Vijayapura: 22 ಲಕ್ಷ ರೂ.ಮೌಲ್ಯದ ಗಾಂಜಾ ಜಪ್ತಿ, 2 ಕಾರು ವಶಕ್ಕೆ ಪಡೆದ ಪೊಲೀಸರು

ವಿಜಯಪುರ: ಮಾದಕ ಪದಾರ್ಥ ಅಕ್ರಮವಾಗಿ ಸಾಗಿಸುತ್ತಿದ್ದ ಖಚಿತ ಮಾಹಿತಿ ಮೇರೆಗೆ ಜಿಲ್ಲಾ ಪೊಲೀಸರು ದಾಳಿ ನಡೆಸಿ, 22 ಲಕ್ಷ ರೂಪಾಯಿ ಮೌಲ್ಯದ ಗಾಂಜಾ ಮತ್ತು ಎರಡು ಕಾರು ಸೇರಿ ಒಟ್ಟು 30 ಲಕ್ಷ ರೂ. ಮೌಲ್ಯದ ಸ್ವತ್ತು ಜಪ್ತಿ ಮಾಡಿದ್ದಾರೆ.

ತಾಲೂಕಿನ ಸಿಂದಗಿ ಕ್ರಾಸ್‌ನಿಂದ ಬುರಣಾಪುರದ ಮಾರ್ಗ ಮಧ್ಯೆ ಈ ಕಾರ್ಯಾಚರಣೆ ನಡೆಸಲಾಗಿದೆ. ತೆಲಂಗಾಣ ಮೂಲದ ಸಂತೋಷ ನಾಗಶೆಟ್ಟಿ ರಾಠೋಡ, ಮೂಲತಃ ಕಲಬುರಗಿ ಜಿಲ್ಲೆಯ ಕಾಳಗಿ ತಾಲೂಕಿನ ರುಮ್ಮನಗುಡ ತಾಂಡಾ ನಿವಾಸಿಗಳಾದ ಮತ್ತು ಮಹಾರಾಷ್ಟ್ರದ ಮುಂಬೈ ಮೂಲದ ಸಂಜು ಅಲಿಯಾಸ್ ಸಂಜೀವ ಕಿಶನ್ ಆಡೆ ರಾಠೋಡ ಮತ್ತು ಸಂತೋಷ ಧನಸಿಂಗ ರಾಠೋಡ ಎಂಬುವರ ಬಂಧಿಸಲಾಗಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಲಕ್ಷ್ಮಣ್ ನಿಂಬರಗಿ ತಿಳಿಸಿದ್ದಾರೆ.

ಬಂಧಿತ ಆರೋಪಿಗಳು ತಮ್ಮ ಸ್ವಂತ ಲಾಭಕ್ಕಾಗಿ ಎರ್ಟಿಗಾ ಮತ್ತು ಸ್ವಿಫ್ಟ್ ಡಿಸೈರ್ ಕಾರಿನಲ್ಲಿ ಗಾಂಜಾ ಮಾರಾಟ ಮಾಡಲು ಸಾಗಿಸುತ್ತಿದ್ದರು. ಈ ವೇಳೆ, ದಾಳಿ ನಡೆಸಿ 22 ಲಕ್ಷ ರೂಪಾಯಿ ಮೌಲ್ಯದ 44 ಕೆಜಿಗೂ ಅಧಿಕ ಗಾಂಜಾ ಪತ್ತೆ ಹಚ್ಚಲಾಗಿದೆ. ಜತೆಗೆ ಎರಡು ಕಾರುಗಳ ಮೌಲ್ಯ ಒಟ್ಟು 30 ಲಕ್ಷ ರೂ. ಮೌಲ್ಯದ ಸಾಮಗ್ರಿ ವಶ ಪಡಿಸಿಕೊಳ್ಳಲಾಗಿದೆ ಎಂದು  ಮಾಹಿತಿ ನೀಡಿದ್ದಾರೆ.

ಈ ಕಾರ್ಯಾಚರಣೆಯಲ್ಲಿ ಸಿಇಎನ್ ಕ್ರೈಂ ಠಾಣೆಯ ಡಿಎಸ್‌ಪಿ ಸುನೀಲ ಆರ್.ಕಾಂಬಳೆ, ಸಿಪಿಐ ರಮೇಶ ಸಿ.ಅವಜಿ, ಪಿಎಸ್‌ಐ ಮಲ್ಲಿಕಾರ್ಜುನ ತಳವಾರ, ಸಿಬ್ಬಂದಿ ಆ‌ರ್.ಡಿ.ಅಂಜುಟಗಿ, ಆರ್.ಐ.ಲೋಣಿ, ಎಸ್‌.ಜಿ.ದಾನಪ್ಪಗೋಳ, ಆ‌ರ್.ಬಿ. ಕೋಳಿ, ಎಚ್.ಎನ್.ಬಾಗವಾನ, ಎಂ.ಎಂ. ಕುರುವಿನಶೆಟ್ಟಿ, ಎ.ಬಿ. ಗದ್ಯಾಳ, ಎಸ್‌.ಆ‌ರ್.ಬಡಚಿ, ಡಿ.ಆ‌ರ್.ಪಾಟೀಲ, ಎಂ.ಕೆ.ಹಾವಡಿ, ಎಸ್‌.ಕೆ.ಜೇವೂರ, ಮಲ್ಲು ಹೂಗಾರ ಪಾಲ್ಗೊಂಡಿದ್ದರು.