ಧಾರ್ಮಿಕ ಪೂಜೆಗಳಿಗೆ ಬಳಸುವ ತುಳಸಿಯಲ್ಲಿ ಹಲವಾರು ಔಷಧೀಯ ಗುಣಗಳಿವೆ. ಹಲವಾರು ಚಿಕಿತ್ಸಕ ಗುಣಗಳಿಗೆ ಹೆಸರುವಾಸಿಯಾದ ತುಳಸಿಯನ್ನು ಸಾಂಪ್ರದಾಯಿಕ ಔಷಧವಾಗಿ ಬಳಸಲಾಗುತ್ತದೆ.
ಆರೋಗ್ಯವನ್ನು ಉತ್ತೇಜಿಸಲು ಆಯುರ್ವೇದದಲ್ಲಿ ತುಳಸಿಯನ್ನು ಹಲವಾರು ಶತಮಾನಗಳಿಂದ ಬಳಸಲಾಗುತ್ತಿದೆ. ಜ್ವರ, ಕೆಮ್ಮು ಮತ್ತು ಶೀತದಂತಹ ರೋಗಲಕ್ಷಣಗಳನ್ನು ಕಡಿಮೆ ಮಾಡಲು ಅದರ ಜ್ವರನಿವಾರಕ ಗುಣಲಕ್ಷಣಗಳಿಗಾಗಿ ಇದನ್ನು ಪ್ರಾಥಮಿಕವಾಗಿ ಬಳಸಲಾಗುತ್ತದೆ. ತುಳಸಿಯ ವಿವಿಧ ಭಾಗಗಳು ಕೂಡಾ ಔಷಧೀಯ ಗುಣಗಳನ್ನು ಹೊಂದಿವೆ.
ತುಳಸಿ ಹಲವಾರು ಪ್ರಯೋಜನಗಳನ್ನು ಹೊಂದಿದೆ. ಏಕೆಂದರೆ ಇದನ್ನು ಪ್ರತಿಯೊಂದು ಆರೋಗ್ಯ ಸಮಸ್ಯೆಯ ಚಿಕಿತ್ಸೆಯಲ್ಲಿ ಬಳಸಲಾಗುತ್ತದೆ. ಪವಿತ್ರ ಸಸ್ಯ ಎನ್ನುವ ತುಳಸಿ ವಿಶಿಷ್ಟವಾದ ಪರಿಮಳ ಮತ್ತು ರುಚಿ ಹೊಂದಿದೆ. ಆದ್ದರಿಂದ ಹೆಚ್ಚಿನ ಜನರು ರೋಗಗಳ ವಿರುದ್ಧ ಉತ್ತಮ ರೋಗನಿರೋಧಕ ಶಕ್ತಿಯನ್ನು ಹೊಂದಲು ಇದನ್ನು ಸೇವಿಸಲು ಇಷ್ಟಪಡುತ್ತಾರೆ.
ತುಳಸಿಯ ಔಷಧೀಯ ಗುಣಗಳ ಮಾಹಿತಿ ಈ ಕೆಳಗಿನಂತಿವೆ:
ರೋಗನಿರೋಧಕ ಶಕ್ತಿ ಹೆಚ್ಚಿಸುತ್ತದೆ:
ತುಳಸಿಯಲ್ಲಿ ವಿಟಮಿನ್ ಸಿ ಸಮೃದ್ಧವಾಗಿರುವ ಕಾರಣ ನೈಸರ್ಗಿಕ ರೋಗನಿರೋಧಕ ಶಕ್ತಿ ಉತ್ತೇಜಿಸಲು ಸಹಾಯ ಮಾಡುತ್ತದೆ. ತುಳಸಿ ಎಲೆಗಳು ಆಂಟಿಬ್ಯಾಕ್ಟೀರಿಯಲ್, ಆಂಟಿವೈರಲ್ ಮತ್ತು ಆಂಟಿಫಂಗಲ್ ಗುಣಲಕ್ಷಣಗಳನ್ನು ಹೊಂದಿದ್ದು ಅದು ವಿವಿಧ ಸೋಂಕುಗಳ ವಿರುದ್ಧ ರಕ್ಷಣೆ ನೀಡುತ್ತದೆ.
