ಅಪಘಾತ ಪ್ರಕರಣದಲ್ಲಿ ಮಾಜಿ ವಿಶ್ವ ನಂ.1 ಟೆನಿಸ್‌ ತಾರೆ ವೀನಸ್‌

ಫ್ಲೋರಿಡಾ: ಅಮೆರಿಕದ ಮಹಿಳಾ ಟೆನಿಸ್‌ ತಾರೆ, ಮಾಜಿ ವಿಶ್ವ ನಂಬರ್‌ ವನ್‌ ವೀನಸ್‌ ವಿಲಿಯಮ್ಸ್‌ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಜೂ.9ರಂದು ನಡೆದ ಕಾರು ಅಪಘಾತದಲ್ಲಿ ವಿಲಿಯಮ್ಸ್‌ ಕೂಡ ಆರೋಪಿಯಾಗಿದ್ದಾರೆ. ಆದರೆ ಇದರಲ್ಲಿ ವಿಲಿಯಮ್ಸ್‌ರದ್ದು ಏನೂ ತಪ್ಪಿಲ್ಲ ಎಂದೂ ಹೇಳಲಾಗಿದೆ. ಅಚಾನಕ್‌ ನಡೆದ ಘಟನೆಯಲ್ಲಿ ವ್ಯಕ್ತಿಯೊಬ್ಬರು ಸಾವನ್ನಪ್ಪಿರುವುದರಿಂದ ಪ್ರಕರಣ ಗಂಭೀರವಾಗಿದೆ.

ಪ್ರಕರಣ ಏನು?: ಜೂ.9ರಂದು ವೀನಸ್‌ ವಿಲಿಯಮ್ಸ್‌ ಫ್ಲೋರಿಡಾದ ತಮ್ಮ ಮನೆಯ ಸಮೀಪ ಇರುವ ಪಾಮ್‌ ಬೀಚ್‌ ಗಾರ್ಡನ್ಸ್‌ನ ಬಳಿ ಕಾರು ಚಲಾಯಿಸುತ್ತಿದ್ದರು. ಸಿಗ್ನಲ್‌ನಲ್ಲಿ ಹಸಿರು ಬೆಳಕು ಬಂತು ಎಂಬ ಕಾರಣಕ್ಕೆ ಕಾರನ್ನು ಮುಂದೋಡಿಸಿದ್ದಾರೆ. ಇದೇ ವೇಳೆ ಎದುರುಗಡೆಯಿಂದ ಲಿಂಡಾ ಬಾರ್ಸನ್‌ ಎಂಬ ಮಹಿಳೆಯೂ ಹಸಿರು ಬೆಳಕು ಬಂತು ಎಂಬ ಕಾರಣಕ್ಕೆ ಕಾರನ್ನು ಮುಂದೋಡಿಸಿದ್ದಾರೆ. ಈ ಸಂದರ್ಭದಲ್ಲಿ ತಮ್ಮ ಕಾರಿನ ಮುಂದೆ ವಾಹನಗಳು ಜಮಾಯಿಸಿದ್ದರಿಂದ ವೀನಸ್‌ ತಮ್ಮ ಕಾರನ್ನು ದಿಢೀರನೆ ನಿಲ್ಲಿಸಿದ್ದಾರೆ. ಆಗ ಬಾರ್ಸನ್‌ ತಮ್ಮ ಕಾರನ್ನು ವಿಲಿಯಮ್ಸ್‌ ಕಾರಿಗೆ ಗುದ್ದಿದ್ದಾರೆ.

ಘಟನೆಯಿಂದ ಲಿಂಡಾ ಪತಿ ಜೆರೋಮ್‌ ಬಾರ್ಸನ್‌(78) ಗಂಭೀರ ಗಾಯಗೊಂಡು ಆಸ್ಪತ್ರೆಗೆ ಸೇರಿದ್ದರು. 2 ವಾರಗಳ ಕಾಲ ಆಸ್ಪತ್ರೆಯಲ್ಲಿ ನರಳಿದ ಜೆರೋಮ್‌ ಸಾವನ್ನಪ್ಪಿದ್ದಾರೆ. ದೂರುದಾರರು ಮತ್ತು ವೀನಸ್‌ ಹೇಳಿಕೆಯನ್ನು ಪರಿಶೀಲಿಸಿದಾಗ ಘಟನೆ ಅಚಾನಕ್‌ ನಡೆದಿದೆ. ಇದರಲ್ಲಿ ಯಾರ ಬೇಜವಾಬ್ದಾರಿಯೂ ಇಲ್ಲ. ಆದರೆ ಪೊಲೀಸ್‌ ವರದಿ ವೀನಸ್‌ ಅವರದ್ದೇ ತಪ್ಪು ಎನ್ನುವಂತಿದೆ. ಕೆಂಪು ಬೆಳಕು ಇದ್ದಾಗಲೇ ವೀನಸ್‌ ಕಾರು ಚಲಾಸಿಯಿದ್ದಾರೆಂದು ಪೊಲೀಸ್‌ ವರದಿಯಲ್ಲಿದೆ ಎನ್ನಲಾಗಿದೆ.