ಬೆಂಗಳೂರು: ರೌಡಿಶೀಟರ್‌ ಕುಶನನ್ನು ಹತ್ಯೆಗೈದು ತಲೆಮರೆಸಿಕೊಂಡಿದ್ದ ಮೂವರು ಆರೋಪಿಗಳನ್ನು ಮೈಕೋ ಲೇಔಟ್‌ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ತಿಲಕನಗರದ ಅರಸು ಕಾಲೋನಿ ನಿವಾಸಿ ನಂದ ಕುಮಾರ್‌, ಸಂತೋಷ್‌ ಗೌಡ ಹಾಗೂ ವೀವರ್ಸ್‌ ಕಾಲೋನಿ ನಿವಾಸಿ ಸೂರ್ಯ ಕುಮಾರ್‌ ಬಂಧಿತರು. ಮೂವರು ಆಟೋ ಚಾಲಕರಾಗಿದ್ದಾರೆ. ಆರೋಪಿಗಳ ಪೈಕಿ ನಂದ ಕುಮಾರ್‌ ಹಾಗೂ ರೌಡಿಶೀಟರ್‌ ಕುಶ ನಡುವೆ ಈ ಹಿಂದಿನಿಂದಲೂ ಗಲಾಟೆ, ಜಗಳ ನಡೆಯುತ್ತಿತ್ತು. ಈ ಹಿನ್ನೆಲೆಯಲ್ಲಿ ಕೃತ್ಯ ನಡೆದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕುಶ ವಿರುದ್ಧ ಜೆ.ಪಿ.ನಗರ ಠಾಣೆಯಲ್ಲಿ ರೌಡಿಪಟ್ಟಿ ತೆರೆಯಲಾಗಿದ್ದು, ನಗರದ ವಿವಿಧ ಠಾಣೆಗಳಲ್ಲಿ ಕೊಲೆ, ಕೊಲೆ ಯತ್ನ, ದರೋಡೆ ಸೇರೆ ಕೆಲ ಅಪರಾಧ ಪ್ರಕರಣಗಳು ದಾಖಲಾಗಿವೆ. ಈತನ ಸಹೋದರ ಲವ ಕೂಡ ರೌಡಿಶೀಟರ್‌ ಆಗಿದ್ದಾನೆ.
ಮಂಗಳವಾರ ತಡರಾತ್ರಿ 2 ಗಂಟೆ ಸುಮಾರಿಗೆ ಕಂಠಪೂರ್ತಿ ಮದ್ಯ ಸೇವಿಸಿದ್ದ ಕುಶ ನಂದಕುಮಾರ್‌ಗೆ ಕರೆ ಮಾಡಿ ಕೂಡಲೇ ಆಟೋ ನಿಲ್ದಾಣಕ್ಕೆ ಬರದಿದ್ದರೆ ಕೊಲೆ ಮಾಡುವುದಾಗಿ ಬೆದರಿಸಿದ್ದ. ಇದರಿಂದ ಆಕ್ರೋಶಗೊಂಡ ನಂದ, ತನ್ನ ಸಹಚರರ ಜತೆ ಆಟೋ ನಿಲ್ದಾಣಕ್ಕೆ ಬಂದಿದ್ದಾನೆ.
ಬಳಿಕ ಇಬ್ಬರ ನಡುವೆ ಮಾರಾಮಾರಿ ನಡೆದಿದೆ. ಈ ವೇಳೆ ತಡೆಯಲು ಹೋದ ಸೂರ್ಯಕುಮಾರ್‌ ಮೇಲೆಯೂ ಕುಶ ಹಲ್ಲೆ ನಡೆಸಿದ್ದಾನೆ. ಇದರಿಂದ ಕೋಪಗೊಂಡ ಸಂತೋಷ್‌ ಮತ್ತು ನಂದ ಚಾಕುವಿನಿಂದ ಕುಶನ ಎದೆ, ಹೊಟ್ಟೆ ಹಾಗೂ ಬೆನ್ನಿಗೆ ಇರಿದಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
