ರೇಖಾಚಿತ್ರಗಳ ಪರಿಣಿತ ಕಲಾವಿದ ಅಮರೇಶ್‌ ಇನ್ನಿಲ್ಲ

ಬೆಂಗಳೂರು: ಗೂಳಿ ರೇಖಾ ಚಿತ್ರಗಳ ಮೂಲಕ ಜನಪ್ರಿಯರಾಗಿದ್ದ ಅಮರೇಶ್‌ ಬಿಜ್ಜಲ್‌ ಸೋಮವಾರ ನಿಧನರಾದರು. 56 ವರ್ಷ ವಯಸ್ಸಿನ ಅಮರೇಶ್‌ ಅವರು ಬೆಂಗಳೂರಿನ ನಿವಾಸದಲ್ಲಿ ವಿಧಿವಶರಾಗಿದ್ದಾರೆ. ರಕ್ತದೊತ್ತಡ ಕಡಿಮೆಯಾಗಿತ್ತು. ಟಿವಿ ವೀಕ್ಷಿಸುತ್ತಿದ್ದ ಸಮಯದಲ್ಲೇ ಪ್ರಾಣಬಿಟ್ಟಿದ್ದಾರೆ ಎಂದು ಅವರ ಆಪ್ತರು ತಿಳಿಸಿದ್ದಾರೆ.

ಇಳಕಲ್‌ನ ಕುಷ್ಟಗಿಯವರಾದ ಅಮರೇಶ್‌ ಅವರು ಸಿನಿಮಾಗಳ ಪೋಸ್ಟರ್‌ಗಳನ್ನು ಮಾಡುವುದರ ಜತೆ ಜೊತೆಗೇ ವೃತ್ತಿಪರವಾಗಿಯೂ ಗುರುತಿಸಿಕೊಂಡು, ಸಾಕಷ್ಟು ಅಕಾಡೆಮಿಕ್‌ ಕಲಾಕೃತಿಗಳನ್ನು ರಚಿಸಿದ್ದಾರೆ. ಶೇಷಾದ್ರಿಪುರಂನ ಕೆನ್‌ ಕಲಾಶಾಲೆಯಲ್ಲಿ ಕಲಾ ಪದವಿ ಪಡೆದುಕೊಂಡಿರುವ ಅಮರೇಶ್‌ ಅವರು ಸಾಕಷ್ಟು ಪ್ರಶಸ್ತಿ, ಪುರಸ್ಕಾರಗಳಿಗೆ ಭಾಜನರಾಗಿದ್ದರು.

ಕಳೆದ ಕೆಲ ವರ್ಷಗಳಿಂದ ನಿರಂತರವಾಸಗಿ ಆರ್ಟ್‌ಪಾರ್ಕ್‌ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳುತ್ತಿದ್ದ ಅಮರೇಶ್‌ ನಿಧನಕ್ಕೆ ಬೆಂಗಳೂರು ಆರ್ಟ್‌ ಫೌಂಡೇಶನ್‌ ಸೇರಿದಂತೆ, ಲಲಿತಕಲಾ ಕ್ಷೇತ್ರದ ಅನೇಕ ಗಣ್ಯರು ಕಂಬನಿ ಮಿಡಿದಿದ್ದಾರೆ.