ದುರ್ಬಲವಾಗಿ ಜನಿಸಿದ ಮಕ್ಕಳಿಗೆ ಅಥವಾ ಅವರು ಬೆಳೆದಂತೆ ರೋಗನಿರೋಧಕ ಶಕ್ತಿ ಹೊಂದಿರದ ಮಕ್ಕಳಿಗೆ ಇದನ್ನು ಹೆಚ್ಚು ಶಿಫಾರಸು ಮಾಡಲಾಗುತ್ತದೆ.
ತುಳಸಿಯನ್ನು ದೈನಂದಿನ ದಿನಚರಿಯಲ್ಲಿ ಸೇರಿಸುವುದು ಉತ್ತಮ. ಉದಾಹರಣೆಗೆ ತುಳಸಿ ಚಹಾವನ್ನು ಸೇವಿಸುವುದು ಅಥವಾ ತಾಜಾ ಎಲೆಗಳನ್ನು ಊಟದಲ್ಲಿ ಸೇರಿಸುವುದರಿಂದ ಆರೋಗ್ಯ ಕಾಪಾಡಿಕೊಳ್ಳಬಹುದು. ಚಿಕ್ಕ ಮಕ್ಕಳಿಗೆ ಹುಷಾರಿಲ್ಲದೆ ಇದ್ದಾಗ ತುಳಸಿ ರಸ ಕೊಡುವುದು ಸಾಮಾನ್ಯವಾಗಿ ಕಾಣಬಹುದು.
ಉಸಿರಾಟದ ಸಮಸ್ಯೆ/ ಅಸ್ತಮಾ ನಿವಾರಣೆಗೆ:
ತುಳಸಿ ಕ್ಯಾಂಪೇನ್, ಸಿನಿಯೋಲ್ ಮತ್ತು ಯುಜೆನಾಲ್ ಎಂಬ ಅಂಶಗಳಿಂದ ಸಮೃದ್ಧವಾಗಿದೆ. ತುಳಸಿ ಬ್ರಾಂಕೈಟಿಸ್ ಮತ್ತು ಆಸ್ತಮಾದಂತಹ ಉಸಿರಾಟದ ಕಾಯಿಲೆಗಳಿಗೆ ಚಿಕಿತ್ಸೆ ನೀಡಲು ಸಹಾಯ ಮಾಡುತ್ತದೆ. ಶ್ವಾಸನಾಳದಲ್ಲಿ ಉರಿಯೂತವನ್ನು ಕಡಿಮೆ ಮಾಡುವ ಮೂಲಕ ಆಸ್ತಮಾ ಮತ್ತು ಇತರ ಉಸಿರಾಟದ ಸಮಸ್ಯೆ ನಿರ್ವಹಿಸಲು ಸಹಾಯ ಮಾಡುತ್ತದೆ.
ತುಳಸಿಯಲ್ಲಿರುವ ಕ್ಯಾಂಪೇನ್, ಸಿನಿಯೋಲ್ ಮತ್ತು ಯುಜೆನಾಲ್ ಜನರಲ್ಲಿ ಉಸಿರಾಟದ ತೊಂದರೆಗಳನ್ನು ಕಡಿಮೆ ಮಾಡಲು ಕೆಲಸ ಮಾಡುತ್ತದೆ. ಈ ಅಂಶಗಳು ವಿಶೇಷವಾಗಿ ಉಸಿರಾಟದ ಸಮಸ್ಯೆಗಳಿಗೆ ಚಿಕಿತ್ಸೆ ನೀಡಲು ಹೆಸರುವಾಸಿಯಾಗಿದೆ. ತೀವ್ರ ಉಸಿರಾಟದ ತೊಂದರೆ ಇರುವವರು ದೀರ್ಘಾವಧಿಯ ಪ್ರಯೋಜನ ಪಡೆಯಲು ತುಳಸಿ ಬಳಸುವುದು ಉತ್ತಮ.
