ಈ ಬಾರಿ ಅನಂತ್‌ ಕುಮಾರ್‌ ಹೆಗಡೆ ತಂದೆಯ ಮತ ಬಿಜೆಪಿಗಂತೆ..!

ಕಾರವಾರ: ನಾನು ಐದು ಬಾರಿ ಚುನಾವಣೆಗೆ ನಿಂತಾಗ ನನ್ನ ತಂದೆ ನನಗೆ ಮತ ಹಾಕಿದ್ದಾರೋ ಗೊತ್ತಿಲ್ಲ. ಆದರೆ ಈ ಬಾರಿ ಮಾತ್ರ ಅವರು  ಬಿಜೆಪಿ ಮತ ಹಾಕುವುದಾಗಿ ಹೇಳಿದ್ದಾರೆ..ಇದು ಕೇಂದ್ರ ಸಚಿವ ಅನಂತ್‌ ಕುಮಾರ್‌ ಹೆಗಡೆ ಅವರು ಹೇಳಿದ ಮಾತು.

ಕಾರವಾರದಲ್ಲಿ ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದ ಸಚಿವ ಹೆಗಡೆ, ನನ್ನ ತಂದೆ ಸ್ವಾತಂತ್ರ್ಯ ಹೋರಾಟಗಾರರ ಪರಂಪರೆಯಿಂದ ಬಂದವರು . ನಮ್ಮ ಮನೆಯಲ್ಲಿ ಬಿಜೆಪಿಗೆ ಮತ ಹಾಕಿಯೇ ಗೊತ್ತಿರಲಿಲ್ಲ.ನನಗೆ ಬಿಜೆಪಿ ಟಿಕೆಟ್‌ ಸಿಕ್ಕಿದಾಗ ಬೈದಿದ್ದರು. ನೀನು ಬಿಜೆಪಿಗೆ ಹೋಗಿದ್ದೀಯಾ ಅಂದರೆ ನಮ್ಮ ಮನೆಗೆ ಕಳಂಕ ಅಂದಿದ್ದರು. ನಮ್ಮ ತಂದೆ ಕಟ್ಟಾ ಕಾಂಗ್ರೆಸಿಗರು ಎಂದರು. 

ನಮ್ಮ ತಂದೆ  ಈ ಬಾರಿ ನನ್ನ ಮತ ಬಿಜೆಪಿಗೆ ಅಂದಿದ್ದಾರೆ. ಅದು ನಿನ್ನನ್ನು ನೋಡಿ ಅಲ್ಲ, ಮೋದಿಗಾಗಿ ನನ್ನ ಮತ ಅಂದಿದ್ದಾರೆ. ಈ ರೀತಿಯ ವಾತಾವರಣ ಈಗ ನಿರ್ಮಾಣವಾಗಿದೆ ಎಂದರು. 

ಉತ್ತರ ಕನ್ನಡದಲ್ಲಿ ಕಾಂಗ್ರೆಸ್‌ಗೆ ಅಭ್ಯರ್ಥಿ ಹಾಕಲು ಸಾಧ್ಯವಾಗುತ್ತಿಲ್ಲ ಎಂದು ಲೇವಡಿ ಮಾಡಿದರು.