ನಾಲಗೆ ಕತ್ತರಿಸಿದ್ರೂ ರಕ್ತ ಚಿಮ್ಮಿಲ್ಲ; ಹಸುಗಳ ನಿಗೂಢ ಸಾವು

ಟೆಕ್ಸಾಸ್‌: ಅಮೆರಿಕದ ಟೆಕ್ಸಾಸ್‌ನ ಗ್ರಾಮೀಣ ಭಾಗದಲ್ಲಿ ನಾಲಗೆಗಳು ಕತ್ತರಿಸಲ್ಪಟ್ಟ ಸ್ಥಿತಿಯಲ್ಲಿ 6 ಹಸುಗಳ ಮೃತದೇಹಗಳು ಪತ್ತೆಯಾಗಿವೆ. ಅಚ್ಚರಿಯೆಂದರೆ, ಈ ಎಲ್ಲ ಹಸುಗಳ ನಾಲಗೆ ಗಳೂ ಕತ್ತರಿಸಲ್ಪಟ್ಟಿದ್ದು, ಒಂದೇ ಒಂದು ಹನಿ ರಕ್ತವೂ ಚೆಲ್ಲಿರುವ ಕುರುಹುಗಳಿಲ್ಲ.

ಹೀಗಾಗಿ, ಈ ಪ್ರಕರಣವು ಪೊಲೀಸರನ್ನು ಚಿಂತೆಗೀಡು ಮಾಡಿದೆ. ಮೊದಲಿಗೆ ವ್ಯಕ್ತಿಯೊಬ್ಬರು ತಮ್ಮ ಹೊಲದಲ್ಲಿ 6 ವರ್ಷ ವಯಸ್ಸಿನ ಹಸುವೊಂದು ಸತ್ತುಬಿದ್ದಿರುವ ಬಗ್ಗೆ ಮಾಹಿತಿ ನೀಡಿದರು. ಅದಾದ ಬಳಿಕ ಟೆಕ್ಸಾಸ್‌ನ ವಿವಿಧ ಸ್ಥಳಗಳಿಂದ ಇಂಥದ್ದೇ ದೂರುಗಳು ಬಂದಿದ್ದು, ಒಟ್ಟು 6 ಹಸುಗಳ ಮೃತದೇಹ ಪತ್ತೆಯಾಗಿದೆ.

ಎಲ್ಲ ಹಸುಗಳ ನಾಲಗೆಗಳನ್ನೂ ಸಂಪೂರ್ಣ ವಾಗಿ ಕತ್ತರಿಸಿ ತೆಗೆಯಲಾಗಿದೆ. ಆದರೆ ಎಲ್ಲೂ ರಕ್ತ ಸುರಿದಿಲ್ಲ, ಹುಲ್ಲು ಹಾಸಿನಲ್ಲಿನ ಹುಲ್ಲುಗಳೂ ಅಲುಗಾಡಿಲ್ಲ, ಆ ಪ್ರದೇಶ ದಲ್ಲಿ ಮನುಷ್ಯರ ಹೆಜ್ಜೆ ಗುರುತಾಗಲೀ, ವಾಹನದ ಟೈರ್‌ನ ಅಚ್ಚಾಗಲೀ ಮೂಡಿಲ್ಲ ಎಂದೂ ಪೊಲೀಸರು ತಿಳಿಸಿದ್ದಾರೆ.