ತಲೆನೋವು ಕಡಿಮೆ ಮಾಡುವುದು:
ತಲೆನೋವು ಮತ್ತು ಮೈಗ್ರೇನ್ ಕಡಿಮೆ ಮಾಡಲು ಪ್ರಯೋಜನಕಾರಿಯಾಗಿದೆ. ತುಳಸಿ ಚಹಾ ಸೇವಿಸುವುದು ಅಥವಾ ಅದರ ತೈಲದ ಸ್ವಾದ ತೆಗೆದುಕೊಳ್ಳುವುದರಿಂದ ತಲೆನೋವಿನಂತಹ ರೋಗಲಕ್ಷಣಗಳನ್ನು ನಿವಾರಿಸಿ ವಿಶ್ರಾಂತಿ ಪಡೆಯಲು ಸಹಾಯ ಮಾಡುತ್ತದೆ.
ಜೀರ್ಣಕ್ರಿಯೆ ಮತ್ತು ಇತರ ಹೊಟ್ಟೆಗೆ ಸಂಬಂಧಿಸಿದ ಅನಾರೋಗ್ಯ:
ತುಳಸಿ ಸಮರ್ಥ ಜೀರ್ಣಕ್ರಿಯೆಗೆ ಸಹಾಯ ಮಾಡುತ್ತದೆ. ಇದರ ಕಾರ್ಮಿನೇಟಿವ್ ಎಂಬ ಗುಣಲಕ್ಷಣ ಗ್ಯಾಸ್ ಮತ್ತು ಉಬ್ಬುವಿಕೆ ನಿವಾರಿಸಲು ಸಹಾಯ ಮಾಡುತ್ತದೆ. ತುಳಸಿ ಚಹಾ ಅಥವಾ ತಾಜಾ ತುಳಸಿ ಎಲೆಗಳನ್ನು ನಿಮ್ಮ ಆಹಾರದಲ್ಲಿ ಸೇರಿಸಿಕೊಳ್ಳುವುದು ಜೀರ್ಣಕ್ರಿಯೆಯ ಆರೋಗ್ಯ ಬೆಂಬಲಿಸುತ್ತದೆ.
ಜ್ವರವನ್ನು ಕಡಿಮೆ ಮಾಡುವುದು:
ತುಳಸಿ ಜ್ವರವನ್ನು ಕಡಿಮೆ ಮಾಡಲು ಮತ್ತು ಸಂಬಂಧಿತ ರೋಗಲಕ್ಷಣಗಳನ್ನು ನಿವಾರಿಸಲು ಸಹಾಯ ಮಾಡುತ್ತದೆ. ತುಳಸಿ ಚಹಾ ಅಥವಾ ಕಷಾಯ ಸೇವಿಸುವುದರಿಂದ ದೇಹದ ಉಷ್ಣತೆ ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.
ಅಧಿಕ ರಕ್ತದೊತ್ತಡ ಮತ್ತು ಹೃದ್ರೋಗ:
ತುಳಸಿ ರಕ್ತದೊತ್ತಡ ಮತ್ತು ಕೊಲೆಸ್ಟ್ರಾಲ್ ಮಟ್ಟ ಕಡಿಮೆ ಮಾಡುವ ಮೂಲಕ ಹೃದಯ ಸಮಸ್ಯೆಗಳನ್ನು ನಿರ್ವಹಿಸುವಲ್ಲಿ ಸಹಾಯ ಮಾಡುತ್ತದೆ. ಹೃದಯರಕ್ತನಾಳದ ಆರೋಗ್ಯ ಉತ್ತೇಜಿಸುತ್ತದೆ. ತುಳಸಿ ಚಹಾ ಅಥವಾ ತುಳಸಿ ರಸ ನಿಯಮಿತವಾಗಿ ಸೇವಿಸುವುದರಿಂದ ಹೃದ್ರೋಗದ ಅಪಾಯವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.
