ಕೇರಳದಲ್ಲಿ ವಾಕ್‌ –ಇನ್‌ ಕಿಯಾಸ್ಕ್ ; ಇದೇ ಮೊದಲ ಬಾರಿಗೆ ದೇಶದಲ್ಲಿ ಇಂಥ ಪ್ರಯೋಗ

ಸಾಮೂಹಿಕವಾಗಿ ಸ್ಯಾಂಪಲ್‌ಗ‌ಳ ಸಂಗ್ರಹಕ್ಕಾಗಿ ಕೇರಳದ ಎರ್ನಾಕುಲಂ ಜಿಲ್ಲೆಯಲ್ಲಿ ಆರು ವಾಕ್‌-ಇನ್‌ ಕಿಯಾಸ್ಕ್ ಗಳನ್ನು ತೆರೆಯಲಾಗುತ್ತಿದೆ. ದಕ್ಷಿಣ ಕೊರಿಯಾದಲ್ಲಿ ಮೊದಲ ಬಾರಿ ಈ ರೀತಿಯ ಕಿಯಾಸ್ಕ್ ಗಳನ್ನು ತೆರೆಯಲಾಗಿತ್ತು. ಇದೀಗ ಐಸೋಲೇಷನ್‌ ವಾರ್ಡ್‌ಗಳು, ಪರೀಕ್ಷಾ ಸೌಲಭ್ಯಗಳನ್ನು ಒಳಗೊಂಡಿರುವ ಎರ್ನಾಕುಲಂ ಜಿಲ್ಲೆಯ 4 ಆಸ್ಪತ್ರೆಗಳಲ್ಲಿ ಅದೇ ಮಾದರಿಯ ಕಿಯಾಸ್ಕ್ ಗಳನ್ನು ತೆರೆಯಲು ನಿರ್ಧರಿಸಲಾಗಿದೆ.

ಮುಂಭಾಗದಲ್ಲಿ ಗಾಜಿನಿಂದ ಸೀಲ್‌ ಮಾಡಲಾದ ವಾಕ್‌-ಇನ್‌ ಸ್ಯಾಂಪಲ್‌ ಕಿಯಾಸ್ಕ್ ನಲ್ಲಿ (ವಿಸ್ಕ್) ಒಬ್ಬ ವೈದ್ಯ ಸಿಬ್ಬಂದಿ ನಿಲ್ಲಲು ಸ್ಥಳಾವಕಾಶ ಇರಲಿದ್ದು, ಅಲ್ಲಿ ನಿಂತ ಸಿಬ್ಬಂದಿ ಸಾರ್ವಜನಿಕರಿಂದ ಸ್ಯಾಂಪಲ್‌ ಸಂಗ್ರಹಿಸುತ್ತಾರೆ.

ಮುಖಾಮುಖಿ ಭೇಟಿಯಾಗದೆಯೂ ಸಾರ್ವಜನಿಕರು ತಮ್ಮ ಗಂಟಲ ದ್ರವ ನೀಡಲು ಅವಕಾಶವಿದ್ದು, ಕಿಯಾಸ್ಕ್ ನ ಮುಂಭಾಗದ ಗಾಜಿಗೆ ಅಟ್ಯಾಚ್‌ ಆಗಿರುವ ಗ್ಲೌಸ್‌ಗಳಲ್ಲಿ ಸ್ಯಾಂಪಲ್‌ ಇರಿಸಬೇಕು. ಪ್ರತಿಯೊಂದು ಸ್ಯಾಂಪಲ್‌ ಪಡೆದ ನಂತರ ಗ್ಲೌಸ್‌ಗಳನ್ನು ಸ್ಯಾನಿಟೈಸರ್‌ನಿಂದ ಸ್ವಚ್ಛ ಮಾಡಲಾಗುತ್ತದೆ. ಈ ರೀತಿಯ ಪ್ರಯೋಗ ಭಾರತದಲ್ಲೇ ಮೊದಲಾಗಿದ್ದು, ಇದರಿಂದ ಪಿಪಿಇ ಕಿಟ್‌ಗಳ ಬೇಡಿಕೆ ತಗ್ಗಲಿದೆ ಎಂದು ಎರ್ನಾಕುಲಂ ಜಿಲ್ಲಾಧಿಕಾರಿ ಸುಹಾಸ್‌ ತಿಳಿಸಿದ್ದಾರೆ.