Advertisement
“ವಿರಾಟ್ ಕೊಹ್ಲಿ ರನ್ ಹಸಿವು ನಿಜಕ್ಕೂ ದಂಗುಬಡಿಸುತ್ತದೆ. 32 ವರ್ಷ ಪೂರ್ತಿಯಾಗುವ ಮೊದಲೇ ಅವರು ಏಕದಿನದಲ್ಲಿ 12 ಸಾವಿರದಷ್ಟು ರನ್ ಪೇರಿಸಿಯಾಗಿದೆ. ಅವರು ದೈಹಿಕವಾಗಿ, ಮಾನಸಿಕವಾಗಿ ಬಹಳ ಗಟ್ಟಿಗ. ಆಟದಲ್ಲಿ ತೋರುವ ನಿಷ್ಠೆ, ಬದ್ಧತೆ ಅಮೋಘ. ಹೀಗಾಗಿ ಡಾನ್ ಬ್ರಾಡ್ಮನ್ ಅನಂತರದ ಸ್ಥಾನವನ್ನು ಅಲಂಕರಿಸುವ ಎಲ್ಲ ಯೋಗ್ಯತೆ ಕೊಹ್ಲಿ ಅವರಲ್ಲಿದೆ’ ಎಂದು ಕುಮಾರ ಸಂಗಕ್ಕರ “ಆರ್ಕೆ ಶೋ’ದಲ್ಲಿ ಹೇಳಿದರು.
“ಕೊಹ್ಲಿ ಕ್ರಿಕೆಟಿನ ಅಪರೂಪದ ತಳಿ. ತಾನು ಆಡುವ ಜತೆಗೆ ಇತರರಲ್ಲಿ ಸ್ಫೂರ್ತಿಯನ್ನೂ ತುಂಬುತ್ತಾರೆ. ತಮ್ಮ ಭಾವನೆಗಳನ್ನು ಹೊರಗೆಡವಲು ಹಿಂದೆ ಮುಂದೆ ನೋಡುವುದಿಲ್ಲ. ಅವರ ಲೀಡರ್ಶಿಪ್ ಕೂಡ ಅಮೋಘ’ ಎಂದು ಸಂಗಕ್ಕರ ಅಭಿಪಾಯಪಟ್ಟರು. ವಿರಾಟ್ ಕೊಹ್ಲಿ ಆಧುನಿಕ ಕ್ರಿಕೆಟಿನ ಸರ್ವಶ್ರೇಷ್ಠ ಆಟಗಾರ. ಏಕದಿನದಲ್ಲಿ 43 ಶತಕ ಸೇರಿದಂತೆ 11,867 ರನ್ ಪೇರಿಸಿದ್ದಾರೆ. ಟೆಸ್ಟ್ ಗಳಿಕೆ 7,240 ರನ್. ಇದರಲ್ಲಿ 27 ಶತಕ ಸೇರಿದೆ. ಅಂತಾರಾಷ್ಟ್ರೀಯ ಕ್ರಿಕೆಟ್ ಶತಕಗಳ ಸಂಖ್ಯೆ 70ಕ್ಕೆ ಏರಿದ್ದು, ತೆಂಡುಲ್ಕರ್ ದಾಖಲೆಯನ್ನು ಮುರಿಯುವ ಸಾಧ್ಯತೆ ಗೋಚರಿಸುತ್ತಿದೆ.