ಡಿಆರ್‌ಎಸ್‌ ವಿರುದ್ಧ ವಿರಾಟ್‌ ಕೊಹ್ಲಿ ಅಸಮಾಧಾನ

ಮೊಹಾಲಿ: ಆಸ್ಟ್ರೇಲಿಯ ವಿರುದ್ಧ ಮೊಹಾಲಿ ಪಂದ್ಯದ ಸೋಲಿನ ಬೆನ್ನಲ್ಲೇ ಡಿಆರ್‌ಎಸ್‌ ವಿರುದ್ಧ ಭಾರತದ ನಾಯಕ ವಿರಾಟ್‌ ಕೊಹ್ಲಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಮತ್ತೂಮ್ಮೆ ಡಿಆರ್‌ಎಸ್‌ನ ಬಣ್ಣ ಬಯಲಾಗಿದೆ ಎಂದು ಕಿಡಿಕಾರಿದ್ದಾರೆ.

ಪಂದ್ಯದ ಬಳಿಕ ಮಾತನಾಡಿದ ಅವರು, “ಚಾಹಲ್‌ ಎಸೆತದಲ್ಲಿ ಟರ್ನರ್‌ ಔಟಾಗಿದ್ದು ಖಚಿತವಾಗಿತ್ತು. ಹಾಗಾಗಿಯೇ ಡಿಆರ್‌ಎಸ್‌ಗೆ ಮನವಿ ಮಾಡಿದ್ದೆವು. ಆದರೆ ಅಲ್ಲಿ ನಾಟೌಟ್‌ ತೀರ್ಪು ಬಂದದ್ದನ್ನು ನೋಡಿ ಆಶ್ಚರ್ಯವಾಯಿತು. ಈ ಎಲ್ಲ ಬೆಳವಣಿಗೆಗಳಿಂದ ಡಿಆರ್‌ಎಸ್‌ನಲ್ಲಿ ಎಲ್ಲವೂ ಸರಿ ಇಲ್ಲ ಎನ್ನುವುದು ಮತ್ತೂಮ್ಮೆ ಸಾಬೀತಾಗಿದೆ. ಪದೇ ಪದೇ ಇಂತಹ ತಪ್ಪುಗಳು ಆಗುತ್ತಿರುವುದರಿಂದ ಬೇಸರವಾಗಿದೆ’ ಎಂದರು.

ಪಂದ್ಯದ 44ನೇ ಓವರ್‌ ವೇಳೆ ಬ್ಯಾಟಿಂಗ್‌ ನಡೆಸುತ್ತಿದ್ದ ಟರ್ನರ್‌, ಚಾಹಲ್‌ ಎಸೆತದಲ್ಲಿ ಕೀಪರ್‌ ಪಂತ್‌ಗೆ ಕ್ಯಾಚ್‌ ನೀಡಿದ್ದರು. ಬ್ಯಾಟ್‌ಗೆ ಬಡಿದು ಚೆಂಡು ಕೀಪರ್‌ ಕೈ ಸೇರಿತ್ತು. ಆಗ ಟರ್ನರ್‌ 41 ರನ್‌ ಗಳಿಸಿದ್ದರು. ನಾಟೌಟ್‌ ಎಂದು ತೀರ್ಪು ಬಂದಿದ್ದರಿಂದ ಮತ್ತೆ ಬ್ಯಾಟ್‌ ಮುಂದುವರಿಸಿದ ಟರ್ನರ್‌ ಪಂದ್ಯವನ್ನೇ ತಿರುಗಿಸಿದ್ದರು.