ವನಿತಾ ಸೂಪರ್‌ ಲೀಗ್‌ಗೆ ಹರ್ಮನ್‌ಪ್ರೀತ್‌ ಇಲ್ಲ

ಹೊಸದಿಲ್ಲಿ: ಐಸಿಸಿ ವನಿತಾ ವಿಶ್ವಕಪ್‌ನಲ್ಲಿ ಅಮೋಘ ನಿರ್ವಹಣೆ ನೀಡಿ ಗಮನ ಸೆಳೆದಿರುವ ಆಲ್‌ರೌಂಡರ್‌ ಹರ್ಮನ್‌ಪ್ರೀತ್‌ ಕೌರ್‌ ಅವರು ಭುಜದ ಗಾಯದಿಂದಾಗಿ ಇಂಗ್ಲೆಂಡಿನಲ್ಲಿ ನಡೆಯ ಲಿರುವ ವನಿತಾ ಸೂಪರ್‌ ಲೀಗ್‌ ಕೂಟ ದಿಂದ ಹಿಂದೆ ಸರಿದಿದ್ದಾರೆ. 

ಹರ್ಮನ್‌ಪ್ರೀತ್‌ ಸರ್ರೆ ಸ್ಟಾರ್ ತಂಡವನ್ನು ಪ್ರತಿನಿಧಿಸಬೇಕಿತ್ತು. ಆದರೆ ಒಂದು ತಿಂಗಳ ವಿಶ್ರಾಂತಿ ಪಡೆಯಬೇಕೆಂಬ ಸಲಹೆ ಮೇರೆಗೆ ಅವರು ಕೂಟದಿಂದ ಹಿಂದೆ ಸರಿಯಲು ನಿರ್ಧರಿಸಿದರು. ಭಾರತಕ್ಕೆ ಮರಳಿದ ಬಳಿಕ ಎಂಆರ್‌ಐ ಸ್ಕ್ಯಾನ್‌ ನಡೆಸಿದಾಗ ಅವರ ಎಡ ಭುಜದಲ್ಲಿ ಗಾಯವಾಗಿರುವುದು ಕಂಡು ಬಂತು. ಅದಕ್ಕಾಗಿ ವಿಶ್ರಾಂತಿ ಪಡೆಯುವಂತೆ ವೈದ್ಯರು ಸಲಹೆ ನೀಡಿದ್ದಾರೆ.

ವಿಶ್ವಕಪ್‌ನ ಅಂತಿಮ ಹಂತದಲ್ಲಿ ನನ್ನ ನೋವು ತೀವ್ರಗೊಂಡಿತ್ತು. ಆದರೂ ಫೈನಲ್‌ವರೆಗೆ ಆಡಿದ್ದೆ. ಸೂಪರ್‌ ಲೀಗ್‌ನಲ್ಲಿ ಆಡುವುದು ನನ್ನ ಆಸೆಯಾಗಿತ್ತು. ಆದರೆ ದುರದೃಷ್ಟವಶಾತ್‌ ಆಡಲು ಸಾಧ್ಯವಾಗುತ್ತಿಲ್ಲ ಎಂದು ಹರ್ಮನ್‌ಪ್ರೀತ್‌ ಹೇಳಿದರು. ಹರ್ಮನ್‌ಪ್ರೀತ್‌ ಕಳೆದ ವರ್ಷ ಆಸ್ಟ್ರೇಲಿಯದಲ್ಲಿ ನಡೆದ ವನಿತಾ ಬಿಗ್‌ ಬಾಶ್‌ ಲೀಗ್‌ನಲ್ಲಿ ಸಿಡ್ನಿ ಥಂಡರ್ ಪರ ಆಡಿದ್ದರು. ಬಿಗ್‌ ಬಾಶ್‌ನಲ್ಲಿ ಆಡಿದ್ದರಿಂದ ನನ್ನ ಆಟದಲ್ಲಿ ಬಹಳಷ್ಟು ಬದಲಾವಣೆಯಾಗಿತ್ತು ಎಂದವರು ಅಭಿಪ್ರಾಯಪಟ್ಟರು. ಸಿಡ್ನಿ ಥಂಡರ್ ಪರ ಅವರು ಎರಡನೇ ಗರಿಷ್ಠ ರನ್‌ ಪೇರಿಸಿದ ಆಟಗಾರ್ತಿ ಎನಿಸಿಕೊಂಡಿದ್ದರು.