿ ಯಶಸ್ವಿಯಾಯಿತು. ಇದು 37-37ರಲ್ಲಿ ಅಂತ್ಯ ಕಂಡಿತು.
ಉಭಯ ತಂಡಗಳು ತಲಾ 2 ಬಾರಿ ಆಲೌಟ್‌ ಆದವು. ರೈಡಿಂಗ್‌ನಲ್ಲಿ ತೆಲುಗು 21 ಅಂಕ ಪಡೆದರೆ, ಬೆಂಗಾಲ್‌ 20 ಅಂಕ ಪಡೆಯಿತು. ಟ್ಯಾಕಲ್‌ನಲ್ಲಿ ತೆಲುಗು 11, ಬೆಂಗಾಲ್‌ 8 ಅಂಕ ಪಡೆಯಿತು. ತೆಲುಗು ಪರ ನಿಲೇಶ್‌ (7 ಅಂಕ), ಎಲಂಗೇಶ್ವರನ್‌ (6 ಅಂಕ) ಉತ್ತಮ ಪ್ರದರ್ಶನ ನೀಡಿದರು. ಬೆಂಗಾಲ್‌ ಪರ ಜಾಂಗ್‌ ಕುನ್‌ ಲೀ (8 ಅಂಕ), ದೀಪಕ್‌ (5 ಅಂಕ), ಸುರ್ಜೀತ್‌ (5 ಅಂಕ) ಉತ್ತಮ ಪ್ರದರ್ಶನವಿತ್ತರು.
