ಹೆಣ್ಣು ಹುಲಿ, ಎರಡು ಮರಿಗಳ ಶವ ಪತ್ತೆ: ತನಿಖೆಗೆ ಆದೇಶ

ಚಂದ್ರಾಪುರ : ಮಹಾರಾಷ್ಟ್ರದ ಚಂದ್ರಾಪುರ ಜಿಲ್ಲೆಯಲ್ಲಿ ಇಂದು ಸೋಮವಾರ ಬೆಳಗ್ಗೆ ಒಂದು ಹೆಣ್ಣು ಹುಲಿ ಮತ್ತು ಅದರ ಎರಡು ಮರಿಗಳು ಸತ್ತು ಬಿದ್ದಿರುವುದು ಪತ್ತೆಯಾಗಿದೆ.

ಚಿಮೂರ್‌ ಅರಣ್ಯ ವಲಯ ವ್ಯಾಪ್ತಿಗೆ ಒಳಪಡುವ ಮೇಟೇಪುರ ಗ್ರಾಮದಲ್ಲಿನ ಗಟಾರಕ್ಕೆ ಸಮೀಪ ಹುಲಿಗಳು ಸತ್ತು ಬಿದ್ದಿರುವುದನ್ನು ಗ್ರಾಮಸ್ಥರು ಗಮನಿಸಿ ಮಾಹಿತಿ ನೀಡಿದರು ಎಂದು ಮುಖ್ಯ ಅರಣ್ಯ ಸಂರಕ್ಷಕ ಎಸ್‌ ವಿ ರಾಮರಾವ್‌ ತಿಳಿಸಿದರು.

ಈ ಹುಲಿಗಳ ಸಾವಿಗೆ ಕಾರಣವೇನು ಎಂದು ತಿಳಿಯಲು ಘಟನೆಯ ತನಿಖೆಗೆ ಆದೇಶಿಸಲಾಗಿದೆ ಎಂದು ರಾವ್‌ ಹೇಳಿದರು.

ಮುಂಬಯಿಯಿಂದ ಸುಮಾರು 680 ಕಿ.ಮೀ. ದೂರದಲ್ಲಿರುವ ಚಂದ್ರಾಪುರ ಜಿಲ್ಲೆಯಲ್ಲಿ ತಡೋಬಾ ಅಂಧೇರಿ ವ್ಯಾಘ್ರ ಸಂರಕ್ಷಣ ಧಾಮವಿದ್ದು ಅದು ಅನೇಕ ಹುಲಿಗಳ ಆಶ್ರಯ ತಾಣವಾಗಿದೆ.