ಕೋಸ್ಟಲ್‌ವುಡ್‌ನ‌ಲ್ಲಿ ಇಂದು ತುಳು ಚಿತ್ರ ಶತೋತ್ಸವ

ಮಹಾನಗರ: ಕೋಸ್ಟಲ್‌ವುಡ್‌ ಚಿತ್ರರಂಗಕ್ಕೀಗ ಶತಕ ತಲುಪಿದ ಸಂಭ್ರಮ. ಈ ಹಿನ್ನೆಲೆಯಲ್ಲಿ ತುಳು ಚಿತ್ರ ಶತೋತ್ಸವಕ್ಕೆ ಮಂಗಳೂರು ಸಜ್ಜಾಗಿದೆ. ಜ. 27ರಂದು ಬೆಳಗ್ಗೆ 10ರಿಂದ ರಾತ್ರಿ 10ರ ವರೆಗೆ ತುಳು ಸಿನೆಮಾ ಸಂಬಂಧಿತ ವಿವಿಧ ಕಾರ್ಯಕ್ರಮಗಳು ನಗರದ ನೆಹರೂ ಮೈದಾನದಲ್ಲಿ ಜರಗಲಿವೆ.

ಕೋಸ್ಟಲ್‌ವುಡ್‌ ಕಲಾವಿದರ ಮತ್ತು ತಂತ್ರಜ್ಞರ ಒಕ್ಕೂಟದ ವತಿಯಿಂದ ಈ ತುಳು ಚಿತ್ರ ಶತೋತ್ಸವ ನಡೆಯಲಿದೆ. ಹಲವು ಸಮಯಗಳಿಂದಲೇ ಈ ಉತ್ಸವ ಕ್ಕಾಗಿ ತಯಾರಿಗಳು ನಡೆದಿವೆ. ಶನಿವಾರ ಮಧ್ಯಾಹ್ನದ ವೇಳೆಗೆ ತಯಾರಿ ಬಹುತೇಕ ಪೂರ್ಣಗೊಂಡಿದೆ. ರವಿವಾರ ನಿರಂತರ ಸಭಾ ಕಾರ್ಯಕ್ರಮ, ಸಮ್ಮಾನ, ಮನೋ ರಂಜನ ಕಾರ್ಯಕ್ರಮಗಳು ನಡೆಯಲಿವೆ. ಕೋಸ್ಟಲ್‌ವುಡ್‌ನ‌ ಸಂಭ್ರಮಕ್ಕೆ ಸ್ಯಾಂಡಲ್‌ವುಡ್‌ನ‌ ಕೆಲವು ನಟ- ನಟಿಯರೂ ಭಾಗವಹಿಸುವುದು ಕಾರ್ಯಕ್ರಮದ ಅಂದ ಹೆಚ್ಚಿಸಲಿದೆ.

ವಿಶಾಲ ವೇದಿಕೆ
ಕಾರ್ಯಕ್ರಮಕ್ಕಾಗಿ ನೆಹರೂ ಮೈದಾನ ದಲ್ಲಿ ವಿಶಾಲ ವೇದಿಕೆಯನ್ನು ಸಿದ್ಧಗೊಳಿಸ ಲಾಗಿದೆ. 60 ಅಡಿ ಅಗಲ, 40 ಅಡಿ ಉದ್ದ ಹೊಂದಿರುವ ವೇದಿಕೆ ತುಳು ಚಿತ್ರ ಶತೋತ್ಸವಕ್ಕೆ ಸಾಕ್ಷಿಯಾಗಲಿದೆ. ಕಾರ್ಯ ಕ್ರಮದಲ್ಲಿ ಸುಮಾರು 3 ಸಾವಿರ ಮಂದಿ ಭಾಗವಹಿಸುವ ನಿರೀಕ್ಷೆ ಇದ್ದು, ಎರಡು ಸಾವಿರದಷ್ಟು ಆಸನ ವ್ಯವಸ್ಥೆಯನ್ನು ಮಾಡಲಾಗಿದೆ. ಬಿಸಿಲಿನಿಂದ ರಕ್ಷಿಸಿಕೊಳ್ಳಲು ಶಾಮಿಯಾನ ಅಳವಡಿಸಲಾಗಿದೆ. ಸ್ವಯಂ ಸೇವಕರು, ಅತಿಥಿಗಳಿಗೆ ಮಧ್ಯಾಹ್ನದ ಊಟದ ವ್ಯವಸ್ಥೆ ಇರಲಿದೆ ಎಂದು ಒಕ್ಕೂಟದ ಗೌರವಾಧ್ಯಕ್ಷ ಕಿಶೋರ್‌ ಡಿ. ಶೆಟ್ಟಿ ತಿಳಿಸಿದ್ದಾರೆ.

