ಈ ಅಜ್ಜಿಗೆ 96ನೇ ವಯಸ್ಸಲ್ಲಿ 98 ಅಂಕ

ತಿರುವನಂತಪುರ: ಕೇರಳದ ಅಲಪ್ಪುಳ ಜಿಲ್ಲೆಯ ಕಾತ್ಯಾಯಿನಿ ಅಮ್ಮರಿಗೆ (96) ಈಗ ಸಂತೋಷವೋ ಸಂತೋಷ. ಅದಕ್ಕೆ ಕಾರಣವಿದೆ. ಕೆಲ ತಿಂಗಳುಗಳ ಹಿಂದೆ ಸಾಕ್ಷರತಾ ಆಂದೋಲನ ಸಮಿತಿ ನಾಲ್ಕನೇ ತರಗತಿಗಾಗಿನ ಪರೀಕ್ಷೆ ನಡೆಸಿತ್ತು. ಅದರ ಫ‌ಲಿತಾಂಶ ಪ್ರಕಟವಾಗಿದೆ. ಅದರಲ್ಲಿ 100ರಲ್ಲಿ 98 ಅಂಕಗಳನ್ನು ಗಳಿಸಿ ಟಾಪರ್‌ ಆಗಿ ಹೊರಹೊಮ್ಮಿದ್ದಾರೆ. ಅವರು ಪರೀಕ್ಷೆ ಬರೆಯುವ ಫೋಟೋಗಳು ದೇವರೊಲಿದ ರಾಜ್ಯದ ಮಾಧ್ಯಮಗಳಲ್ಲಿ ಪ್ರಮುಖವಾಗಿ ಪ್ರಕಟವಾಗಿತ್ತು. ‘ಅಕ್ಷರಲಕ್ಷಂ’ ಎಂಬ ಸಾಕ್ಷರತಾ ಸಮಿತಿ ಆಯೋಜಿಸಿರುವ ಪರೀಕ್ಷೆಯಲ್ಲಿ 43,330 ಮಂದಿಯ ಪೈಕಿ 42,930 ಮಂದಿ ಉತ್ತೀರ್ಣರಾಗಿದ್ದಾರೆ. ಅಷ್ಟೂ ಮಂದಿಯಲ್ಲಿ ಅತ್ಯಂತ ಹಿರಿಯವರು ಎಂದರೆ ಕಾರಿಗೆಯಿನಿ ಅಮ್ಮ. ಗುರುವಾರ ತಿರುವನಂತಪುರದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಅವರನ್ನು ಕೇರಳ ಸಿಎಂ ಪಿಣರಾಯಿ ವಿಜಯನ್‌ ಆತ್ಮೀಯವಾಗಿ ಸಮ್ಮಾನಿಸಿದ್ದಾರೆ.