ಮತದಾರರಿಗೆ ಮೋಸ ಮಾಡಲಾರೆ

ರಿಪ್ಪನ್‌ಪೇಟೆ: ಇತ್ತೀಚೆಗೆ ಕೆಲವರು ನನ್ನ ಕ್ಷೇತ್ರದ ಅಭಿವೃದ್ಧಿಯನ್ನು ಸಹಿಸದೆ ರೈತರ ಬಗರ್‌ ಹುಕುಂ ಹಕ್ಕುಪತ್ರ ನೀಡಿಕೆಯಲ್ಲಿ ಭ್ರಷ್ಟಾಚಾರ ಮಾಡಿದ್ದೇನೆ ಎಂದು ಸಭೆ ಸಮಾರಂಭಗಳಲ್ಲಿ ಆರೋಪಿಸುತ್ತಿದ್ದಾರೆ. ಆದರೆ ಬಂಗಾರಪ್ಪನವರ ಮಗನಾದ ನಾನು ಅಪ್ಪನ ಸಿದ್ಧಾಂತವನ್ನು ಮೈಗೂಡಿಸಿಕೊಂಡವನಾಗಿದ್ದೇನೆ. ಎಂತಹ ಕ್ಲಿಷ್ಟಕರ ಸಂದರ್ಭ ಬಂದರೂ ಭಿಕ್ಷೆ ಬೇಡುತ್ತೇನೆಯೇ ವಿನಃ ಹೊಲಸಲ್ಲಿ ಕೈ ಹಾಕಿ ಮತ ನೀಡಿದ ಜನರಿಗೆ ಮೋಸ ಮಾಡಲಾರೆ ಎಂದು ಸೊರಬ ಶಾಸಕ ಮಧು ಬಂಗಾರಪ್ಪ ಹೇಳಿದರು.

ಸಮೀಪದ ಹೆದ್ದಾರಿಪುರ ಗ್ರಾಪಂ ವ್ಯಾಪ್ತಿಯ ವಡಾಹೊಸಳ್ಳಿಯಲ್ಲಿ ನಡೆದ ಜೆಡಿಎಸ್‌ ಮಹಿಳಾ ಸಮಾವೇಶದಲ್ಲಿ ಅವರು 
ಮಾತನಾಡಿದರು. ಶಾಸಕ ಕಿಮ್ಮನೆ ರತ್ನಾಕರ ಅವರಿಗೆ ರಾಜಕೀಯ ಜನ್ಮ ನೀಡಿದ್ದು, ಜೆಡಿಎಸ್‌ ಪಕ್ಷ. ಅಂದು ರೈತರಿಗೆ ಹಕ್ಕುಪತ್ರ ಕೊಡಿಸುವುದಾಗಿ ಪಾದಯಾತ್ರೆ ಮಾಡಿ ಆಡಳಿತ ಪಕ್ಷದಲ್ಲಿದ್ದರೂ ಸಮಗ್ರ ಹಕ್ಕುಪತ್ರ ನೀಡಲು ಏಕೆ ಸಾಧ್ಯವಾಗಿಲ್ಲ. ವಿರೋಧ ಪಕ್ಷದಲ್ಲಿರುವ ನಾನು ರೈತರಿಗೆ ಬಗರ್‌ಹುಕುಂ ಹಕ್ಕುಪತ್ರ ನೀಡಿಕೆಯಲ್ಲಿ ರಾಜ್ಯದಲ್ಲಿಯೇ ಪ್ರಥಮ ಸ್ಥಾನದಲ್ಲಿದ್ದೇನೆ. ಮಂತ್ರಿಯಾಗಿ ಇವರು ಮಾಡಿದ ಸಾಧನೆ ಏನು ಎಂಬುದು ಜನತೆಗೆ  ತಿಳಿಸಬೇಕಿದೆ. ಮಾಜಿ ಶಾಸಕ ಸ್ವಾಮಿರಾವ್‌ ಅವರಿಗೆ ರಾಜಕೀಯದಲ್ಲಿ ಗುರುತಿಸುವಂತೆ ಮಾಡಿದ್ದು, ಬಂಗಾರಪ್ಪ. ಜೈಲಿಗೆ ಹೋಗಿ ಬಂದವರ ಜೊತೆಯಲ್ಲಿ ವೇದಿಕೆಯಲ್ಲಿ ಕುಳಿತುಕೊಂಡು ನನ್ನ ಸಾಚಾತನವನ್ನು ಅವರು ಪರೀಕ್ಷಿಸುತ್ತಿದ್ದಾರೆ. ಇಂತಹ ಸೋಗಲಾಡಿತನ ನಿಲ್ಲಿಸಿ ರೈತರ ಪರ ಧ್ವನಿಗೂಡಿಸುವ ಕೆಲಸ ಮಾಡಲಿ ಎಂದು ಆಗ್ರಹಿಸಿದರು.

