ಜಪಾನಿನ ಒಸಾಕಾ ನಗರದಲ್ಲಿ ಭೂಕಂಪ: 3 ಸಾವು, 200 ಮಂದಿಗೆ ಗಾಯ

ಟೋಕಿಯೋ : ಜಪಾನಿನ ಎರಡನೇ ದೊಡ್ಡ ಮಹಾ ನಗರವಾಗಿರುವ ಒಸಾಕಾದಲ್ಲಿ ಇಂದು ಸಂಭವಿಸಿದ 5.3 ಅಂಕಗಳ ತೀವ್ರತೆಯ ಭೂಕಂಪದಲ್ಲಿ ಮೂವರು ಅಸುನೀಗಿದ್ದು 200ಕ್ಕೂ ಅಧಿಕ ಮಂದಿ ಗಾಯಗೊಂಡಿರುವುದಾಗಿ ವರದಿಯಾಗಿದೆ. 

ಸುಮಾರು 20 ಲಕ್ಷ ಜನಸಂಖ್ಯೆ ಇರುವ ಈ ನಗರದಲ್ಲಿ ಇಂದು ಜನರು ದೈನಂದಿನ ಚಟುವಟಿಕೆಗಳಲ್ಲಿ ತೊಡಗಿಕೊಂಡಿದ್ದ  ದಟ್ಟನೆಯ ಹೊತ್ತಿನಲ್ಲೇ ಭೂಕಂಪ ಸಂಭವಿಸಿದ್ದು ಮಹಾನಗರದಲ್ಲಿನ ಅನೇಕ ಭೂಗತ ನೀರಿನ ಪೈಪುಗಳು ಒಡೆದು ಕಾರಂಜಿಯಂತೆ ನೀರು ಚಿಮ್ಮುತ್ತಿರುವುದು, ಕಟ್ಟಡಗಳು ವಾಲಿಕೊಂಡಿರುವುದು, ಗೋಡೆಗಳು ಕುಸಿದು ಬದ್ದಿರುವುದು ಕಂಡು ಬಂದಿದೆ. 

ಹಾಗಿದ್ದರೂ ಯಾವುದೇ ದೊಡ್ಡ ಮಟ್ಟದ ನಾಶ-ನಷ್ಟ ಸಂಭವಿಸಿಲ್ಲ ಮತ್ತು ಯಾವುದೇ ಸುನಾಮಿ ಎಚ್ಚರಿಕೆಯನ್ನು ಕೊಡಲಾಗಿಲ್ಲ ಎಂದು ವರದಿಗಳು ತಿಳಿಸಿವೆ. 

ಭೂಕಂಪದಿಂದಾಗಿ ವಿದ್ಯುತ್‌ ಪೂರೈಕೆ ನಿಂತು ಹೋಗಿದ್ದು ಹತ್ತಾರು ಸಾವಿರ ಜನರು ರಸ್ತೆಯಲ್ಲೇ ಉಳಿದಿರುವುದು ಕಂಡು ಬಂದಿದೆ.

ಪ್ರಧಾನಿ ಶಿಂಜೋ ಅಬೇ ಅವರು ಸುದ್ದಿಗಾರರೊಂದಿಗೆ ಮಾತನಾಡುತ್ತಾ “ಸರಕಾರ ಸಂಘಟಿತವಾಗಿ ರಕ್ಷಣಾ ಕಾರ್ಯವನ್ನು ಸಮರೋಪಾದಿಯಲ್ಲಿ ನಡೆಸುತ್ತಿದೆ; ಜನರ ಪ್ರಾಣ ರಕ್ಷಣೆಯೇ ಸರಕಾರದ ಮೊದಲ ಆದ್ಯತೆಯಾಗಿದೆ’ ಎಂದು ಹೇಳಿದರು.  

2011ರಲ್ಲಿ ಜಪಾನಿನಲ್ಲಿ 9 ಅಂಕಗಳ ತೀವ್ರತೆಯ ಭಾರೀ ವಿನಾಶಕಾರಿ ಭೂಕಂಪ ಸಂಭವಿಸಿತ್ತು.