ಮುಂಬಯಿ: ಬಾಲಿವುಡ್‌ನ‌ಲ್ಲಿ ಭಾರೀ ನಿರೀಕ್ಷೆ ಹುಟ್ಟುಹಾಕಿರುವ ಬಹುತಾರಾಗಣದ ‘ಥಗ್ಸ್‌ ಆಫ್ ಹಿಂದುಸ್ತಾನ್‌’ ಚಿತ್ರದ ಟ್ರೈಲರ್‌ ಗುರುವಾರ ಬಿಡುಗಡೆ ಆಗಿದ್ದು, 3 ಗಂಟೆಗಳ ಒಳಗೆ ಯೂಟ್ಯೂಬ್‌ನಲ್ಲಿ 20 ಲಕ್ಷಕ್ಕೂ ಹೆಚ್ಚು ಜನರಿಂದ ವೀಕ್ಷಿಸಲ್‌ಪಟ್ಟಿದೆ.
ಬಾಲಿವುಡ್‌ ದಿಗ್ಗಜರಾದ ಅಮಿತಾಭ್‌ ಬಚ್ಚನ್‌, ಅಮೀರ್‌ ಖಾನ್‌, ಕತ್ರೀನಾ ಕೈಫ್ , ಫಾತಿಮಾ ಸನಾ ಶೇಖ್‌ ಮೊದಲಾದವರು ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿರುವುದು ಚಿತ್ರದ ಬಗ್ಗೆ ಇನ್ನಷ್ಟು ನಿರೀಕ್ಷೆ ಹೆಚ್ಚಿಸಿದೆ.
ಯಶ್‌ ರಾಜ್‌ ಫಿಲ್ಮ್ಸ್ ಬ್ಯಾನರ್‌ ಅಡಿಯಲ್ಲಿ ಚಿತ್ರವನ್ನು ನಿರ್ಮಾಣ ಮಾಡಲಾಗಿದ್ದು, ವಿಜಯ್‌ ಕೃಷ್ಣ ಆಚಾರ್ಯ ಅವರು ಚಿತ್ರವನ್ನು ನಿರ್ದೇಶಿಸಿದ್ದಾರೆ.
ಚಿತ್ರ ದೀಪಾವಳಿ ವೇಳೆ ನವೆಂಬರ್‌ 8 ರಂದು ವಿಶ್ವಾದ್ಯಂತ ತೆರೆಗೆ ಬರಲಿದೆ. ತಮಿಳು ಮತ್ತು ತೆಲುಗು ಭಾಷೆಗೆ ಡಬ್ಬಿಂಗ್‌ ಮಾಡಲಾಗಿದೆ.
ಫಿಲೀಪ್‌ ಮೆಡೋಸ್‌ ಟ್ರೈಲರ್ಸ್‌ ಅವರ ‘ಕನ್‌ಫೆಶನ್ಸ್‌ ಆಫ್ ಎ ಥಗ್‌’ ಕಾದಂಬರಿ ಆಧರಿಸಿದ ಚಿತ್ರವಾಗಿದೆ.
ಈಗಾಗಲೇ ಮೇಕಿಂಗ್‌ ಮತ್ತು ಪೋಸ್ಟರ್‌ಗಳ ಮೂಲಕ ಗಮನ ಸೆಳೆದಿದ್ದ ಚಿತ್ರ ಟ್ರೈಲರ್‌ ಮೂಲಕ ಚಿತ್ರ ಪ್ರೇಮಿಗಳನ್ನು ತುದಿಗಾಲಲ್ಲಿ ನಿಲ್ಲಿಸಿದೆ.
