ಹಾರ ಹಾಕಿದ ವರ, ಕೆನ್ನೆಗೆ ಬಾರಿಸಿದ ವಧು- ವಿಡಿಯೋ ವೈರಲ್‌ 

ಮದುವೆ ಎಂದರೆ ಸಂಭ್ರಮ. ಅದೇ ರೀತಿ ಉತ್ತರ ಪ್ರದೇಶದ ಹಮೀರ್‌ಪುರದಲ್ಲಿ ಇತ್ತೀಚೆಗೆ ಸಂಭ್ರಮದಿಂದ ನಡೆಯುತ್ತಿದ್ದ ಮದುವೆ ಕಾರ್ಯಕ್ರಮದಲ್ಲಿ ನಡೆಯಬಾರದ್ದು ನಡೆದು ಹೋಗಿದೆ.

ಮದುವೆ ಮಂಟಪದಲ್ಲಿ ವಧೂ-ವರರು ನಿಂತಿದ್ದರು. ಅವರಿಬ್ಬರು ದಂಪತಿಯಾಗುವ ದೃಶ್ಯವನ್ನು ಸೆರೆಹಿಡಿಯಲೆಂದು ಛಾಯಾಗ್ರಾಹಕ ಕೂಡ ಸಿದ್ಧನಾಗಿ ನಿಂತಿದ್ದ. ಸಂಪ್ರದಾಯದಂತೆ ಮೊದಲು ವರ ವಧುವಿಗೆ ಹಾರ ಹಾಕಿದ್ದಾನೆ. ವರನಿಗೆ ಹಾರ ಹಾಕಬೇಕಿದ್ದ ವಧು, ಹಾರದ ಬದಲು ವರನ ಕೆನ್ನೆಗೆ ಎರಡು ಬಾರಿ ಬಾರಿಸಿದ್ದಾಳೆ.

ನಂತರ ಸುಮ್ಮನೆ ಮಂಟಪದಿಂದ ಕೆಳಗಿಳಿದು ನಡೆದಿದ್ದಾಳೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ಭಾರೀ ವೈರಲ್‌ ಆಗಿದೆ.