ದೇಶದಲ್ಲಿ ಪ್ರಾದೇಶಿಕ ಪಕ್ಷಗಳಿಗೆ ಜನರು ಆದ್ಯತೆ ನೀಡುತ್ತಿರುವುದು ಉತ್ತರ ಪ್ರದೇಶ ಹಾಗೂ ಬಿಹಾರ ಉಪಚುನಾವಣೆಯಲ್ಲಿ
ಸಾಬೀತಾಗಿದೆ. ರಾಜ್ಯದ ಹಿತವನ್ನು ಕಾಪಾಡುವುದು ಪ್ರಾದೇಶಿಕ ಪಕ್ಷವಾದ ಜೆಡಿಎಸ್‌ನಿಂದ ಮಾತ್ರ ಸಾಧ್ಯ, ಈ ಬಾರಿ ರಾಜ್ಯದ ಜನರ ಆಶೀರ್ವಾದದಿಂದ ಜೆಡಿಎಸ್‌ ಸ್ವತಂತ್ರವಾಗಿ ಸರಕಾರ ರಚಿಸಲಿದೆ. ತೀರ್ಥಹಳ್ಳಿ ಕ್ಷೇತ್ರದಿಂದ ಆರ್‌. ಎಂ. ಮಂಜುನಾಥಗೌಡರನ್ನು ಪ್ರಚಂಡ ಬಹುಮತದಿಂದ ಆಯ್ಕೆ ಮಾಡಿಎಂದು ಮನವಿ ಮಾಡಿದರು.

ಟೂರಿಂಗ್‌ ಟೆಂಟ್‌ ಹಾಲಪ್ಪ: ಮಾಜಿ ಸಚಿವ ಹಾಲಪ್ಪ ಬಂಗಾರಪ್ಪನವರ ಕೃಪೆಯಿಂದ ಹೊಸನಗರ ಕ್ಷೇತ್ರದಲ್ಲಿ ಶಾಸಕರಾಗಿ, ನಂತರ
ಸೊರಬ ಕ್ಷೇತ್ರಕ್ಕೆ ಪಲಾಯನ ಮಾಡಿದರು.  ಈಗ ಅಲ್ಲಿಯೂ ಅವರನ್ನ ಎತ್ತಂಗಡಿ ಮಾಡಿದ್ದೇನೆ. ಎಲ್ಲಿಯೂ ನೆಲೆಯಿಲ್ಲದೆ ಈಗ
ಸಾಗರ ಕ್ಷೇತ್ರದಲ್ಲಿ ಅಲೆಯುತ್ತಿರುವ ವ್ಯಕ್ತಿ ಟೂರಿಂಗ್‌ ಟೆಂಟ್‌ ಹಾಲಪ್ಪ ಎಂದು ಮಧು ಬಂಗಾರಪ್ಪ ಲೇವಡಿ ಮಾಡಿದರು. 

ಡಿಸಿಸಿ ಬ್ಯಾಂಕ್‌ ಕಟ್ಟಿ ಬೆಳೆಸಿದ್ದು ನಾನ್ರೀ: ಜಿಲ್ಲೆಯಲ್ಲಿ ನಷ್ಟದಲ್ಲಿದ್ದ ಜಿಲ್ಲಾ ಸಹಕಾರ ಬ್ಯಾಂಕ್‌ನ್ನು ಪುನಃಶ್ಚೇತನದೊಂದಿಗೆ ಜಿಲ್ಲೆಯಲ್ಲಿ ಕಟ್ಟಿ ಬೆಳೆಸಿದ್ದು ನಾನ್ರೀ! ರೈತರ ಕಷ್ಟ ಏನೆಂದು ನನಗೆ ಗೊತ್ತು. ಇವರ್ಯಾರ್ರೀ ನಮಗೆ ಬುದ್ಧಿ ಹೇಳೊರು? ಎಂಪಿಎಂ ಅಧ್ಯಕ್ಷರಾಗಿ ಜ್ಞಾನೇಂದ್ರ ಅಲ್ಲಿನ 4000 ಕುಟುಂಬಗಳನ್ನು ಬೀದಿಗೆ ತಂದರು. ಕಿಮ್ಮನೆ ಮಂತ್ರಿಯಾದ ಸಂದರ್ಭದಲ್ಲಿ ಚೀನಾದಿಂದ ಸೈಕಲ್‌ ತರಿಸಿ ಕಮಿಷನ್‌ ತೆಗೆದುಕೊಂಡು ವಿವಿಧ ಕಾಮಗಾರಿಗಳಿಗಾಗಿ ಆಂಧ್ರದ ಗುತ್ತಿಗೆದಾರನಿಗೆ 30% ಅಡ್ವಾನ್ಸ್‌ ಕೊಟ್ಟಿದ್ದಾರೆ. ಇಂತವರು ಇತತರಿಗೆ ಉಪದೇಶ ಹೇಳುವುದು ಎಷ್ಟು ಸರಿ? ಇಂತವರಿಗೆ ಕ್ಷೇತ್ರದ ಜನತೆ ತಕ್ಕಪಾಠವನ್ನು ಕಲಿಸುವ ಮೂಲಕ ಗೋಪಾಲ ಗೌಡರ ಜನ್ಮಭೂಮಿಗೆ ನ್ಯಾಯ ಒದಗಿಸಬೇಕಾಗಿದೆ ಎಂದು ಡಿಸಿಸಿ ಬ್ಯಾಂಕ್‌ ಅಧ್ಯಕ್ಷ ಹಾಗೂ ಜೆಡಿಎಸ್‌ ಅಭ್ಯರ್ಥಿ ಆರ್‌.ಎಂ. ಮಂಜುನಾಥಗೌಡ ಆಕ್ರೋಶ ವ್ಯಕ್ತಪಡಿಸಿದರು. ಸಮಾವೇಶವನ್ನು ಗೀತಾ ಶಿವರಾಜ್‌ಕುಮಾರ್‌ ಉದ್ಘಾಟಿಸಿದರು.