UV Fusion: Independence Day-ಕನಸಿನಲ್ಲಿ ಬಂದ ಚೆನ್ನಮ್ಮ, ರಾಯಣ್ಣ

ಅದು ನಿತ್ಯ ನಿರ್ಮಲವಾದ ಪ್ರಕೃತಿ ಮಡಿಲು, ಸೂರ್ಯ ಬೆಳಕು ನೀಡುತ್ತಿದ್ದರೆ ಚಂದ್ರ ತಂಪೆರೆಯುತ್ತಿದ್ದಾನೆ. ಆ ರಮಣೀಯ ಸಮಯದಲ್ಲಿ ನನಗೆ ಕೇಳುತ್ತಿತ್ತು ತಾಯಿ ಮಗನ ಸಂಭಾಷಣೆ, ಮುಂದೆ ಹೋಗಿ ನೋಡಿದರೆ ಪರಮಾಶ್ಚರ್ಯ ಅಲ್ಲಿರುವುದು ಸ್ವಾತಂತ್ರ ಹೋರಾಟದ ಬೆಳ್ಳಿ ಚುಕ್ಕಿ ಎನಿಸಿಕೊಂಡ ಕಿತ್ತೂರು ರಾಣಿ ಚೆನ್ನಮ್ಮ ಮತ್ತು ಸಂಗೊಳ್ಳಿ ರಾಯಣ್ಣ.

ರಾಯಣ್ಣ: ಅವ್ವ.. ಚೆನ್ನಮ್ಮ ಬ್ರಿಟಿಷರು ಭಾರತ ದೇಶ ಬಿಟ್ಟು ಹೋದ್ರಂತ ನನ್ನವ್ವ. ನಮ್ಮ ನಾಡು ಸ್ವತಂತ್ರ ಆಯ್ತಂತ ತಾಯಿ.

ಚೆನ್ನಮ್ಮ: ಹೌದಾ ರಾಯಾ.. ನಾವು ಕಷ್ಟ ಪಟ್ಟಿದ್ದು ಸಾರ್ಥಕ ಆಯ್ತು ಬಿಡು. ಹಂಗಂದ್ರ ನಮ್ಮ ದೇಶ ಗುಲಾಮಗಿರಿ ಮಾಡೋದು ಮುಗೀತು ಅನ್ನು.

ರಾಯಣ್ಣ: ಹೌದು ತಾಯಿ ಈಗ ನಮ್ಮನ್ನೇ ನಾವೇ ಆಳುವಂತ ಪ್ರಜಾಪ್ರಭುತ್ವ ತಂದಾರಂತ. ನಮ್ಮೊಳಗೆ ಒಬ್ಬನ್ನ ಚುನಾವಣೆ ಮೂಲಕ ಆರಿಸಿ ನಮ್ಮ ದೇಶದ ಆಡಳಿತ ಮಾಡಾಕ ಹಚ್ತಾರಂತ ಅವ್ವ.

ಚೆನ್ನಮ್ಮ: ಹೌದಾ ಮಗನೇ ಒಳ್ಳೇದಾಯ್ತು, ನಮ್ಮ ರಾಜ್ಯಗಳು ಸಂಸ್ಥಾನಗಳು ಏನ ಆದುವು ?

ರಾಯಣ್ಣ: ಅವನ್ನೆಲ್ಲ ಭವ್ಯ ಭಾರತ ದೇಶದೊಳಗ ಸೇರಿಸಿ ಭಾಷಾ ಪ್ರಕಾರ ಪ್ರಾಂತ್ಯ ವಿಂಗಡನೆ ಮಾಡಿ ರಾಜ್ಯ ಸೃಷ್ಟಿ ಮಾಡ್ಯಾರ ತಾಯಿ.

ಚೆನ್ನಮ್ಮ: ಹೌದಾ ರಾಯಾ, ತಿಳಿದವರು ಮಾಡಿರ್ತಾರಂದ್ರ ಚಲೋನ ಮಾಡಿರ್ತಾರ ಬಿಡು, ಪ್ರಜಾಪ್ರಭುತ್ವದಿಂದ ಒಳ್ಳೇದಾಗ್ತೀತಿ ಅಂದ್ರ ಆಗ್ಲಿ ಮಗನ.

ರಾಯಣ್ಣ: ಆದ್ರ ಅವ್ವಾ, ಪ್ರಜಾಪ್ರಭುತ್ವದಾಗ ಯಾರ ಬೇಕಾದ್ರು ಅಧಿಕಾರ ಹಿಡಿಬೋದು ಅಂತಾರ, ಹಂಗಂದ್ರ ಕೆಲವರು ಸುಳ್ಳು ಕತೆ ಹೇಳಿ ಚುನಾವಣೆ ಗೆಲ್ಲಬಹುದು, ಬರೀ ಆಶ್ವಾಸನೆ ಕೊಟ್ಟು ಕೆಲಸ ಮಾಡಲ್ಲ ತಾಯಿ.

ಚೆನ್ನಮ್ಮ: ಏನು? ಆಡಳಿತ ಮಾಡೋರು ಸುಳ್ಳು ಮಾತಾಡ್ತಾರಾ? ಕೆಲಸ ಮಾಡಲ್ಲ ಅಂತೀಯಾ?

