ಮಳೆಗಾಲ ಗಿಡಗಳ ಆರೈಕೆಗೆ ಸಕಾಲ

ಮಳೆಗಾಲ ಇನ್ನೇನು ಆರಂಭವಾಗುತ್ತಿದೆ. ಬಿಸಿಲಿನಿಂದ ಬಾಡಿ ಹೋಗಿರುವ ಗಿಡಗಳೆಲ್ಲ ಚಿಗುರಿ ಮತ್ತೆ ಹೂವರಳಿಸಿ ನಿಲ್ಲುವ ಸಮಯ. ಗಾರ್ಡನ್‌ ಪ್ರಿಯರಂತೂ ಈ ಸಮಯದಲ್ಲಿ ಹೂ ಗಿಡಗಳ ಹಿಂದೆಯೇ ಸುತ್ತುತ್ತಿರುತ್ತಾರೆ. ಆದರೆ ಮಳೆಗಾಲದಲ್ಲಿ ಗಿಡಗಳು ಬೆಳೆದಟ್ಟು ಹಾನಿಯಾಗುವ ಸಂಭವಗಳೂ ಅಧಿಕವಾಗಿರುತ್ತವೆ. ಅವುಗಳನ್ನು ಸಂರಕ್ಷಿಸಲು ಇಲ್ಲಿದೆ ಕೆಲವು ಸಿಂಪಲ್‌ ಟಿಪ್ಸ್‌ಗಳು.

 ನೀರು ಹಾಕುವಾಗ ಗಮನಿಸಿ. ಹೆಚ್ಚಿನ ವೇಳೆಗಳಲ್ಲಿ ಹೂ ಗಿಡಗಳ ಬುಡದಲ್ಲಿ ಮಳೆ ನೀರಿರುತ್ತದೆ. ಅಗತ್ಯವಿದ್ದರೆ ಮಾತ್ರ ನೀರು ಹಾಕಿ. ಕಾಂಡ ಕೊಳೆಯುವ ಸಾಧ್ಯತೆಯಿರುತ್ತದೆ.

ಬುಡದಲ್ಲಿ ನೀರು ಕಟ್ಟಿನಿಲ್ಲದಂತೆ ನೋಡಿಕೊಳ್ಳಬೇಕು.

 ಹುಳಗಳು ಗಿಡಗಳಲ್ಲಿವೆಯೇ ಎಂದು ದಿನನಿತ್ಯ ಪರೀಕ್ಷಿಸಿಕೊಳ್ಳಬೇಕು. ಹುಳಗಳಿದ್ದರೆ ಕೀಟನಾಶಕಗಳನ್ನು ಸಿಂಪಡಿಸಿ. (ಜೈವಿಕ ಕೀಟನಾಶಕವಾದರೆ ಉತ್ತಮ).

 ಎರೆಹುಳಗಳು ಮಣ್ಣಲಿದ್ದರೆ ಉತ್ತಮ. ಅವುಗಳು ಮಣ್ಣು ನೀರನ್ನು ಚೆನ್ನಾಗಿ ಹೀರಿಕೊಳ್ಳಲು ಸಹಾಯ ಮಾಡುತ್ತವೆ.

 ಕೀಟನಾಶಕಗಳನ್ನು ಅಗತ್ಯವಿದ್ದರೆ ಮಾತ್ರ ಹಾಕಬೇಕು. ಬೆಳಗ್ಗೆ 6 ರಿಂದ 11 ಗಂಟೆಯವರೆಗೆ ಸೂಕ್ತ ಸಮಯ.

 ಓಪನ್‌ ಗಾರ್ಡನ್‌ ಅನ್ನು ಮಳೆಯಿಂದ ರಕ್ಷಿಸಲು ಪ್ಲಾಸ್ಟಿಕ್‌ ಕವರ್‌ ಅಥವಾ ಟರ್ಪಾಲ್‌ಗ‌ಳನ್ನು ಬಳಸಬೇಡಿ.
ಬದಲಾಗಿ ಪರ್‌ಫೋರ್ಟೆಡ್‌ ಷೀಟ್‌ಗಳನ್ನು ಬಳಸಿ. ಇದರಿಂದ ನೀರು ಹನಿಹನಿಯಾಗಿ ಗಿಡಗಳ ಮೇಲೆ ಬೀಳುತ್ತವೆ. ಇದು ಗಿಡಗಳಿಗೆ ಉತ್ತಮ ವಾಗಿರುತ್ತದೆ.

 ಹೂದೋಟ ದಲ್ಲಿರುವ ಸಣ್ಣ ಗಿಡಗಳನ್ನು ಮಳೆಯಿಂದ ಆದಷ್ಟು ರಕ್ಷಿಸುವುದು ಅಗತ್ಯ.

 ಗಿಡಗಳ ಕೊಂಬೆ ರೆಂಬೆಗಳು ಉದ್ದವಾಗಿ ಬೆಳೆದಿದ್ದರೆ ಅದನ್ನು ಕತ್ತರಿಸಬೇಕು. ಇದರಿಂದ ಅವುಗಳು ಮತ್ತೆ ಆರೋಗ್ಯವಾಗಿ ಬೆಳವಣಿಗೆ ಹೊಂದುವುದರ ಜತೆಗೆ ಹೂಗಳು ಬೇಗ ಚಿಗುರುತ್ತವೆ.

 ಗಿಡಗಳು ಬೆಳೆದಂತೆ ಹೂದೋಟದಲ್ಲಿ ಅನಗತ್ಯವಾದ ಹುಲ್ಲುಗಳು ಬೆಳೆಯುತ್ತವೆ. ಅವುಗಳನ್ನು ಬುಡಸಮೇತ ಕಿತ್ತು ಹಾಕಿ. ಇಲ್ಲದಿದ್ದರೆ ಅವುಗಳು ಮತ್ತೆ ಬೆಳೆಯುವ ಸಾಧ್ಯತೆಗಳಿರುತ್ತವೆ.

 ದೊಡ್ಡ ದೊಡ್ಡ ಮರಗಳು ಹೋದೋಟದ ಬದಿಯಲ್ಲಿದ್ದರೆ ಅವುಗಳ ರೆಂಬೆ ಮಳೆಗಾಲದ
ಆರಂಭದಲ್ಲೇ ಕತ್ತರಿಸಬೇಕು. ಇಲ್ಲದಿದ್ದರೆ ಗಿಡಗಳಿಗೆ ಹಾನಿಯಾಗುವ ಸಾಧ್ಯತೆಯಿದೆ.

–  ಸುಶ್ಮಿತಾ ಶೆಟ್ಟಿ ಸಿರಿಬಾಗಿಲು