ಜೈಪುರ್‌ಗೆ ಸೋಲುಣಿಸಿದ ದಬಾಂಗ್‌ ಡೆಲ್ಲಿ

ಹೈದರಾಬಾದ್‌: ಎರಡನೇ ಅವಧಿಯಲ್ಲಿ ಮಿರಾಜ್‌ ಶೇಖ್‌, ನೀಲೇಶ್‌ ಶಿಂದೆ ಅವರ ಭರ್ಜರಿ ರೈಡಿಂಗ್‌ನಿಂದ ದಬಾಂಗ್‌ ಡೆಲ್ಲಿ ಪ್ರೊ ಕಬಡ್ಡಿಯ 5ನೇ ಆವೃತ್ತಿಯಲ್ಲಿ ಜೈಪುರ್‌ ಪಿಂಕ್‌ ಪ್ಯಾಥರ್  ತಂಡವನ್ನು 30-26 ಅಂಕಗಳಿಂದ ಸೋಲಿಸಿದೆ. ಈ ಮೂಲಕ ಕೂಟದಲ್ಲಿ ಡೆಲ್ಲಿ ಶುಭಾರಂಭ ಮಾಡಿದೆ.

ಮಾಜಿ ಚಾಂಪಿಯನ್‌ ಜೈಪುರ್‌ ತಂಡ ಆರಂಭದಲ್ಲಿ ಭರ್ಜರಿ ಪ್ರದರ್ಶನ ನೀಡಿತ್ತು. ನಿರಂತರವಾಗಿ ಡೆಲ್ಲಿಗಿಂತ ಹೆಚ್ಚಿನ ಅಂಕವನ್ನು ಕಾಯ್ದುಕೊಳ್ಳುತ್ತ ಸಾಗಿತ್ತು. ಹೀಗಾಗಿ ಮೊದಲ ಅವಧಿ ಅಂತ್ಯದಲ್ಲಿ ಜೈಪುರ 16-9 ರಿಂದ ಭಾರೀ ಮುನ್ನಡೆ ಪಡೆದಿತ್ತು.

2ನೇ ಅವಧಿಯಲ್ಲಿ ಶೇಖ್‌ ಗರ್ಜನೆ: ಮೊದಲ ಅವಧಿಯಲ್ಲಿ ಹಿನ್ನಡೆಯಲ್ಲಿದ್ದ ಡೆಲ್ಲಿ ತಂಡಕ್ಕೆ 2ನೇ ಅವಧಿಯಲ್ಲಿ ಮಿರಾಜ್‌ ಶೇಖ್‌, ನೀಲೇಶ್‌ ಶಿಂದೆ ನೆರವಾದರು. ಇಬ್ಬರೂ ಎದುರಾಳಿಗಳ ಅಂಕಣಕ್ಕೆ ನುಗ್ಗಿ ಅಂಕವನ್ನು ತರತೊಡಗಿದರು. ಹೀಗಾಗಿ ಪಂದ್ಯ ಇನ್ನೇನು 10 ನಿಮಿಷ ಬಾಕಿ ಇರುವಾಗ ಡೆಲ್ಲಿ 21-20 ರಿಂದ ಮುನ್ನಡೆ ಪಡೆಯಿತು. ಅನಂತರ ಅದೇ ಮುನ್ನಡೆಯನ್ನು ಕಾಯ್ದುಕೊಳ್ಳುವಲ್ಲಿ ಯಶಸ್ವಿಯಾಯಿತು. ಅಂತಿಮವಾಗಿ ಡೆಲ್ಲಿ 30-26 ರಿಂದ ಗೆಲುವು ಪಡೆಯಿತು. ಪಂದ್ಯ 10 ನಿಮಿಷ ಬಾಕಿ ಇರುವಾಗ ಮಾಡಿದ ಹೋರಾಟವೇ ಡೆಲ್ಲಿ ತಂಡದ ಕೈ ಹಿಡಿಯಿತು.

