ವಿಷು: ಪಟಾಕಿ ವ್ಯಾಪಾರ ಬಿರುಸು

ಕಾಸರಗೋಡು: ಸಮೃದ್ಧಿಯ ಹಬ್ಬ ವಿಷು ಸ್ವಾಗತಕ್ಕೆ ಪಟಾಕಿ ವ್ಯಾಪಾರ ಸಕ್ರಿಯಗೊಂಡಿದ್ದು, ನಗರದ ಬಹುತೇಕ ಅಂಗಡಿಗಳಲ್ಲಿ ಪಟಾಕಿ ಖರೀದಿಗೆ ಸಾಲುಗಟ್ಟಿ ನಿಂತಿದ್ದಾರೆ. ಕೃಷಿಕರ ಉತ್ಸವ ಎಂದೂ ಕರೆಯಲ್ಪಡುವ ವಿಷು ಹಬ್ಬಕ್ಕೆ ಮೆರುಗು ನೀಡಲು ಎಪ್ರಿಲ್‌ ತಿಂಗಳಲ್ಲಿ ಬಿಸಿಲಿನ ಬೇಗೆ ಹೆಚ್ಚಿದ್ದರೂ ಪಟಾಕಿ ವ್ಯಾಪಾರಕ್ಕೆ ಯಾವುದೇ ಅಡ್ಡಿಯಾಗಿಲ್ಲ. 
ಶಬ್ದಕ್ಕಿಂತ ಬೆಳಕು ನೀಡುವ ಪಟಾಕಿಗಳಿಗೆ ಹೆಚ್ಚಿನ ಬೇಡಿಕೆ ಕಂಡು ಬಂದಿದೆ. ತಮಿಳುನಾಡಿನ ಶಿವಕಾಶಿಯಿಂದ ಕಾಸರಗೋಡು ನಗರದ ಅಂಗಡಿಗಳಿಗೆ ಪಟಾಕಿ ಬಂದಿದ್ದು, ಪರಂಪರಾಗತ ಪಟಾಕಿ ವ್ಯಾಪಾರಿಗಳಲ್ಲದೆ ವಿಷುವಿಗಾಗಿ ಪ್ರತ್ಯೇಕ ಅನುಮತಿ ಪಡೆದು ಪಟಾಕಿ ವ್ಯಾಪಾರ ನಡೆಯುತ್ತಿದೆ. ಅಪಾಯಕಾರಿಯಲ್ಲದ ಪಟಾಕಿಗಳಿಗೆ ಹೆಚ್ಚಿನ ಬೇಡಿಕೆಯಿದೆ. ಮಕ್ಕಳನ್ನು ಆಕರ್ಷಿಸುವ ಪಟಾಕಿಗಳಿಗೆ 10 ರೂಪಾಯಿಯಿಂದ 80 ರೂಪಾಯಿ ತನಕವಿದೆ. ವೈವಿಧ್ಯಮಯ ಚೈನೀಸ್‌ ಪಟಾಕಿಗಳು ಹೆಚ್ಚಾಗಿ ಮಾರಾಟವಾಗುತ್ತಿವೆ. ಕಡಿಮೆ ಅಪಾಯಕಾರಿಯಾಗಿದ್ದು, ಪಟಾಕಿಗೆ ಕಡಿಮೆ ಬೆಲೆಯೂ ಹೆಚ್ಚು ವ್ಯಾಪಾರವಾಗಲು ಕಾರಣವಾಗಿದೆ. ಕಳೆದ ಮೂರ್‍ನಾಲ್ಕು ವರ್ಷಗಳಿಂದ ಚೈನೀಸ್‌ ಪಟಾಕಿ ಮಾರುಕಟ್ಟೆಯಲ್ಲಿ ನೆಲೆಯೂರಿದೆ.