ಜಮ್ಮು ಕಾಶ್ಮೀರ ಎಲ್‌ಓಸಿಯಲ್ಲಿ ಪಾಕ್‌ ಫೈರಿಂಗ್‌ : ಇಬ್ಬರು ಭಾರತೀಯ ಸೈನಿಕರಿಗೆ ಗಾಯ

ಜಮ್ಮು : ಜಮ್ಮು ಕಾಶ್ಮೀರದ ರಾಜೋರಿ ಜಿಲ್ಲೆಯ ಗಡಿ ನಿಯಂತ್ರಣ ರೇಖೆಯಲ್ಲಿ ಪಾಕ್‌ ಪಡೆಗಳು ನಡೆಸಿದ ಅಪ್ರಚೋದಿತ ಗುಂಡಿನ ದಾಳಿಗೆ ಇಬ್ಬರು ಭಾರತೀಯ ಸೈನಿಕರು ಗಾಯಗೊಂಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ನೌಶೇರಾ ಸೆಕ್ಟರ್‌ನ ರೊಮಾಲಿ ಧಾರಾ ಪ್ರದೇಶದಲ್ಲಿ ಮುಂಚೂಣಿ ಠಾಣೆಯ ಕಾವಲು ಕರ್ತವ್ಯ ನಿರತರಾಗಿದ್ದ ಸೈನಿಕರು ಶುಕ್ರವಾರ ರಾತ್ರಿ ಪಾಕ್‌ ಪಡೆಗಳ ಅಪ್ರಚೋದಿತ ಗುಂಡಿನ ದಾಳಿಯಲ್ಲಿ ಗಾಯಗೊಂಡರು.

ಶುಕ್ರವಾರ ರಾತ್ರಿ 9 ಗಂಟೆಯ ಸುಮಾರಿಗೆ ಪಾಕ್‌ ಪಡೆಗಳು ಸಣ್ಣ ಶಸ್ತ್ರಾಸ್ತ್ರಗಳನ್ನು ಬಳಸಿಕೊಂಡು ಗುಂಡಿನ ದಾಳಿ ನಡೆಸಿ ಬಳಿಕ ದೊಡ್ಡ ಮಟ್ಟದಲ್ಲಿ ಮೋರ್ಟಾರ್‌ ಶೆಲ್ಲಿಂಗ್‌ ದಾಳಿ ನಡೆಸಿದರು. ಆಗ ಭಾರತೀಯ ಸೈನಿಕರಿಬ್ಬರು ಗಾಯಗೊಂಡರು ಎಂದು ಸೇನಾ ವಕ್ತಾರ ತಿಳಿಸಿದರು.

ಘಟನೆಯನ್ನು ಅನುಸರಿಸಿ ಭಾರತೀಯ ಪಡೆಗಳು ಕೂಡಲೇ ಗುಂಡಿನ ಸಕತ್‌ ಪ್ರತ್ಯುತ್ತರ ನೀಡಿ ಪಾಕ್‌ ಗುಂಡಿನ ಸದ್ದನ್ನು ಅಡಗಿಸಿದವು.

ಶುಕ್ರವಾರ ರಾತ್ರಿ 10.30ರ ವರೆಗೂ ಉಭಯ ಸೇನೆಗಳ ನಡುವೆ ಗುಂಡಿನ ಚಕಮಕಿ ಮುಂದುವರಿದಿತ್ತು ಎಂದು ಸೇನಾ ವಕ್ತಾರ ಹೇಳಿದರು.