ಭಾರತ ಫ‌ುಟ್‌ಬಾಲ್‌ ಅಭಿಮಾನಿಗಳನ್ನು ಬಂಧಿಸಿಟ್ಟ ಯುಎಇ ನಾಗರಿಕ!

ಅಬುಧಾಬಿ (ಯುಎಇ): ಮೊನ್ನೆಯಷ್ಟೇ ಅಬುಧಾಬಿಯಲ್ಲಿ ನಡೆದ ಎಎಫ್ ಸಿ ಕಪ್‌ ಫ‌ುಟ್‌ಬಾಲ್‌ ಪಂದ್ಯದಲ್ಲಿ ಆತಿಥೇಯ ಯುಎಇ ವಿರುದ್ಧ ಭಾರತ 2-0ಯಿಂದ ಸೋತು ಹೋಗಿತ್ತು. ಅದರ ಬೆನ್ನಲ್ಲೇ ಗಂಭೀರ ಸಂಗತಿಯೊಂದು ಹೊರಬಿದ್ದಿದೆ. 

ಪಂದ್ಯಕ್ಕೂ ಮುನ್ನ ಯುಎಇ ಮೂಲದ ವ್ಯಕ್ತಿಯೊಬ್ಬ, ಭಾರತೀಯ ಮೂಲದ ನೌಕರರನ್ನು ಹಕ್ಕಿಗೂಡಿನಲ್ಲಿ ಬಂಧಿಸಿಟ್ಟ ವಿಡಿಯೊ ಪ್ರಕಟವಾಗಿದೆ. ಭಾರತೀಯ ಅಭಿಮಾನಿಗಳು ಯುಎಇ ತಂಡಕ್ಕೇ ಬೆಂಬಲ ನೀಡಬೇಕು, ಭಾರತ ತಂಡವನ್ನು ಬೆಂಬಲಿಸುವುದಾದರೆ ಹೊರಬಿಡುವುದಿಲ್ಲ ಎಂದು ಆತ ಬೆದರಿಸಿದ್ದಾನೆ ಎನ್ನಲಾಗಿದೆ. ಆದ್ದರಿಂದ ಆತನನ್ನು ಯುಎಇ ಪೊಲೀಸರು ಬಂಧಿಸಿದ್ದಾರೆ.

ಬಂಧನವಾದ ಬೆನ್ನಲ್ಲೇ ಆ ವ್ಯಕ್ತಿ ಇನ್ನೊಂದು ವಿಡಿಯೊವನ್ನು ಬಿಡುಗಡೆ ಮಾಡಿದ್ದಾನೆ. ಈ ಇಡೀ ಪ್ರಕರಣ ಒಂದು ತಮಾಷೆ, ಅವರೆಲ್ಲ ನನ್ನ ನೌಕರರು, ಅವರಲ್ಲಿ ಒಬ್ಬ ವ್ಯಕ್ತಿಯಂತೂ 22 ವರ್ಷಗಳಿಂದ ನನಗೆ ಪರಿಚಿತ. ಇದೇ ವ್ಯಕ್ತಿಗಳೊಂದಿಗೆ ನಾನು ಜಮೀನಿನಲ್ಲಿ ವಾಸಿಸುತ್ತೇನೆ. ಅವರದ್ದೇ ತಟ್ಟೆಯಲ್ಲಿ ಊಟ ಮಾಡಿದ್ದೇನೆ. ನಾನು ಅವರಿಗೆ ಹೊಡೆದೂ ಇಲ್ಲ, ಕೂಡಿಯೂ ಹಾಕಿಲ್ಲ ಎಂದು ಹೇಳಿದ್ದಾನೆ. ಈ ವ್ಯಕ್ತಿಯ ಹೇಳಿಕೆಯ ಬಗೆಗಿನ ಸತ್ಯಾಸತ್ಯತೆ ಇನ್ನೂ ತಿಳಿದುಬಂದಿಲ್ಲ.