ಕಣ್ಣಿನ ಆರೋಗ್ಯ:
ತುಳಸಿ ಎಲೆಗಳು ವಿಟಮಿನ್ ಸಿ ಮತ್ತು ಇತರ ಪೋಷಕಾಂಶಗಳಂತಹ ಉತ್ಕರ್ಷಣ ನಿರೋಧಕಗಳನ್ನು ಹೊಂದಿದೆ. ಇದು ಆಕ್ಸಿಡೇಟಿವ್ ಒತ್ತಡ ಕಡಿಮೆ ಮಾಡುವ ಮೂಲಕ ಕಣ್ಣಿನ ಆರೋಗ್ಯ ಉತ್ತೇಜಿಸುತ್ತದೆ. ತಣ್ಣಗಾದ ತುಳಸಿ ಚಹಾದಿಂದ ಕಣ್ಣುಗಳನ್ನು ತೊಳೆಯುವುದು ಅಥವಾ ತುಳಸಿ ತುಂಬಿದ ಕಣ್ಣಿನ ಹನಿಗಳನ್ನು ಹಚ್ಚುವುದರಿಂದ ಕಣ್ಣುಗಳಿಗೆ ಹಿತವಾದ ಪರಿಹಾರ ಮತ್ತು ಪೋಷಣೆ ನೀಡುತ್ತದೆ.
ಗಂಭೀರವಾದ ಕಣ್ಣು ನೋವು ಕಣ್ಣಿನ ಪೊರೆಗಳು ಅಥವಾ ಕಣ್ಣಿನ ಸೋಂಕುಗಳಿಗೆ ವೈದ್ಯರನ್ನು ಸಂಪರ್ಕಿಸುವುದು ಅತ್ಯಗತ್ಯ.
ಮಲೇರಿಯಾ ನಿವಾರಿಸಲು:
ತುಳಸಿ ಮಲೇರಿಯಾ ವಿರೋಧಿ ಗುಣಗಳನ್ನು ಹೊಂದಿದೆ. ತುಳಸಿ ಎಲೆಗಳು ಅಥವಾ ರಸಗಳನ್ನು ಸೇವಿಸುವುದರಿಂದ ಮಲೇರಿಯಾ ರೋಗಲಕ್ಷಣಗಳ ತೀವ್ರತೆ ಕಡಿಮೆ ಮಾಡಲು ಮತ್ತು ಚೇತರಿಕೆಗೆ ಸಹಾಯ ಮಾಡಬಹುದು.
ಮಲೇರಿಯಾದ ಸರಿಯಾದ ಚಿಕಿತ್ಸೆಗಾಗಿ ವೈದ್ಯರನ್ನು ಸಂಪರ್ಕಿಸುವುದು ಅಗತ್ಯ.
ಮೂತ್ರಪಿಂಡದ ಕಲ್ಲುಗಳ ಚಿಕಿತ್ಸೆ:
ತುಳಸಿ ರಸ ಮೂತ್ರದ ಉತ್ಪಾದನೆ ಹೆಚ್ಚಿಸುವ ಮೂಲಕ ಮತ್ತು ಕಲ್ಲುಗಳನ್ನು ಹೊರಹಾಕುವ ಮೂಲಕ ಮೂತ್ರಪಿಂಡದ ಕಲ್ಲುಗಳ ಚಿಕಿತ್ಸೆಯಲ್ಲಿ ಸಹಾಯ ಮಾಡುತ್ತದೆ. ತುಳಸಿ ಚಹಾವನ್ನು ಕುಡಿಯುವುದು ಅಥವಾ ತುಳಸಿ ಎಲೆಗಳನ್ನು ನಿಯಮಿತವಾಗಿ ಸೇವಿಸುವುದು ಮೂತ್ರಪಿಂಡದ ಆರೋಗ್ಯ ಕಾಪಾಡಲು ಮತ್ತು ಕಲ್ಲು ರಚನೆಯನ್ನು ತಡೆಯುತ್ತದೆ.
ಕೀಟಗಳ ಕಡಿತದಿಂದ ಮುಕ್ತಿ:
ತುಳಸಿ ಕೀಟಗಳ ಕಡಿತಕ್ಕೆ ಚಿಕಿತ್ಸೆ ನೀಡಲು ಸಹಾಯ ಮಾಡುತ್ತದೆ. ಡೆಂಗ್ಯೂ, ಮಲೇರಿಯಾ ಮುಂತಾದ ರೋಗಗಳಿಂದ ನಮ್ಮನ್ನು ರಕ್ಷಿಸುತ್ತದೆ. ಕೀಟಗಳು ಮತ್ತು ಸೊಳ್ಳೆಗಳನ್ನು ದೂರವಿರಿಸಲು ಇದನ್ನು ಬಳಸಲಾಗುತ್ತದೆ.
