ಟೋಕಿಯೊ ಒಲಿಂಪಿಕ್ಸ್‌ ಗೆ ಅರ್ಹತೆ  ಪಡೆದ ಮುರಳಿ ಶ್ರೀಶಂಕರ್‌

ಪಟಿಯಾಲಾ: ಫೆಡರೇಶನ್‌ ಕಪ್‌ ಸೀನಿಯರ್‌ ನ್ಯಾಶನಲ್‌ ಆ್ಯತ್ಲೆಟಿಕ್ಸ್‌ನಲ್ಲಿ ಆಮೋಘ ನಿರ್ವಹಣೆ ತೋರಿದ ಲಾಂಗ್‌ಜಂಪರ್‌ ಮುರಳಿ ಶ್ರೀಶಂಕರ್‌ ಟೋಕಿಯೊ ಒಲಿಂಪಿಕ್ಸ್‌ ಅರ್ಹತೆ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ.

ಶ್ರೀಶಂಕರ್‌ 8.26 ಮೀ. ದೂರ ನೆಗೆದು ತಮ್ಮದೇ ರಾಷ್ಟ್ರೀಯ ದಾಖಲೆಯನ್ನು ಉತ್ತಮಪಡಿಸಿದರು. ಪುರುಷರ ವಿಭಾಗದಲ್ಲಿ ಒಲಿಂಪಿಕ್ಸ್‌ ಅರ್ಹತಾ ಮಾನದಂಡ 8.22 ಮೀಟರ್‌ ಆಗಿದೆ.

ಕೇರಳದ ಆ್ಯತ್ಲೀಟ್‌ ಆಗಿರುವ 21 ವರ್ಷದ ಮುರಳಿ ಶ್ರೀಶಂಕರ್‌ 5ನೇ ಪ್ರಯತ್ನದಲ್ಲಿ 8.26 ಮೀಟರ್‌ ದಾಖಲಿಸಿದರು. ಕೇರಳದ ಮತ್ತೋರ್ವ ಜಂಪರ್‌ ಮುಹಮ್ಮದ್‌ ಅನೀಸ್‌ ಯಾಹಿಯ ಬೆಳ್ಳಿ (8 ಮೀ.), ಕರ್ನಾಟಕದ ಎಸ್‌. ಲೋಕೇಶ್‌ ಕಂಚು (7.60 ಮೀ.) ಗೆದ್ದರು.