ರಾಜ್ಯ-ದೇಶದಲ್ಲಿ ಇವೆ ಭ್ರಷ್ಟ ಸರ್ಕಾರಗಳು

ಸಿಂಧನೂರು: ಈ ರಾಜ್ಯ-ದೇಶದಲ್ಲಿ ನಂಬರ್‌ ಒನ್‌ ಭ್ರಷ್ಟ ಸರ್ಕಾರಗಳು ಅಸ್ತಿತ್ವದಲ್ಲಿವೆ. ಇವರು ರೈತರಿಗೆ ಸುಳ್ಳು ಹೇಳಿ ಮೋಸ ಮಾಡಿದ್ದು, ಅವರನ್ನು ತೊಲಗಿಸಲು ಜನ ಪಣ ತೊಟ್ಟಿದ್ದಾರೆ ಎಂದು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ ಹೇಳಿದರು.

ನಗರದ ಮಾಜಿ ಶಾಸಕ ಹಂಪನಗೌಡ ಬಾದರ್ಲಿ ನಿವಾಸದಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಅವರು ಮಾತನಾಡಿದರು. ಬಿಜೆಪಿಯವರು ಜನರಿಗೆ ಕೊಟ್ಟ ಭರವಸೆ ಈಡೇರಿಸಿಲ್ಲ. ಬರೀ ಸುಳ್ಳು ಹೇಳಿದ್ದಾರೆ. ಕೊರೊನಾ ಸಂದರ್ಭದಲ್ಲಿ ಸಾಕಷ್ಟು ಭ್ರಷ್ಟಾಚಾರ ಮಾಡಿದ್ದಾರೆ. ರೈತರಿಗೆ ಸರಿಯಾದ ರೀತಿ ಬೆಂಬಲ ಬೆಲೆ ಕೊಟ್ಟಿಲ್ಲ. ಖಾದಿ ಭಂಡಾರ ಉತ್ತೇಜಿಸುವುದಾಗಿ ಹೇಳಿದ ಇವರಿಂದ ಸಿಲ್ಕ್ ಇಲ್ಲ; ಮಿಲ್ಕ್ ಇಲ್ಲಾ ಎಂಬುದು ಗೊತ್ತಾಗಿದೆ ಎಂದು ಹರಿಹಾಯ್ದರು.

ನಮ್ಮ ಹೋರಾಟದ ಫಲ

ಮೇಕೆದಾಟು ಯೋಜನೆ ಅನುಷ್ಠಾನಕ್ಕಾಗಿ ನಾವು ಹೋರಾಡಿದ ಮೇಲೆ ಬಜೆಟ್‌ ನಲ್ಲಿ ಅನುದಾನ ಕೊಟ್ಟರು. ಆವರೆಗೂ ಸುಮ್ಮನಿದ್ದರು. ಮೊದಲು ರಾಜಕಾರಣ ಎಂದರು. ಹಾಗಿದ್ದರೆ, 1 ಸಾವಿರ ಕೋಟಿ ರೂ. ಅನುದಾನ ಯಾಕೆ ಕೊಟ್ಟರು?. ಇದು ಬಿಜೆಪಿಯ ಡಬಲ್‌ ಸ್ಟ್ರಾಂಡ್‌ ತೋರಿಸುತ್ತದೆ. ನಾವು ಜನಪರ ಹೋರಾಟ ರೂಪಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ಕಾಂಗ್ರೆಸ್‌ ಅಧಿಕಾರಕ್ಕೆ ಬರುವುದರಲ್ಲಿ ಯಾವುದೇ ಸಂಶಯವಿಲ್ಲ ಎಂದರು.

ಮಾನವೀಯತೆ ಮುಖ್ಯ

ಬುದ್ಧ, ಬಸವ, ಅಂಬೇಡ್ಕರ್‌ ಜನಿಸಿದ ನಾಡು ನಮ್ಮದು. ಇಲ್ಲಿ ಮಾನವೀಯತೆಯೇ ಮುಖ್ಯ. ಅಮಾನವೀಯ ರೀತಿಯಲ್ಲಿ ಜಾತ್ರೆ, ಹಬ್ಬಗಳಲ್ಲಿ ಒಂದು ವರ್ಗ ನಿಷೇಧಿ ಸುವ ಕ್ರಮ ಸರಿಯಲ್ಲ. ಇದನ್ನು ನಾವು ಒಪ್ಪುವುದಿಲ್ಲ ಎಂದರು. ಈ ವೇಳೆ ಕೊಪ್ಪಳ ಕಾಂಗ್ರೆಸ್‌ ಜಿಲ್ಲಾಧ್ಯಕ್ಷ ಶಿವರಾಜ ತಂಗಡಗಿ, ಬ್ಲಾಕ್‌ ಕಾಂಗ್ರೆಸ್‌ ಅಧ್ಯಕ್ಷ ಪಂಪನಗೌಡ ಬಾದರ್ಲಿ, ಜಿಪಂ ಸದಸ್ಯ ಬಸವರಾಜ ಹಿರೇಗೌಡರ, ನಗರಸಭೆ ಅಧ್ಯಕ್ಷ ಮಲ್ಲಿಕಾರ್ಜುನ ಪಾಟೀಲ್‌, ಉಪಾಧ್ಯಕ್ಷ ಮುರ್ತುಜಾ ಹುಸೇನ್‌, ಮಾಜಿ ಅಧ್ಯಕ್ಷ ಜಾಫರ್‌ ಜಾಹಗೀರದಾರ್‌ ಸೇರಿದಂತೆ ಇತರರು ಇದ್ದರು.