ಗಂಟಲು ನೋವಿನಿಂದ ಮುಕ್ತಿ:
ಜನರಲ್ಲಿ ಗಂಟಲು ನೋವು ಮತ್ತು ಗಲಗ್ರಂಥಿಯ ಉರಿಯೂತ ಗುಣಪಡಿಸಲು ತುಳಸಿಯನ್ನು ಬಳಸಲಾಗುತ್ತದೆ. ತುಳಸಿ ಅಡಾಪ್ಟೋಜೆನ್ ಆಗಿ ಕಾರ್ಯನಿರ್ವಹಿಸುತ್ತದೆ. ಹೆಚ್ಚಿನ ಬ್ಯಾಕ್ಟೀರಿಯಾ ವಿರೋಧಿ ಗುಣಗಳನ್ನು ಹೊಂದಿದೆ. ನೋಯುತ್ತಿರುವ ಗಂಟಲಿಗೆ ಚಿಕಿತ್ಸೆ ನೀಡಲು ಇದು ಅತ್ಯಂತ ಪರಿಣಾಮಕಾರಿ ಮನೆಮದ್ದು.
ಮಧುಮೇಹದ ವಿರುದ್ಧ ಹೋರಾಡಲು:
ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನ ಜನರು ತಮ್ಮ ಜೀವನಶೈಲಿಯಿಂದಾಗಿ ಮಧುಮೇಹ ಪೂರ್ವ ಅಥವಾ ಮಧುಮೇಹ ಹೊಂದಿರುತ್ತಾರೆ. ತುಳಸಿ ಎಲೆಗಳು ಟೈಪ್ 2 ಡಯಾಬಿಟಿಸ್ ನಿರ್ವಹಣೆಗೆ ಹೆಸರುವಾಸಿಯಾಗಿದೆ.
ಮಧುಮೇಹ ಪೂರ್ವ ವ್ಯಕ್ತಿ ಪ್ರತಿದಿನ ತುಳಸಿ ಚಹಾ ಸೇವಿಸಿದರೆ ದೇಹದಲ್ಲಿನ ಮಧುಮೇಹ ರೋಗಲಕ್ಷಣಗಳನ್ನು ಹಿಮ್ಮೆಟ್ಟಿಸಲು ಸಾಧ್ಯವಾಗುತ್ತದೆ.
ಹಲ್ಲು, ಬಾಯಿಯ ಆರೋಗ್ಯ ಸುಧಾರಣೆಗೆ:
ತುಳಸಿಯ ಎಲೆಗಳು ಆ್ಯಂಟಿಮೈಕ್ರೊಬಿಯಲ್ ಗುಣಗಳನ್ನು ಹೊಂದಿದ್ದು, ಅದು ಬಾಯಿಯಲ್ಲಿನ ಬ್ಯಾಕ್ಟೀರಿಯಾ ವಿರುದ್ಧ ಹೋರಾಡುತ್ತದೆ. ತುಳಸಿ ಬಳಕೆಯಿಂದ ಬಾಯಿಯ ದುರ್ವಾಸನೆ ತಡೆಗಟ್ಟುವಿಕೆ ಕೂಡ ಸೇರಿದೆ.
ಇದು ಮಾತ್ರವಲ್ಲದೇ ತುಳಸಿ ಇನ್ನೂ ಹಲವಾರು ಆರೋಗ್ಯ ಸಮಸ್ಯೆಗಳಿಗೆ ಹಾಗೂ ಅದರ ಜೊತೆಗೆ ಕೂದಲಿನ ಹಲವಾರು ಸಮಸ್ಯೆಗಳಿಗೂ ಪರಿಹಾರ ನೀಡುತ್ತದೆ. ತುಳಸಿಯನ್ನು ಇತರ ಔಷಧಿಗಳು, ತೈಲಗಳು, ಗಿಡಮೂಲಿಕೆಗಳು ಇತ್ಯಾದಿಗಳೊಂದಿಗೆ ಬೆರೆಸಿದಾಗ, ಯಾವುದೇ ಸಮಸ್ಯೆಯನ್ನು ಸುಲಭವಾಗಿ ಗುಣಪಡಿಸುತ್ತದೆ.
-ಕಾವ್ಯಶ್ರೀ 