Advertisement
ಸಿಇಒ ಡಾ. ವಿಶಾಲ ಸಿಕ್ಕಾ ವೇತನ ಹೆಚ್ಚಳ ಮತ್ತು ನಿರ್ಗಮಿತ ಇಬ್ಬರು ಉನ್ನತಾಧಿಕಾರಿಗಳಿಗೆ ನೀಡಿರುವ ಪರಿಹಾರ ಕುರಿತ ಪತ್ರವಿವಾದದ ಪರಿಣಾಮವನ್ನು ಸಂಸ್ಥೆಯ ಸಾಮಾನ್ಯ ಉದ್ಯೋಗಿಯೂ ಅನುಭವಿಸಬೇಕಾದ ಪರಿಸ್ಥಿತಿ ಎದುರಾಗಿದೆ. ಇನ್ಫೋಸಿಸ್ನಲ್ಲಿ ಕಳೆದವರ್ಷ ಕೆಳ ಮತ್ತು ಮಧ್ಯಮ ಹಂತದ ಉದ್ಯೋಗಿಗಳಿಗೆ ಶೇ.2ರಿಂದ ಶೇ.6ವರೆಗೆ ವೇತನ ಹೆಚ್ಚಳವಾಗಿತ್ತು. ಕೆಲವೇ ಕೆಲವರಿಗಷ್ಟೇ ಶೇ.10ರ ಪ್ರಮಾಣದಲ್ಲಿ ಸಂಬಳ ಜಾಸ್ತಿ ಆಗಿತ್ತು. ಕಾರಣಾಂತರಗಳಿಂದಾಗಿ ಕೆಲವರ ಬಡ್ತಿಯನ್ನು ತಡೆಹಿಡಿಯಲಾಗಿತ್ತು. ಇವೆಲ್ಲ ಕಾರಣದಿಂದ ಎಲ್ಲ ಉದ್ಯೋಗಿಗಳೂ ಈ ವರ್ಷದ ವೇತನ ಹೆಚ್ಚಳಕ್ಕೆ ಕಾಯುತ್ತಿದ್ದರು. ಇನ್ನೇನು ಸಂಬಳ ಏರಿಕೆಗೆ ಒಂದು ತಿಂಗಳು ಇದೆ ಎನ್ನುವಾಗಲೇ ಆಡಳಿತ ಮಂಡಳಿ ವಿರುದ್ಧ ಭಿನ್ನಮತದ ಸಮರ ಶುರುವಾಗಿರುವುದ ತಲೆನೋವಿಗೆ ಕಾರಣವಾಗಿದೆ.
Related Articles
Advertisement
“ಆಡಳಿತ ಮಂಡಳಿ ಮತ್ತು ಮುಖ್ಯ ಷೇರುದಾರರ ಒಪ್ಪಿಗೆಯಿಂದಲೇ ಸಿಕ್ಕಾ ಸಿಇಒ ಸ್ಥಾನಕ್ಕೆ ಬಂದಿದ್ದಾರೆ. ಅವರ ವೇತನ ಹೆಚ್ಚಳವೂ ಕಾನೂನುಬದ್ಧವೇ ಆಗಿದೆ. ಮಾಜಿ ಸಿಎಫ್ಒ ರಾಜೀವ್ ಬನ್ಸಾಲಿ ಅವರಿಗೆ ನೀಡಲಾಗಿರುವ ಬೇರ್ಪಡಿಕೆ ಪರಿಹಾರವೂ ಕಾನೂನುಬದ್ಧವೇ. ಇವೆಲ್ಲವೂ ಮಂಡಳಿ ಮೂಲಕವೇ ಆದ ಬೆಳವಣಿಗೆ. ಹೀಗಿದ್ದೂ ಇಲ್ಲಿ ಆಡಳಿತಾತ್ಮಕ ವಿವಾದ ಆಗಿದ್ದಾದರೂ ಹೇಗೆ?’ ಎಂದು ದೇಶದ ಉನ್ನತ ಹೂಡಿಕೆ ವ್ಯವಸ್ಥಾಪಕರು ಅಚ್ಚರಿ ಸೂಚಿಸಿದ್ದಾರೆ.
