ವಿರಾಟ್‌ ಕೊಹ್ಲಿ ಗಡ್ಡಕ್ಕೆ ವಿಮೆ?!

ಹೊಸದಿಲ್ಲಿ: ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ಮುಖದಲ್ಲಿ ಹೈಲೈಟ್‌ ಆಗುವುದೇ ಅವರ ಗಡ್ಡ. ಸಾಮಾನ್ಯವಾಗಿ ಸ್ತ್ರೀಯರ “ಅಸಹಿಷ್ಣುತೆ’ಗೆ ಸಿಲುಕುವ ಈ ಗಡ್ಡವನ್ನು ಮದುವೆಯಾದ ಅನಂತರವೂ ಕೊಹ್ಲಿ ಕಾಪಾಡಿಕೊಂಡು ಬಂದಿರುವುದು ವಿಶೇಷ. ಆದರೀಗ ಈ ಗಡ್ಡಕ್ಕೆ ಕೊಹ್ಲಿ ವಿಮೆ ಮಾಡಿಸಿದ್ದಾರೆ ಎಂಬ ವಿಚಾರ ಎಲ್ಲರ ಕುತೂಹಲ ಕೆರಳಿಸಿದೆ.

ಇದಕ್ಕೆ ನಾಂದಿ ಹಾಡಿದ್ದು ಕರ್ನಾಟಕದ ಕ್ರಿಕೆಟಿಗ ಕೆ.ಎಲ್‌. ರಾಹುಲ್‌. ಅವರು ಕೊಹ್ಲಿ ನಿವಾಸದಲ್ಲಿ ಸೂಟು-ಬೂಟಿನಲ್ಲಿ ಕುಳಿತಿರುವ ಕೊಹ್ಲಿಯವರ ಗಡ್ಡವನ್ನು ಇಬ್ಬರು ವ್ಯಕ್ತಿಗಳು ಫೋಟೋ ತೆಗೆಯುತ್ತಿರುವ ಹಾಗೂ ಅಳತೆ ಮಾಡುತ್ತಿರುವ ಸಿಸಿಟಿವಿ ದೃಶ್ಯಾವಳಿಯೊಂದನ್ನು ಸಾಮಾಜಿಕ ಜಾಲತಾಣದಲ್ಲಿ ಹಾಕಿದ್ದಾರೆ. “ಏಕೆ ಹೀಗೆ ಕೊಹ್ಲಿಯವರ ಗಡ್ಡದ ಫೋಟೋ ತೆಗೆಯುತ್ತಿದ್ದಾರೆ? ಕೊಹ್ಲಿಯೇನಾದರೂ ಅವರ ಗಡ್ಡಕ್ಕೆ ವಿಮೆಮಾಡಿಸುತ್ತಿದ್ದಾರೆಯೇ?’ ಎಂದು ಪ್ರಶ್ನಿಸಿದ್ದು, ಕೆಲವು ಮಾಧ್ಯಮಗಳಲ್ಲಿ ಕೊಹ್ಲಿ ಗಡ್ಡಕ್ಕೆ ವಿಮೆ ಮಾಡಿಸಿದ್ದಾರೆ ಎಂದೇ ಬಿಂಬಿತವಾಯಿತು.

ವಿಶ್ವದ ಕೆಲವು ಸೆಲೆಬ್ರಿಟಿಗಳು ತಮ್ಮ ದೇಹದ ವಿವಿಧ ಭಾಗಗಳಿಗೆ ವಿಮೆಗಳನ್ನು ಮಾಡಿಸಿರುವ ಉದಾಹರಣೆಗಳಿವೆ. ಆಸ್ಟ್ರೇಲಿಯದ ಕ್ರಿಕೆಟಿಗ ಮರ್ವ್‌ ಹ್ಯೂಸ್‌ ಮೀಸೆಗೆ, ಭಾರತದ ಸಾನಿಯಾ ಮಿರ್ಜಾ ಮತ್ತು ವಿಜೇಂದರ್‌ ಸಿಂಗ್‌ ಕೈಗಳಿಗೆ ವಿಮೆ ಮಾಡಿಸಿದ್ದಾರೆ.