ವಿಡಿಯೋ ವೈರಲ್: ನೀರು ತುಂಬಿದ್ದ ಗುಂಡಿಗೆ ಬಿದ್ದ ಬಾಲಕಿಯನ್ನು ರಕ್ಷಿಸಿದ ಯುವಕ

ರಾಯಚೂರು: ಖಾಸಗಿ ನಿವೇಶನದಲ್ಲಿದ್ದ ಗುಂಡಿಯಲ್ಲಿ ಆಯತಪ್ಪಿ ಬಿದ್ದು ಸಾವು ಬದುಕಿನ ನಡುವೆ ಹೋರಾಡುತ್ತಿದ್ದ ಬಾಲಕಿಯನ್ನು ಯುವಕನೋರ್ವ ರಕ್ಷಣೆ ಮಾಡಿದ ಘಟನೆ ನಗರದಲ್ಲಿ ನಡೆದಿದೆ.

ನಗರದ ಎನ್ ಜಿಒ ರೇಸ್ ಬಚಪನ್ ಶಾಲೆ ಹತ್ತಿರದ ನಿವೇಶನದಲ್ಲಿ ಈ ರ್ಘಟನೆ ಸಂಭವಿಸಿದೆ.

ನಿವೇಶನದಲ್ಲಿ ಕಟ್ಟಡ ನಿರ್ಮಾಣಕ್ಕಾಗಿ ಬೃಹತ್ ಗುಂಡಿ ಅಗೆಯಲಾಗಿತ್ತು. ಇತ್ತೀಚೆಗೆ ಸುರಿದ ಭಾರೀ ಮಳೆಯಿಂದ ನೀರು ಸಂಗ್ರಹಗೊಂಡಿತ್ತು.

ಇದನ್ನು ಕಂಡ ಯುವಕ ತಕ್ಷಣವೇ ಜಿಗಿದು ಬಾಲಕಿಯನ್ನು ದಡಕ್ಕೆ ಎಳೆತಂದಿದ್ದಾನೆ. ಈ ದೃಶ್ಯ ವಿಡಿಯೋದಲ್ಲಿ ಸೆರೆಯಾಗಿದ್ದು, ಎಲ್ಲೆಡೆ ಹರಿದಾಡುತ್ತಿದೆ.

ಬಾಲಕಿ ಹಾಗೂ ಆಕೆಯನ್ನು ರಕ್ಷಿಸಿದ ಯುವಕ ಯಾರು ಎಂಬ ಬಗ್ಗೆ ಮಾಹಿತಿ ಸಿಕ್ಕಿಲ್ಲ. ಘಟನೆಯಿಂದ ಎಚ್ಚೆತ್ತಕೊಂಡ ನಿವೇಶನ ಮಾಲೀಕರು ಸುತ್ತಲೂ ಟಿನ್ ಅಳವಡಿಸಿ ಭದ್ರತೆ ಮಾಡಿದ್ದಾರೆ.

ನೇತಾಜಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ಸಂಭವಿಸಿದೆ.