ಗೋವಾ : ಕರ್ನಾಟಕ ಮೂಲದ ಒಂದೇ ಕುಟುಂಬದ ಮೂವರು ನೇಣಿಗೆ ಶರಣು

ಪಣಜಿ(ವಾಸ್ಕೊ): ಕರ್ನಾಟಕ ಮೂಲದ ಒಂದೇ ಕುಟುಂಬದ ಮೂವರು ಮನೆಯಲ್ಲಿ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡ ಘಟನೆ ವಾಸ್ಕೊ ಜುವಾರಿನಗರ ಬಿರ್ಲಾದಲ್ಲಿ ನಡೆದಿದೆ.

ದಕ್ಷಿಣ ಗೋವಾ ಪೋಲಿಸ್ ಅಧೀಕ್ಷಕ ಪಂಕಜ್‍ ಕುಮಾರ್ ಸಿಂಗ್ ರವರು ನೀಡಿರುವ ಮಾಹಿತಿಯ ಅನುಸಾರ- ಜುವಾರಿನಗರ ಬಿರ್ಲಾದಲ್ಲಿ ಬಾಡಿಕೆ ಮನೆಯಲ್ಲಿ ವಾಸಿಸುತ್ತಿದ್ದ ಹುಲಗೆಪ್ಪಾ ಅಂಬಿಗೇರ (35), ಈತನ ಸಹೋದರ ಗಂಗಪ್ಪಾ ಅಂಬಿಗೇರ(29), ಪತ್ನಿ ದೇವಮ್ಮಾ ಹುಲಗೆಪ್ಪಾ ಅಂಬಿಗೇರ( 28) ಈ ಮೂವರು ಮನೆಯಲ್ಲಿ ನೇಣುಬಿಗಿದ ಅವಸ್ಥೆಯಲ್ಲಿ ಮೃತದೇಹ ಪತ್ತೆಯಾಗಿದೆ.

ಘಟನೆಯ ಮಾಹಿತಿ ಲಭ್ಯವಾಗುತ್ತಿದ್ದಂತೆಯೇ ವೆರ್ಣಾ ಪೋಲಿಸ್ ನಿರೀಕ್ಷಕರು ಮತ್ತು ವಾಸ್ಕೊ ಉಪವಿಭಾಗ ಅಧೀಕ್ಷಕರು ಘಟನಾ ಸ್ಥಳಕ್ಕೆ ದಾಖಲಾಗಿ ಪಂಚನಾಮೆ ನಡೆಸಿದರು. ನಂತರ ಮೃತದೇಹವನ್ನು ಗೋವಾ ವೈದ್ಯಕೀಯ ಲಾಲೇಜಿಗೆ ಕಳುಹಿಸಿ ಮರಣೋತ್ತರ ಪರೀಕ್ಷೆ ನಡೆಸಲಾಗಿ – ಈ ಮೂವರೂ ನೇಣು ಬಿಗಿದು ಆತ್ಮಹತ್ಯೆ ಮಾಡಿಕೊಂಡಿರುವುದು ಖಚಿತವಾಗಿದೆ. ಈ ಘಟನೆಗೆ ಸಂಬಂಧಿಸಿದಂತೆ ವೆರ್ಣಾ ಪೋಲಿಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ವಾಸ್ಕೊದಲ್ಲಿ ಕಳೆದ ವಾರ ಮನೆಯೊಂದರಲ್ಲಿ 10 ಲಕ್ಷ ರೂ ಮೌಲ್ಯದ ಆಭರಣ ಕಳವು ಪ್ರಕರಣದಲ್ಲಿ ಪೋಲಿಸರು ಈ ಮೂವರನ್ನು ಕರೆಯಿಸಿ ವಿಚಾರಣೆ ನಡೆಸಿದ್ದರು ಎನ್ನಲಾಗಿದೆ. ಇದರಿಂದಾಗಿ ಮನನೊಂದು ಈ ಮೂವರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದೇ ಹೇಳಲಾಗುತ್ತಿದೆ.