2 ಬಾರಿ ಆಲೌಟ್‌ ಆದ ಜೈಪುರ:
ಮೊದಲ ಅವಧಿಯಲ್ಲಿ ಜೈಪುರ್‌ ತಂಡದ ಸಂಘಟಿತ ಪ್ರದರ್ಶನದಿಂದ ಡೆಲ್ಲಿ ತಂಡವನ್ನು 1 ಬಾರಿ ಆಲೌಟ್‌ ಮಾಡಿ 2 ಅಂಕವನ್ನು ಪಡೆದಿತ್ತು. ಆದರೆ 2ನೇ ಅವಧಿಯಲ್ಲಿ ಡೆಲ್ಲಿ ತಿರುಗಿ ಬಿದ್ದ ಪರಿಣಾಮ ಜೈಪುರ್‌ 2 ಬಾರಿ ಆಲೌಟ್‌ಗೆ ತುತ್ತಾಯಿತು. ಹೀಗಾಗಿ ಡೆಲ್ಲಿ ತಂಡಕ್ಕೆ 4 ಆಲೌಟ್‌ ಅಂಕ ದೊರೆಯಿತು. ಉಳಿದಂತೆ ಜೈಪುರ್‌ 15 ರೈಡಿಂಗ್‌ ಅಂಕ ಪಡೆದರೆ, ಡೆಲ್ಲಿ 13 ಅಂಕವನ್ನು ಪಡೆಯಿತು. ಉತ್ತಮ ರಕ್ಷಣಾ ಪಡೆಯನ್ನು ಹೊಂದಿದ್ದ ಡೆಲ್ಲಿ 12 ಟ್ಯಾಕಲ್‌ ಅಂಕ ಪಡೆಯಿತು. ಆದರೆ ಜೈಪುರ್‌ ತಂಡ ವೈಫ‌ಲ್ಯ ಎದುರಿಸಿದ್ದು, ರಕ್ಷಣಾ ವಿಭಾಗದಲ್ಲಿ. ಮಂಜಿತ್‌ ಚಿಲ್ಲರ್‌ ಸೇರಿದಂತೆ ಸ್ಟಾರ್‌ ಆಟಗಾರರು ವೈಫ‌ಲ್ಯ ಎದುರಿಸಿದರು. ಇದರ ಫ‌ಲವಾಗಿ ಜೈಪುರ್‌ ಕೇವಲ 4 ಟ್ಯಾಕಲ್‌ ಅಂಕವನ್ನು ಪಡೆಯಿತು.

ರೈಡಿಂಗ್‌ನಲ್ಲಿ ಡೆಲ್ಲಿಯ ಮಿರಾಜ್‌ ಶೇಖ್‌ 7 ಅಂತ ಪಡೆದರೆ, ನಿಲೇಶ್‌ ಶಿಂದೆ 5 ಅಂಕ ಪಡೆದರು. ಜೈಪುರ್‌ ಪರ ಪವನ್‌ ಕುಮಾರ್‌ 7 ಮತ್ತು ನಾಯಕ ಜಸ್ವೀರ್‌ ಸಿಂಗ್‌ 5 ಅಂಕವನ್ನು ಪಡೆದರು. ಸ್ಟಾರ್‌ ಆಟಗಾರರ ವೈಫ‌ಲ್ಯವೇ ಜೈಪುರ್‌ ಸೋಲಿಗೆ ಕಾರಣವಾಯಿತು.

ಕಬಡ್ಡಿಯ ಶುಕ್ರವಾರದ ಎರಡನೇ ಪಂದ್ಯದಲ್ಲಿ ಪುನೇರಿ ಪಲ್ಟಾನ್ಸ್‌ ತಂಡವು ಯು ಮುಂಬಾ ತಂಡವನ್ನು 33-21 ಅಂಕಗಳಿಂದ ಸೋಲಿಸಿತು. ಮಹಾರಾಷ್ಟ್ರದ ಎರಡು ಬಲಿಷ್ಠ ತಂಡಗಳ ನಡುವಣ ಈ ಹೋರಾಟದಲ್ಲಿ ಗೆಲುವಿಗಾಗಿ ಎರಡೂ ತಂಡಗಳು ಶಕ್ತಿಮೀರಿ ಪ್ರಯತ್ನ ನಡೆಸಿದ್ದವು. ಆದರೆ ಅಂತಿಮವಾಗಿ ಪುನೇರಿ ಜಯಭೇರಿ ಬಾರಿಸಿತು.