ರಾಯಣ್ಣ: ಹೌದು ಅವ್ವ. ಈಗಾಗ್ಲೆ ಬರೀ ಹಣದ ಆಸೆ, ಜಾತಿ ತಾರತಮ್ಯ ಮಾಡಾಕತ್ತಾರಂತ. ಆ ಕೆಂಪು ಮೂತಿ ಬ್ರಿಟಿಷರು ಹೋದ್ರಂತ ಖುಷಿ ಆಗ್ತೀತಿ, ಆದ್ರ ನಮ್ಮ ಜನಾನ ಹಿಂಗೆಲ್ಲಾ ಮಾಡಕತ್ತಾರಂತ ದುಃಖ ಆಗ್ತೀತಿ ತಾಯಿ.

ಚೆನ್ನಮ್ಮ: ರಾಯಾ ಹಂಗಾದ್ರ ಏನ ಮಾಡ್ಬೇಕ ಅಂತಿ? ನಮ್ಮ ರಾಜ್ಯ ದೇಶದ ಗತಿ ಏನು ಮಗನೇ?

ರಾಯಣ್ಣ: ತಾಯಿ ಅಪ್ಪಣೆ ಕೊಡು, ಈ ನರಿ ಬುದ್ಧಿ ಇಟ್ಟುಕೊಂಡು ಆಡಳಿತ ಮಾಡೋರನ್ನ ಸಂಹಾರ ಮಾಡಿ ಬರ್ತೇನಿ. ಆಶೀರ್ವಾದ ಮಾಡು ತಾಯಿ.

ಚೆನ್ನಮ್ಮ: ಮಗನೇ ನೀನೇ ಅಂದೀಯಲ್ಲಾ ಎಲ್ಲ ರಾಜ್ಯ ಏಕೀಕರಣ ಮಾಡಿ ಭಾರತ ದೇಶ ಮಾಡ್ಯಾರು, ಪ್ರಜಾಪ್ರಭುತ್ವ ಬಂದೇತಿ ಅಂತಾ ಈಗ ನಾನು ನೀನು ಏನ್‌ ಮಾಡಾಕ ಬರ್ತೇತಿ ರಾಯಾ.

ರಾಯಣ್ಣ: ಹಂಗಂದ್ರ ಈ ಅನ್ಯಾಯ ಹಿಂಗಾ ಮುಂದವರೀತೇತಿ ಏನ್‌ ತಾಯಿ?

ಚೆನ್ನಮ್ಮ: ಜನಾ ಬುದ್ಧಿವಂತರಾಗೋ ತನಕ ಹಿಂಗ ಇರತೇತಿ ಮಗನೇ.

ರಾಯಣ್ಣ: ಹಂಗಂದ್ರ ಪ್ರಜಾಪ್ರಭುತ್ವದ ನಿಜವಾದ ಅರ್ಥ ಅವರಿಗೆ ತಿಳಿಯೋ ತನಕ ಬುದ್ಧಿ.

ಚೆನ್ನಮ್ಮ: ರಾಯಾ ನಮ್ಮ ಕಾಲಾ ಮುಗದೇತಿ, ನಮ್ಮ ದೇಶ ಎಷ್ಟೋ ವೀರಪುತ್ರರನ್ನ ಬೆಳೆಸೇತಿ, ಈಗ ಇಧ್ದೋರು ಭಾರತಮಾತೆ ಸೇವಾ ಮಾಡ್ಲಿ ಬಿಡು.

ರಾಯಣ್ಣ: ಸರಿ ತಾಯಿ, ಬರ್ರೀ ನೀವು ವಿಶ್ರಾಂತಿ ತಗೋ ಹೊತ್ತ ಆಗೇತಿ.

ಚೆನ್ನಮ್ಮ: ಹೌದು ನಡಿ ರಾಯಾ, ಆ ತಾಯಿ ಭಾರತಮಾತೆ ಮಡಿಲಾಗ ನಾವೆಲ್ಲ ಸುರಕ್ಷಿತ ಇರ್ತೀವಿ.

ಇಷ್ಟು ಹೇಳಿದ ಕೂಡಲೇ ಆ ಇಬ್ಬರೂ ದೈವಸ್ವರೂಪಿ ಪುಣ್ಯಾತ್ಮರು ಅದೃಶ್ಯರಾದರು. ನಾನು ಕೆಲಕಾಲ ದಿಗ್ಭ್ರಾಂತನಾಗಿ ಆ ರಮಣೀಯ ಪ್ರಕೃತಿಯಲ್ಲಿ ಅವರನ್ನು ಹುಡುಕಿದೆ ಆದರೆ ಸಿಗಲಿಲ್ಲ. ಅಷ್ಟರಲ್ಲಿ ಚಿಕ್ಕ ಮಕ್ಕಳು ಆಡೋ ಶಬ್ದ ಕೇಳಿತು, ನಿದ್ರೆಯಿಂದ ಎಚ್ಚರವಾಯಿತು. ಇಷ್ಟೊತ್ತು ಕಂಡಿದ್ದು ಕನಸು. ಏನೇ ಆಗಲಿ ಆ ಮುದ್ದು ಮಕ್ಕಳಲ್ಲಿಯೇ ಯಾರಾದರೂ ಚೆನ್ನಮ್ಮ, ರಾಯಣ್ಣನಂತಾಗಲೀ ಎಂಬುದೇ ನನ್ನ ಆಸೆ.

ಗಿರೀಶ ಮುಕ್ಕಲ್ಲ ಕಲಘಟಗಿ, ಧಾರವಾಡ