ಭಿನ್ನಮತಕ್ಕೆ 33,421 ಕೋಟಿ ರೂ. ಕಾರಣ?ಇನ್ಫೋಸಿಸ್ನ ಸಂಸ್ಥಾಪಕ ಸದಸ್ಯರು ಮತ್ತು ಆಡಳಿತ ಮಂಡಳಿ ವಿರುದ್ಧ ಎದ್ದಿರುವ ಭಿನ್ನಮತಕ್ಕೆ 33,421 ಕೋಟಿ ರೂ. ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಕಂಪನಿಯ ಯಾವುದೋ ಸಂದರ್ಭದಲ್ಲಿ ಉಳಿಕೆಯಾದ ಮೊತ್ತ ಇದಾಗಿದ್ದು, ಇದು ಇನ್ನೂ ಷೇರುದಾರರಿಗೆ ಹಂಚಿಕೆಯಾಗಿಲ್ಲ. ಡಿವಿಡೆಂಟ್ ರೂಪದಲ್ಲೂ ಅವರ ಕೈಸೇರಿಲ್ಲ ಎನ್ನಲಾಗಿದೆ. ಈಗಿನ ಆಡಳಿತ ಮಂಡಳಿ ಆ ಹಣವನ್ನೇ ಬೇರೆ ಬೇರೆ ಪ್ಯಾಕೇಜ್ ರೂಪದಲ್ಲಿ ಮತ್ತು ಪರಿಹಾರಗಳ ರೂಪದಲ್ಲಿ ಬಳಸಿಕೊಳ್ಳುತ್ತಿದೆ ಎಂದು ಸಂಸ್ಥೆಯ ಹಳೆಯ ಸದಸ್ಯರು ನಂಬಿದ್ದಾರೆ. ಆಡಳಿತ ಮಂಡಳಿ ಮತ್ತು ಹೂಡಿಕೆದಾರರ ನಡುವಿನ ಭಿನ್ನಮತಕ್ಕೂ ಇದೇ ಕಾರಣವಾಗಿದೆ ಎನ್ನಲಾಗಿದೆ. ಸಂಸ್ಥೆಗೆ ಹೊಸತಾಗಿ ಕಾಲಿಟ್ಟ ಉದ್ಯೋಗಳಿಗೆ ಕೆಲವು ವರ್ಷಗಳಿಂದ ಸಂಬಳವೇ ಏರಿಕೆ ಆಗಿಲ್ಲ. ಕಂಪನಿ ತೊರೆಯುವಾಗ ಉದ್ಯೋಗಿಗಳಿಗೆ ಮೂರು ತಿಂಗಳ ಮಟ್ಟಿಗೆ ಶೇ.80ರಷ್ಟು ಪರಿಹಾರ ಸಿಗುತ್ತದೆ. ಆದರೆ, ರಾಜೀವ್ ಬನ್ಸಾಲ್ ಅಂಥವರಿಗೆ ಶೇ.100ರ ಪ್ರಮಾಣದಲ್ಲಿ ಪರಿಹಾರ ನೀಡಲಾಗುತ್ತಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ. ಇನ್ಫಿಯಲ್ಲಿ ಎಲ್ಐಸಿಯ ಶೇ.2 ಷೇರು ಹೆಚ್ಚಳ
ಇನ್ಫೋಸಿಸ್ನಲ್ಲಿ ಈ ಮೂರು ವರ್ಷದಲ್ಲಿ ಭಾರತೀಯ ಜೀವ ವಿಮಾ ನಿಗಮ (ಎಲ್ಐಸಿ) ಶೇ.2ರಷ್ಟು ಹೆಚ್ಚುವರಿ ಷೇರುಗಳನ್ನು ಖರೀದಿಸಿದೆ. 4.63 ಕೋಟಿ ಷೇರುಗಳನ್ನು ಖರೀದಿಸಿದ್ದು, 5 ರೂಪಾಯಿ ಮೌಲ್ಯದ ಷೇರುಗಳ ಇವಾಗಿವೆ. ಈ ಮೂಲಕ ಎಲ್ಐಸಿಯು ಇನ್ಫೋಸಿಸ್ನಲ್ಲಿ ಶೇ.7.23ರಷ್ಟು ಷೇರುಗಳನ್ನು ಹೊಂದಿದಂತಾಗಿದೆ. ಆಡಳಿತ ಮಂಡಳಿ ಮತ್ತು ಸಂಸ್ಥಾಪಕ ಸದಸ್ಯರ ಭಿನ್ನಮತದ ನಡುವೆ ಈ ಮಾಹಿತಿ ಹೊರಬಿದ್ದಿದ್ದು, ಸಿಇಒ ವಿಶಾಲ್ ಸಿಕ್ಕಾ ಅವರ ಕಾರ್ಯವೈಖರಿಗೆ ಎಲ್ಐಸಿಯೂ ಮೆಚ್ಚುಗೆ ಸೂಚಿಸಿದಂತಾಗಿದೆ. 2013ರ ಸೆಪ್ಟೆಂಬರ್ 26ರಿಂದ 2017ರ ಫೆಬ್ರವರಿ 7ರ ವರೆಗೆ ಎಲ್ಐಸಿಯು ಹೆಚ್ಚುವರಿ ಷೇರುಗಳನ್ನು ಖರೀದಿಸಿ ಇನ್ಫೋಸಿಸ್ನಲ್ಲಿ ವಹಿವಾಟು ನಡೆಸಿದ್ದು, ಸಿಇಒ ಅವರ ವೇತನದ ಜೊತೆಗೆ ಬೋನಸ್ ಅನ್ನೂ ನೀಡಿದೆ.