ಮೇಲ್ದರ್ಜೆಗೇರದ ಕೊಲ್ಲೂರು ಪ್ರಾಥಮಿಕ ಆರೋಗ್ಯ ಕೇಂದ್ರ

ಕೊಲ್ಲೂರು: ಮೇಲ್ದರ್ಜೆಗೇರುವ ನಿರೀಕ್ಷೆಯಲ್ಲಿದ್ದ ಕೊಲ್ಲೂರು ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ  24×7 ಸೇವೆಯೂ ಸಿಗದಂತಾಗಿದೆ. 

ತುರ್ತು ಚಿಕಿತ್ಸೆಗೆ ಕುಂದಾಪುರವರೆಗೆ ಹೋಗಬೇಕಾಗಿದ್ದು, ಪರ್ಯಾಯ ವ್ಯವಸ್ಥೆ ಒದಗಿಸುವ ಭರವಸೆಯೂ ಹುಸಿಯಾಗಿದೆ.  

ಕೊಲ್ಲೂರು, ಗೋಳಿಹೊಳೆ, ಜಡ್ಕಲ್‌, ಮುದೂರು ಹಾಗೂ ಎಳಜಿತ ಗ್ರಾಮಗಳ ರೋಗಿಗಳಿಗೆ ಕೊಲ್ಲೂರು ಪ್ರಾಥಮಿಕ ಆರೋಗ್ಯ ಕೇಂದ್ರವನ್ನು ಚಿಕಿತ್ಸೆಗಾಗಿ ಅವಲಂಬಿಸಬೇಕಾಗಿದೆ. 3 ಗ್ರಾಮಗಳಲ್ಲಿ ಸುಮಾರು 20 ಸಾವಿರಕ್ಕೂ ಮಿಕ್ಕಿ ಜನರು ವಾಸವಾಗಿದ್ದಾರೆ. 

ರಾತ್ರಿ ಹೊತ್ತಿನಲ್ಲಿ ತುರ್ತು ಚಿಕಿತ್ಸೆಗೆ ಕೊಲ್ಲೂರಿಗೆ ಆಗಮಿಸಿದರೆ ಇಲ್ಲಿ ಸೇವೆಯೇ ಲಭ್ಯವಿಲ್ಲ! 

ಸಿಬಂದಿ ಕೊರತೆ  
ಕಿರಿಯ ಪುರುಷ ಆರೋಗ್ಯ ಸಹಾಯಕ ಸಹಿತ ಜೂನಿಯರ್‌ ಹೆಲ್ತ್‌ ಅಸಿಸ್ಟೆಂಟ್‌, ಫಾರ್ಮಸಿಸ್ಟ್‌ ಕೊರತೆ ಇಲ್ಲಿದೆ. ದಾದಿಯರು ಮತ್ತು ಕಾವಲುಗಾರರನ್ನು ನೇಮಿಸಲಾಗಿದ್ದು, ಕೊಲ್ಲೂರು ದೇಗುಲ ಖರ್ಚು ನಿಭಾಯಿಸುತ್ತಿದೆ.  

ಕೊಲ್ಲೂರು, ಗೋಳಿ ಹೊಳೆಯಲ್ಲೂ ಸಿಬಂದಿ ಇಲ್ಲ 
ಕೊಲ್ಲೂರು ಬಿ ಹಾಗೂ ಗೋಳಿಹೊಳೆ ಸಬ್‌ ಸೆಂಟರ್‌ಗಳಲ್ಲೂ ಸಿಬಂದಿ ಇಲ್ಲದೆ ರೋಗಿಗಳು ಪರದಾಡಬೇಕಾಗಿದೆ. ಇಲ್ಲಿನ ಸಮಸ್ಯೆಬಗ್ಗೆ ಗ್ರಾ.ಪಂ. ಹಾಗೂ ಗ್ರಾಮಸ್ಥರು ಇಲಾಖೆಯ ಮೇಲಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದರೂ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಸಮಾಜ ಸೇವಕ ರಮೇಶ್‌ ಗಾಣಿಗ ಹೇಳಿದ್ದಾರೆ.