ಯು.ಕೆ. ಬಡ್ಡಿ ದರ ಹೆಚ್ಚಳ: 27 ವರ್ಷಗಳಲ್ಲೇ ಗರಿಷ್ಠ

ಲಂಡನ್‌/ಮುಂಬೈ: ಹಣದುಬ್ಬರದಿಂದ ತತ್ತರಿಸುತ್ತಿರುವ ಯುನೈಟೆಡ್‌ ಕಿಂಗ್‌ಡಮ್‌ನಲ್ಲಿ ಬಡ್ಡಿದರವನ್ನು ಶೇ.0.5 ಏರಿಕೆ ಮಾಡಲಾಗಿದೆ. ಬ್ಯಾಂಕ್‌ ಆಫ್ ಇಂಗ್ಲೆಂಡ್‌ ಈ ನಿರ್ಧಾರ ಕೈಗೊಂಡಿದೆ.  27 ವರ್ಷಗಳ ಬಳಿಕ ಅಂದರೆ 1995ರ ಬಳಿಕ ಗರಿಷ್ಠ ಪ್ರಮಾಣದಲ್ಲಿ ಬಡ್ಡಿದರ ಏರಿಕೆ ಮಾಡಲಾಗಿದೆ.

ಬ್ಯಾಂಕ್‌ನ ವಿತ್ತೀಯ ನೀತಿ ನಿರೂಪಣಾ ಸಮಿತಿ 8-1ರ ಅಂತರದಲ್ಲಿ ದರ ಏರಿಕೆಯ ತೀರ್ಮಾನ ಕೈಗೊಂಡಿದೆ. ದರ ಏರಿಕೆಯ ಬಳಿಕ ಬಡ್ಡಿಯ ಪ್ರಮಾಣ ಶೇ.1.75 ಆಗಿದೆ. ಇದರ ಹೊರತಾಗಿಯೂ ಹಣದುಬ್ಬರ ಪ್ರಮಾಣ ಶೇ.13ನ್ನು ಮೀರಿಸುವ ಸಾಧ್ಯತೆಗಳಿವೆ. ಕೆಲ ದಿನಗಳ ಹಿಂದಷ್ಟೇ ಅಮೆರಿಕದ ಫೆಡರಲ್‌ ರಿಸರ್ವ್‌ ಕೂಡ ಬಡ್ಡಿ ದರದಲ್ಲಿ ಹೆಚ್ಚಳ ಮಾಡಿತ್ತು.

ಈ ನಡುವೆ ಆರ್‌ಬಿಐನ ವಿತ್ತೀಯ ನೀತಿ ಪರಿಶೀಲನಾ ಸಮಿತಿ ಕೂಡ ಬುಧವಾರದಿಂದ ಸಭೆ ನಡೆಸುತ್ತಿದ್ದು, ಶುಕ್ರವಾರ ಮುಕ್ತಾಯಗೊಳ್ಳಲಿದೆ. ದೇಶದಲ್ಲಿ ಕೂಡ ಶೇ.0.4 ಬಡ್ಡಿ ದರ (40 ಬೇಸಿಸ್‌ ಪಾಯಿಂಟ್ಸ್‌) ಹೆಚ್ಚಳವಾಗುವ ಸಾಧ್ಯತೆ ಇದೆ.