Vijayapura: ಬಿಜೆಪಿ ವಕ್ಫ್ ತಂಡದಿಂದ ಜಿಗಜಿಣಗಿ, ಯತ್ನಾಳ್ ದೂರ

ವಿಜಯಪುರ: ಜಿಲ್ಲೆಯಲ್ಲಿ ವಕ್ಫ್ ನಿಂದಾದ ತೊಂದರೆ ಬಗ್ಗೆ ಮಂಗಳವಾರ (ಅ.29) ಅಧ್ಯಯನಕ್ಕೆ ಬಂದಿದ್ದ ರಾಜ್ಯ ಬಿಜೆಪಿ ತಂಡದಿಂದ ತಮ್ಮದೇ ಪಕ್ಷದ ಸಂಸದರಾದ ರಮೇಶ ಜಿಗಜಿಗಣಿ ಮತ್ತು ವಿಜಯಪುರ ನಗರ ಶಾಸಕ ಬಸನಗೌಡ ಪಾಟೀಲ್ ಯತ್ನಾಳ್ ದೂರವೇ ಉಳಿದಿದ್ದರು.

ಪಕ್ಷದ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ರವಿವಾರ ಗೋವಿಂದ ಕಾರಜೋಳ, ಶಾಸಕರಾದ ಹರೀಶ್ ಪೂಂಜಾ, ಮಹೇಶ ಟೆಂಗಿನಕಾಯಿ, ವಿಧಾನ ಪರಿಷತ್ತಿನ ಮಾಜಿ ಸದಸ್ಯ ಅರುಣ್ ಶಹಾಪುರ ಹಾಗೂ ರೈತ ಮೋರ್ಚಾದ ಪ್ರಧಾನ ಕಾರ್ಯದರ್ಶಿ ಕಲ್ಮರುಡಪ್ಪ ಅವರನ್ನು ಒಳಗೊಂಡ ತಂಡವನ್ನು ರಚಿಸಿದ್ದರು. ಆದರೆ, ಈ ಬಗ್ಗೆ ಸೋಮವಾರ ಯತ್ನಾಳ್ ಬಹಿರಂಗವಾಗಿಯೇ ಅತೃಪ್ತಿ ವ್ಯಕ್ತಪಡಿಸಿದ್ದರು. ಆದರೆ, ಕೊನೆಯ ಕ್ಷಣದಲ್ಲಿ ಸಂಜೆ ಸಂಸದ ಜಿಗಜಿಣಗಿ, ಶಾಸಕ ಯತ್ನಾಳ ಮತ್ತು ಮಾಜಿ ಜಿಲ್ಲಾಧ್ಯಕ್ಷ ಎಂ.ಬಿ.ಜಿರಲಿ ಹೆಸರನ್ನು ತಂಡಕ್ಕೆ ಸೇರ್ಪಡೆ ಮಾಡಲಾಗಿತ್ತು.

ಆದರೂ, ಮಂಗಳವಾರ ಯತ್ನಾಳ್ ವಿಜಯಪುರ ನಗರದಲ್ಲಿದ್ದರೂ, ಬಿಜೆಪಿ ತಂಡದಿಂದ ದೂರವೇ ಇದ್ದರು. ಬದಲಿಗೆ ವಿವಿಧ ಅಭಿವೃದ್ಧಿ ಕಾರ್ಯಗಳ ಭೂಮಿಪೂಜೆಯಲ್ಲಿ ಅವರು ಪಾಲ್ಗೊಂಡರು.

ಯತ್ನಾಳ್ ಗೈರು ಕುರಿತು ಪ್ರಶ್ನೆಗೆ ಸಂಸದ ಗೋವಿಂದ ಕಾರಜೋಳ ಪ್ರತಿಕ್ರಿಯಿಸಿ, ವಕ್ಫ್ ವಿರುದ್ಧ ವಿಜಯಪುರ ಜಿಲ್ಲೆಯಿಂದಲೇ ಯತ್ನಾಳ ಅವರೇ ಆರಂಭಿಸಿದ್ದಾರೆ. ಅವರ ಧ್ವನಿಗೆ ಬೆಂಬಲವಾಗಿ ನಾವು ಕಾರ್ಯ ಮಾಡುತ್ತೇವೆ ಎಂದಷ್ಟೇ ಹೇಳಿದರು. ಅಲ್ಲದೇ, ಹೆಚ್ಚು ಮಾತನಾಡಲು ಅವರು ನಿರಾಕರಿಸಿದರು.