ಐಡಿಯಾ, ವೊಡಾಫೋನ್‌ ಕರೆ ದರ ಹೆಚ್ಚಳ ; ಡಿಸೆಂಬರ್‌ 3ರಿಂದ ಹೊಸ ಟಾರಿಫ್ ಅನ್ವಯ

ಮುಂಬಯಿ: ಟೆಲಿಕಾಂ ಕಂಪೆನಿಗಳು ಕಳೆದೆರಡು ತ್ತೈಮಾಸಿಕಗಳಲ್ಲಿ ಹೆಚ್ಚು ನಷ್ಟವನ್ನು ಅನುಭವಿಸಿರುವಂತೆಯೇ, ಕರೆ ದರ ಹೆಚ್ಚಳದ ಬಗ್ಗೆ ಮಾತನಾಡಿದ್ದವು. ಅದರಂತೆ ಇದೀಗ ಮೊದಲಿಗೆ ಐಡಿಯಾ-ವೊಡಾಫೋನ್‌ ಗ್ರೂಪ್‌ ಡಿ.3ರಿಂದ ಕರೆ ದರಗಳನ್ನು ಹೆಚ್ಚು ಮಾಡಲಿದೆ.

ಇದರೊಂದಿಗೆ ಹೊಸ ಪ್ಲ್ಯಾನ್‌ಗಳನ್ನು ಪರಿಚಯಿಸುವುದಾಗಿ ಹೇಳಿದೆ. 2 ದಿನ, 28 ದಿನ, 84 ದಿನ ಮತ್ತು 365 ದಿನಗಳ ಪ್ಲ್ಯಾನ್‌ಗಳು ಪ್ರೀಪೇಯ್ಡನಲ್ಲಿರಲಿವೆ. ಈ ಹಿಂದಿನ ಪ್ಲ್ರಾನ್‌ಗಳಿಗೆ ಹೋಲಿಸಿದರೆ ದರ ಶೇ.42ರಷ್ಟರವರೆಗೆ ದುಬಾರಿಯಾಗಲಿದೆ ಎಂದು ಟೆಲಿಕಾಂ ಗ್ರೂಪ್‌ ಹೇಳಿಕೊಂಡಿದೆ.

ಕಾಂಬೋ ಪ್ಲ್ಯಾನ್‌ಗಳಲ್ಲಿ 49 ರೂ, 79 ರೂ. ದರವಿದ್ದರೆ, 28 ದಿನ ವ್ಯಾಲಿಡಿಟಿ ಇರಲಿದೆ. ಅನ್‌ಲಿಮಿಟೆಡ್‌ ಪ್ಯಾಕ್‌ನಲ್ಲಿ 28 ದಿನಗಳ ವ್ಯಾಲಿಡಿಲಿಯಿದ್ದು, 149 ರೂ.ಗಳಿಂದ 399 ರೂ.ವರೆಗೆ ದರವಿರಲಿದೆ. ಇವುಗಳಲ್ಲಿ ಅನ್‌ಲಿಮಿಟೆಡ್‌ ವಾಯ್ಸ್ ಕಾಲ್‌ಗ‌ಳು ಮತ್ತು ಮಾಸಿಕ 2 ಜಿಬಿ ಇಂಟರ್ನೆಟ್‌ ಡಾಟಾದಿಂದ ನಿತ್ಯ 3 ಜಿಬಿ ವರೆಗೆ ಇಂಟರ್ನೆಟ್‌ ಡಾಟಾ ಡೌನ್‌ಲೋಡ್‌ ಸೌಕರ್ಯವಿದೆ.

84 ದಿನಗಳ ಅನ್‌ಲಿಮಿಟೆಡ್‌ ಪ್ಯಾಕ್‌ನಲ್ಲಿ 379 ರೂ.ಗಳಿಂದ 699 ರೂ.ವರೆಗೆ ಪ್ಲ್ಯಾನ್‌ ಇದೆ. ಒಂದು ವರ್ಷ ವ್ಯಾಲಿಡಿಟಿ ಇರುವ ಅನ್‌ಲಿಮಿಟೆಡ್‌ ಪ್ಲ್ಯಾನ್‌ಗಳೂ ಇದ್ದು 1499 ರೂ.ಗಳಿಂದ 2399 ರೂ.ವರೆಗೆ ಇಂಟರ್ನೆಟ್‌ ಡಾಟಾಗಳಿಗೆ ಅನುಗುಣವಾಗಿ ಪ್ಲ್ಯಾನ್‌ಗಳಿರಲಿವೆ.