Chrome Browser: ಗೂಗಲ್‌ ಸರ್ಚ್‌ ಎಂಜಿನ್‌ ಕ್ರೋಮ್‌ ಮಾರಾಟ?

ವಾಷಿಂಗ್ಟನ್‌: ವಿಶ್ವದ ಅತಿಜನಪ್ರಿಯ ಅಂತರ್ಜಾಲ ಸರ್ಚ್‌ ಎಂಜಿನ್‌ “ಗೂಗಲ್‌ ಕ್ರೋಮ್‌’ನ್ನು ಅಮೆರಿಕದ ಅಧಿಕಾರಿಗಳು ಒತ್ತಾಯಪೂರ್ವಕವಾಗಿ ಮಾರಾಟ ಮಾಡಿಸುವ ಸಾಧ್ಯತೆ ಇದೆ. ಅಂತರ್ಜಾಲದಲ್ಲಿ ಗೂಗಲ್‌ ಸರ್ಚ್‌ ಎಂಜಿನ್‌ ಕ್ರೋಮ್‌ ಮಾರುಕಟ್ಟೆಯಲ್ಲಿ ಏಕಸ್ವಾಮ್ಯವನ್ನು ಸಾಧಿಸಿರುವ ಹಿನ್ನೆಲೆಯಲ್ಲಿ ಅಮೆರಿಕದ ನ್ಯಾಯಾಂಗ ಇಲಾಖೆ ಅಧಿಕಾರಿಗಳು ಒತ್ತಾಯಪೂರ್ವಕವಾಗಿ ಮಾರಾಟ ಮಾಡಿಸಲು ಅಲ್ಲಿನ ಸುಪ್ರೀಂಕೋರ್ಟ್‌ಗೆ ಕಳೆದ ತಿಂಗಳು ಪ್ರಸ್ತಾವನೆ ಸಲ್ಲಿಸಿದ್ದಾರೆ ಎನ್ನಲಾಗಿದೆ.

ಅಮೆರಿಕದಲ್ಲಿ ವ್ಯಾಪಾರ ಏಕಸ್ವಾಮ್ಯಕ್ಕೆ ಅವಕಾಶವಿಲ್ಲ. ಆದರೆ ಗೂಗಲ್‌ ಕ್ರೋಮ್‌ ಸರ್ಚ್‌ ಎಂಜಿನ್‌ ಮಾರುಕಟ್ಟೆಯಲ್ಲಿ ಜಗತ್ತಿನಾದ್ಯಂತ ಶೇ.90 ಹಿಡಿತವನ್ನು ಹೊಂದಿದೆ. ಒಂದು ವೇಳೆ ಅಲ್ಲಿನ ಕೋರ್ಟ್‌ ಮಾರಾಟ ಪ್ರಸ್ತಾವನೆಯನ್ನು ಒಪ್ಪಿಕೊಂಡರೆ ಗೂಗಲ್‌ ಕ್ರೋಮ್‌ ಮೂಲ ಕಂಪನಿ ಅಲ್ಫಾಬೆಟ್‌ ತನ್ನ ಸರ್ಚ್‌ ಎಂಜಿನ್‌ ಮಾರಾಟ ಮಾಡುವುದು ಅನಿವಾರ್ಯವಾಗಲಿದೆ. ಕಂಪನಿಯ ಮೌಲ್ಯ 1.6 ಲಕ್ಷ ಕೋಟಿ ರೂ. (20 ಬಿಲಿಯನ್‌ ಡಾಲರ್‌) ಎಂದು ಅಂದಾಜಿಸಲಾಗಿದೆ. ಟ್ರಂಪ್‌ ಮೊದಲ ಅವಧಿಯಿಂದ ಹಿಡಿದು ಈಗಿನ ಜೋ ಬಿಡೆನ್‌ ಕಾಲದವರೆಗೆ ಗೂಗಲ್‌ ಕಾನೂನು ಹೋರಾಟವನ್ನು ಎದುರಿಸುತ್ತಲೇ ಇದೆ. ಜತೆಗೆ ಈ ವಿಚಾರದಲ್ಲಿ ಯಾವುದೇ ಕಾನೂನು ಹೋರಾಟಕ್ಕೆ ಸಿದ್ಧ ಎಂದು ಗೂಗಲ್‌ ಉನ್ನತ ಅಧಿಕಾರಿಗಳು ತಿಳಿಸಿದ್ದಾರೆ.