100 ಮಂದಿಗೆ ಸಮ್ಮಾನ
‘ತುಳು ಚಿತ್ರ ಶತೋತ್ಸವ’ದಲ್ಲಿ ತುಳು ಚಿತ್ರದ ನಿರ್ಮಾಪಕರು, ನಿರ್ದೇಶಕರು, ಕಲಾವಿದರು, ತಂತ್ರಜ್ಞರ ಸಹಿತ 100 ಮಂದಿಗೆ ಸಮ್ಮಾನ ನಡೆಯಲಿದೆ. ಅಲ್ಲದೆ, ರಾಷ್ಟ್ರ, ರಾಜ್ಯ ಮಟ್ಟದ ಪ್ರಶಸ್ತಿ ಪಡೆದ ತುಳು ಚಿತ್ರ ನಿರ್ಮಾಪಕರು, ನಿರ್ದೇಶಕರು, ಕಲಾವಿರನ್ನು ಗೌರವಿಸುವ ಕಾರ್ಯಕ್ರಮವೂ ಇದೆ.

ಬೆಳಗ್ಗೆ 9.45ಕ್ಕೆ ಧ್ವಜಾರೋಹಣ, 10 ಗಂಟೆಗೆ ಉದ್ಘಾಟನೆ ನಡೆಯಲಿದೆ. 11ಕ್ಕೆ ನಿರ್ಮಾಪಕರು, ನಿರ್ದೇಶಕರು ಹಾಗೂ ಚಿತ್ರಮಂದಿರ ಮಾಲಕರು, ವ್ಯವಸ್ಥಾಪಕರಿಗೆ ಅಭಿನಂದನೆ, ಮಧ್ಯಾಹ್ನ 12 ಗಂಟೆಗೆ ತುಳುಚಿತ್ರದ ಬೆಳವಣಿಗೆ ಬಗ್ಗೆ ಸಂವಾದ, 2ಕ್ಕೆ ವಿದ್ಯಾರ್ಥಿಗಳಿಗೆ ಚಿತ್ರರಂಗದ ಬಗ್ಗೆ ರಸಪ್ರಶ್ನೆ, 3ಕ್ಕೆ ಅಭಿನಂದನೆ, ಸಂಜೆ 4 ಗಂಟೆಗೆ ರಸಮಂಜರಿ, 5ಕ್ಕೆ ಸಾಂಸ್ಕೃತಿಕ ಕಾರ್ಯಕ್ರಮ, 6ಕ್ಕೆ ತುಳು ಚಿತ್ರ ತಾರೆಯರಿಂದ ಮನೋರಂಜನ ಕಾರ್ಯಕ್ರಮ ನಡೆಯಲಿದೆ. ಸಂಜೆ 6.30ಕ್ಕೆ ಕರ್ನಾಟಕ ಪ್ರಾದೇಶಿಕ ಚಲನಚಿತ್ರ ನಿರ್ಮಾಪಕರ ಸಂಘದ ಉದ್ಘಾಟನೆ, 7 ಗಂಟೆಗೆ ಸಮಾರೋಪ ನಡೆಯಲಿದೆ.

ಎನ್ನ ತಂಗಡಿಯಿಂದ ಕರ್ಣೆವರೆಗೆ
1971ರಲ್ಲಿ ತೆರೆಕಂಡ ‘ಎನ್ನ ತಂಗಡಿ’ ಚಿತ್ರದಿಂದ ಮೊದಲ್ಗೊಂಡು 2018ರಲ್ಲಿ ತೆರೆ ಕಂಡ ‘ಕರ್ಣೆ’ ಚಿತ್ರದವರೆಗೆ ಸುಮಾರು 48 ವರ್ಷಗಳಲ್ಲಿ ಕೋಸ್ಟಲ್‌ವುಡ್‌ ನಡೆದು ಬಂದ ದಾರಿ ಅದ್ಭುತ. ಪ್ರಾದೇಶಿಕ ಭಾಷಾ ಚಲನಚಿತ್ರವನ್ನು ವಿದೇಶಗಳಲ್ಲಿ ಯೂ ಪಸ ರಿಸಿ ಯಶಸ್ವಿಯಾದ ಖ್ಯಾತಿ ತುಳು ಚಿತ್ರರಂಗಕ್ಕಿದೆ. ಲಭ್ಯ ತಂತ್ರಜ್ಞಾನಗಳನ್ನೇ ಬಳಸಿ ಕೊಂಡು ಅಭಿಮಾನಿಗಳ ಮನಸ್ಸಿಗೆ ಮುದ ನೀಡುವಂತಹ ಚಿತ್ರಗಳನ್ನೇ ನೀಡುತ್ತಾ ಬೆಳೆದ ಚಿತ್ರರಂಗ, ಆಧುನಿಕ ತಂತ್ರಜ್ಞಾನ ಯುಗವನ್ನೂ ಸಮರ್ಥವಾಗಿ ಬಳಸಿ ಕೊಂಡು ಅತ್ಯುತ್ತಮ ಚಿತ್ರಗಳನ್ನು ನೀಡುವ ಮೂಲಕ ಚಿತ್ರರಂಗದಲ್ಲಿ ಹೊಸಚರಿತ್ರೆ ಯನ್ನೇ ನಿರ್ಮಿಸಿದೆ. ಹಾಗೆ ಬಿಡುಗಡೆಗೊಂಡ ಚಿತ್ರಗಳ ಸಂಖ್ಯೆ ಈಗ ನೂರಾಗಿದೆ.