ಮತ್ತೂಮ್ಮೆ ಭುಗಿಲೆದ್ದ ಕಾಶ್ಮೀರ ವರದಿಯ ಕಿಡಿ

ನವದೆಹಲಿ/ವಿಶ್ವಸಂಸ್ಥೆ: ಭಾರತದ ತೀವ್ರ ವಿರೋಧದ ನಡುವೆಯೂ ಕಾಶ್ಮೀರದಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆಯಾಗುತ್ತಿದೆ ಎಂಬ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಸಮಿತಿಯ ವರದಿಯನ್ನು ಒಪ್ಪಿಕೊಳ್ಳುವ ಸುಳಿವನ್ನು ವಿಶ್ವಸಂಸ್ಥೆಯ ಮಹಾಪ್ರಧಾನ ಕಾರ್ಯದರ್ಶಿ ನೀಡಿದ್ದಾರೆ. 
ಯುಎನ್‌ಎಚ್‌ಆರ್‌ಸಿ ವರದಿ ಬಹಿರಂಗವಾದಾಗಿನಿಂದಲೂ ವಿಶ್ವಸಂಸ್ಥೆಯಲ್ಲಿ ಪ್ರಬಲವಾಗಿವಾದ ಮುಂದುವರಿಸಿರುವ ಭಾರತ, ಶುಕ್ರವಾರವೂ ಇದೊಂದು ವೈಯಕ್ತಿಕ ವರದಿಯಾಗಿದ್ದು, ಒಪ್ಪಿಕೊಳ್ಳುವ ಮಾತೇ ಇಲ್ಲ ಎಂದು ಪುನರುಚ್ಚರಿಸಿದೆ. 

ಗುರುವಾರ ರಾತ್ರಿ ಪತ್ರಕರ್ತರ ಜತೆ ಮಾತನಾಡಿದ ವಿಶ್ವಸಂಸ್ಥೆ ಮಹಾಪ್ರಧಾನ ಕಾರ್ಯದರ್ಶಿ ಆ್ಯಂಟಾನಿಯೋ ಗುಟೆರಸ್‌, ಮಾನವ ಹಕ್ಕುಗಳ ಸಮಿತಿಯ ಅಧ್ಯಕ್ಷ ಝೈದ್‌ ರಾದ್‌ ಅಲ್‌ ಹುಸೇನ್‌ ಅವರ ವರದಿ ಒಪ್ಪಿಕೊಳ್ಳುವ ಸುಳಿವು ನೀಡಿದರು. ಎಲ್ಲ ಸಂಗತಿಗಳನ್ನು ಅಧ್ಯಯನ ಮಾಡಿಯೇ ಈ ವರದಿ ನೀಡಿದ್ದಾರೆ. ಅಲ್ಲಿನ ರಾಜಕೀಯ ಸ್ಥಿತಿಗಳೇನಾದರೂ ಇರಲಿ. ಆದರೂ ಈ ವರದಿ ಒಪ್ಪಿಕೊಳ್ಳಬೇಕಾಗುತ್ತದೆ ಎಂದಿದ್ದಾರೆ. 

ಅತ್ತ ಮಹಾಪ್ರಧಾನ ಕಾರ್ಯದರ್ಶಿಗಳ ಹೇಳಿಕೆ ಹೊರಬೀಳುತ್ತಿದ್ದಂತೆ, ಇತ್ತ ವಿದೇಶಾಂಗ ಇಲಾಖೆ ಸಹಾಯಕ ಸಚಿವ ಜ. ವಿ.ಕೆ.ಸಿಂಗ್‌ ಅವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಝೈದಿ ಅವರ ಈ ವರದಿ ತೀರಾ ವೈಯಕ್ತಿಕವಾಗಿದೆ. ಇದನ್ನು ಅಧ್ಯಯನ ನಡೆಸಿ ತಯಾರು ಮಾಡಿದ್ದಲ್ಲ. ಅಲ್ಲದೆ ಈ ವರದಿಗೆ ಮಾನವ ಹಕ್ಕುಗಳ ಸಮಿತಿಯಲ್ಲೇ ಯಾವುದೇ ಮಾನ್ಯತೆ ಸಿಕ್ಕಿಲ್ಲ. ಹೀಗಾಗಿ ಒಪ್ಪಿಕೊಳ್ಳಲ್ಲ ಎಂದು ಹೇಳಿದ್ದಾರೆ. 

ಇನ್ನು ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಮಾತನಾಡಿ, ಸ್ಥಳೀಯ ಮಾಹಿತಿಗಳನ್ನು ನಿರ್ಲಕ್ಷಿಸಿ ಈ ವರದಿ ತಯಾರಿಸಲಾಗಿದೆ. ಇಲ್ಲಿ ಸೇನೆ ಕಡೆಯಿಂದ ಮಾನವ ಹಕ್ಕುಗಳ ಉಲ್ಲಂಘನೆಯಾಗುತ್ತಿದೆ ಎಂಬುದು ಸುಳ್ಳು. ಇದೊಂದು ಉಗ್ರರು ಪೀಡಿಸುತ್ತಿರುವ ರಾಜ್ಯವಾಗಿದ್ದು, ಅವರನ್ನು ಹಿಮ್ಮೆಟ್ಟಿಸಲಾಗುತ್ತದೆ. ಜತೆಗೆ ಮಕ್ಕಳಿಗಾಗಿ ಶಾಲೆ ಕಟ್ಟಿಸಿಕೊಟ್ಟಿರುವುದಲ್ಲದೇ ಅವರಿಗೆ ಉನ್ನತ ಶಿಕ್ಷಣ ವ್ಯವಸ್ಥೆಯನ್ನೂ ಮಾಡಿಕೊಟ್ಟಿದೆ ಎಂದಿದ್ದಾರೆ. 

ಪಾಕ್‌ ಮೂಲದ ಕೆನಡಾ ಪತ್ರಕರ್ತನ ನೆರವು
ಕಾಶ್ಮೀರದಲ್ಲಿ ಮಾನವ ಹಕ್ಕುಗಳು ಉಲ್ಲಂಘನೆಯಾಗುತ್ತಿದೆ ಎಂಬ ವರದಿ ಕೊಟ್ಟಿರುವ ಯುಎನ್‌ಎಚ್ಚಾರ್ಸಿ ಅಧ್ಯಕ್ಷರಿಗೆ ಸಂಪೂರ್ಣವಾಗಿ ಸಹಾಯ ಮಾಡಿರುವುದು ಪಾಕಿಸ್ತಾನ ಮೂಲಕ ಕೆನಡಾದಲ್ಲಿರುವ ಪತ್ರಕರ್ತ. ಈತನೇ ಒಪ್ಪಿಕೊಂಡಿರುವ ಪ್ರಕಾರ, ಝೈದಿಗೆ ವರದಿ ತಯಾರಿಸಲು ಎಲ್ಲಾ ರೀತಿಯ ಸಹಾಯ ಮಾಡಿದ್ದಾನೆ ಎಂದು ಕೆಲವು ಮಾಧ್ಯಮಗಳು ವರದಿ ಮಾಡಿವೆ. ಹೀಗಾಗಿಯೇ ಭಾರತ ಇದೊಂದು ತೀರಾ ವೈಯಕ್ತಿಕ ಮಟ್ಟದಲ್ಲಿ ಸಿದ್ಧ ಮಾಡಿರುವ ವರದಿ ಎಂದು ಹೇಳಿಕೊಂಡು ಬರುತ್ತಿದೆ.