ಕಳೆದ ಚಳಿಗಾಲಕ್ಕಿಂತ ಈ ವರ್ಷ ತರಕಾರಿ ಬೆಲೆ ಶೇ.50ರಷ್ಟು ಏರಿಕೆ

ಹೊಸದಿಲ್ಲಿ: ಹಣ್ಣು, ತರಕಾರಿಗಳ ಸೀಸನ್‌ ಆರಂಭವಾದರೂ, ಸಾಕಷ್ಟು ಮಾರುಕಟ್ಟೆಗೆ ಆವಕವಾಗುತ್ತಿಲ್ಲ ಇದರಿಂದ ಈ ಬಾರಿ ತರಕಾರಿ ಬೆಲೆ ಕಳೆದ ವರ್ಷ ಚಳಿಗಾಲಕ್ಕಿಂತಲೂ ಹೆಚ್ಚಾಗಿದೆ. ಶೇ.50ರಷ್ಟು ತರಕಾರಿಗಳ ಬೆಲೆ ಹೆಚ್ಚಾಗಿದೆ ಎಂದು ಕೇಂದ್ರ ಸರಕಾರದ ಮೂಲಗಳು ಹೇಳಿವೆ. ಬಟಾಟೆ, ಟೊಮೆಟೋ, ಕ್ಯಾಲಿಫ್ಲವರ್‌ ಇತ್ಯಾದಿಗಳ ಬೆಲೆ ಶೇ.50ರಷ್ಟು ಹೆಚ್ಚಾಗಿವೆ. ಹಲವೆಡೆ ಭಾರೀ ಮಳೆ ಸುರಿದಿರುವುದರಿಂದ ಬೆಳೆಗಳಿಗೆ ಹಾನಿಯಾಗಿದ್ದು, ಮಾರುಕಟ್ಟೆಗಳಲ್ಲಿ ತರಕಾರಿ ಬೆಲೆ ಏರಿಕೆಗೆ ಕಾರಣವಾಗಿದೆ.

ಅಕ್ಟೋಬರ್‌ ವೇಳೆ ಮಧ್ಯಪ್ರದೇಶ, ಮಹಾರಾಷ್ಟ್ರ, ರಾಜಸ್ಥಾನಗಳಲ್ಲಿ ಹೆಚ್ಚಿನ ಮಳೆಯಾಗಿ ಟೊಮೆಟೋ, ಈರುಳ್ಳಿ ಬೆಳೆಗಳಿಗೆ ಹಾನಿಯಾಗಿದೆ. ಇದರೊಂದಿಗೆ ಬೇಳೆಕಾಳುಗಳ ಬೆಳೆಗೂ ಹಾನಿಯಾಗಿದೆ.

ಆಹಾರ ಸಚಿವಾಲಯದ ದತ್ತಾಂಶ ಪ್ರಕಾರ ಈರುಳ್ಳಿ ಬೆಲೆ ಕಳೆದ ಮಾರ್ಚ್‌ ಬಳಿಕ ಶೇ.400ರಷ್ಟು ಏರಿಕೆಯಾಗಿದೆ. ಇನ್ನು ಅಕ್ಕಿ, ಬೇಳೆಕಾಳುಗಳು, ಅಡುಗೆ ಎಣ್ಣೆ, ಚಹಾ, ಸಕ್ಕರೆ, ಬೆಲ್ಲ ಇತ್ಯಾದಿಗಳ ಬೆಲೆ ಕಳೆದ ವರ್ಷಕ್ಕಿಂತ ಹೆಚ್ಚಿದೆ. ಅಕ್ಕಿ, ಗೋಧಿ ಬೆಳೆ ಶೇ.10ರಷ್ಟು ಏರಿಕೆ ಕಂಡಿದೆ. ಅಕ್ಟೋಬರ್‌ನಲ್ಲಿ ತರಕಾರಿ ಬೆಲೆ ಶೇ.26.10ರಷ್ಟು ಏರಿಕೆ ಕಂಡಿದ್ದರೆ, ನವೆಂಬರ್‌ನಲ್ಲಿ ಶೇ.35.99ರಷ್ಟು ಏರಿಕೆ ಕಂಡಿದೆ.