Arrested: ಕ್ಯಾಬ್‌ ಚಾಲಕನಿಗೆ ಇರಿದು ದೋಚಿ ಪರಾರಿ ಆಗುತ್ತಿದ್ದ ಪ್ರಯಾಣಿಕ ಸೆರೆ

ಬೆಂಗಳೂರು: ಪ್ರಯಾಣಿಕನ ಸೋಗಿನಲ್ಲಿ ಬಂದು ಕ್ಯಾಬ್‌ ಚಾಲಕನಿಗೆ ಚಾಕುವಿನಿಂದ ಇರಿದು ಹಲ್ಲೆ ನಡೆಸಿ, ನಗದು ಹಾಗೂ ಚಿನ್ನಾಭರಣ ಕಸಿದು ಪರಾರಿಯಾಗಲು ಯತ್ನಿಸಿದ ಆರೋಪಿಯನ್ನು ಸ್ಥಳೀಯರೇ ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಚನ್