ಮುಂಬಯಿ: ಜನಪ್ರಿಯ ಕಿರುತೆರೆ ನಟ ನಿತಿನ್ ಚೌಹಾಣ್ ಆತ್ಮಹ*ತ್ಯೆಗೆ ಶರಣಾಗಿದ್ದಾರೆ. ಅವರು 35 ನೇ ವಯಸ್ಸಿನಲ್ಲೆ ಮುಂಬೈನಲ್ಲಿ ಕಠಿನ ನಿರ್ಧಾರ ತಳೆದಿದ್ದಾರೆ.
‘ಎಂಟಿವಿ ಸ್ಪ್ಲಿಟ್ಸ್‌ವಿಲ್ಲಾ 5’, ‘ಕ್ರೈಮ್ ಪ್ಯಾಟ್ರೋಲ್’ ಮತ್ತು ‘ತೇರಾ ಯಾರ್ ಹೂ ಮೈ’ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡಿದ್ದ ಉತ್ತರ ಪ್ರದೇಶದ ಅಲಿಗಢ್‌ ಮೂಲದ ನಿತಿನ್ ಚೌಹಾಣ್, ರಿಯಾಲಿಟಿ ಶೋ ‘ದಾದಾಗಿರಿ 2’ ಗೆದ್ದ ಬಳಿಕ ಬಾರಿಗೆ ವ್ಯಾಪಕ ಮನ್ನಣೆ ಗಳಿಸಿದ್ದರು. 2022 ರಲ್ಲಿ ಅವರು ಕೊನೆಯ ಬಾರಿ ಪರದೆಯ ಮೇಲೆ ಕಾಣಿಸಿಕೊಂಡಿದ್ದರು.
ನಿತಿನ್ ಚೌಹಾಣ್ ಮುಂಬೈನ ಫ್ಲಾಟ್‌ನಲ್ಲಿ ಗುರುವಾರ ರಾತ್ರಿ(ನ7) ಶವವಾಗಿ ಪತ್ತೆಯಾಗಿದ್ದಾರೆ. ಅವರ ಸಹನಟ ವಿಭೂತಿ ಠಾಕೂರ್ ಅವರ ಸಾಮಾಜಿಕ ಮಾಧ್ಯಮ ಪೋಸ್ಟ್ ಪ್ರಕಾರ, ನಿತಿನ್ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಹೇಳಲಾಗಿದೆ. ಆದಾಗ್ಯೂ, ಹೆಚ್ಚಿನ ವಿವರಗಳನ್ನು ನಿರೀಕ್ಷಿಸಲಾಗುತ್ತಿದ್ದು, ಯಾವ ಕಾರಣಕ್ಕಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಇನ್ನಷ್ಟೇ ತಿಳಿದು ಬರಬೇಕಿದೆ. ಮಗನ ಪಾರ್ಥಿವ ಶರೀರವನ್ನು ಪಡೆಯಲು ನಿತಿನ್ ತಂದೆ ಮುಂಬೈಗೆ ಧಾವಿಸಿದ್ದಾರೆ.
ನಿತಿನ್ ಅವರ ಹಠಾತ್ ನಿಧನವು ಟಿವಿ ಉದ್ಯಮವನ್ನು ಆಘಾತಕ್ಕೆ ತಳ್ಳಿದ್ದು, ಅನೇಕ ಸಹ ನಟರು ಸಹೋದ್ಯೋಗಿಗಳು ಮತ್ತು ಸ್ನೇಹಿತರು ಸಾಮಾಜಿಕ ಮಾಧ್ಯಮದಲ್ಲಿ ತೀವ್ರ ದುಃಖವನ್ನು ವ್ಯಕ್ತಪಡಿಸಿದ್ದಾರೆ. ಸುದೀಪ್ ಸಾಹಿರ್ ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಶ್ರದ್ಧಾಂಜಲಿಯನ್ನು ಪೋಸ್ಟ್ ಮಾಡಿದ್ದು, “ಶಾಂತಿಯಿಂದ ವಿಶ್ರಾಂತಿ ಪಡೆ, ಸ್ನೇಹಿತ” ಎಂದು ಬರೆದುಕೊಂಡಿದ್ದಾರೆ.
