ಎಸ್‌ಬಿಐ ಹೆಸರಲ್ಲಿ ಯಾವುದೇ ಲಕ್ಕಿ ಡ್ರಾ ಇಲ್ಲ

ಹೊಸದಿಲ್ಲಿ: “ನೀವು ಲಕ್ಕಿ ಡ್ರಾದಲ್ಲಿ ಜಯ ಗಳಿಸಿದ್ದೀರಿ’ ಎಂಬ ಸಂದೇಶವನ್ನು ಭಾರತೀಯ ಸ್ಟೇಟ್‌ ಬ್ಯಾಂಕ್‌ (ಎಸ್‌ಬಿಐ) ಹೆಸರಿನಲ್ಲಿ ವ್ಯಾಟ್ಸ್‌ ಆ್ಯಪ್‌ ಮೂಲಕ ಕಳುಹಿಸುವ ಅಥವಾ ಕರೆ ಮಾಡಿ ತಿಳಿಸುವ ಜಾಲವೊಂದು ಸಕ್ರಿಯವಾಗಿದೆ. ಇಂಥ ಸಂದೇಶಗಳ ಬಗ್ಗೆ ಗ್ರಾಹಕರು ಎಚ್ಚರಿಕೆಯಿಂದ ಇರಬೇಕು ಎಂದು ಎಸ್‌ಬಿಐ ಸೋಮವಾರ ಹೇಳಿದೆ.

ವಂಚಕರು ಗ್ರಾಹಕರ ವಾಟ್ಸ್‌ಆ್ಯಪ್‌ಗೆ ಕರೆ ಮಾಡಿ ಬ್ಯಾಂಕ್‌ ವತಿಯಿಂದ ಲಕ್ಕಿ ಡ್ರಾ ನಡೆದು ಬಹುಮಾನ ಬಂದಿದೆ ಎಂದು ಮಾಹಿತಿ ನೀಡಿ ವಂಚಿಸುವ ಸಾಧ್ಯತೆ ಇದೆ. ಬ್ಯಾಂಕ್‌ ವತಿ ಯಿಂದ ಸದ್ಯ ಯಾವುದೇ ರೀತಿಯ ಲಾಟರಿ ಅಥವಾ ಲಕ್ಕಿ ಡ್ರಾ ಯೋಜನೆಯೇ ಇಲ್ಲ ಎಂದು ಬ್ಯಾಂಕ್‌ ಟ್ವೀಟ್‌ ಮಾಡಿದೆ.

ಇ-ಮೇಲ್‌, ಎಸ್‌ಎಂಎಸ್‌, ಫೋನ್‌, ವಾಟ್ಸ್‌ ಆ್ಯಪ್‌ ಮೂಲಕ ಗ್ರಾಹಕರ ಬ್ಯಾಂಕ್‌ ಖಾತೆ ಮತ್ತು ಇತರ ವೈಯಕ್ತಿಕ ವಿವರಗಳನ್ನು ನಾವು ಕೇಳುವು ದಿಲ್ಲ. ಹೀಗಾಗಿ, ಗ್ರಾಹಕರು ವಂಚಕರ ಮಾತು ಗಳಿಗೆ ಬಲಿಯಾಗಬಾರದು ಎಂದು ಮನವಿ ಮಾಡಿದೆ. ಇತ್ತೀಚೆಗಷ್ಟೇ ಪುಣೆಯಲ್ಲಿ ಎಸ್‌ಬಿಐ ಗ್ರಾಹಕರೊಬ್ಬರಿಗೆ ಇದೇ ಮಾದರಿಯಲ್ಲಿ ಮರುಳು ಮಾಡಿ 2.2 ಲಕ್ಷ ರೂ. ಲಪಟಾಯಿಸಲಾಗಿತ್ತು.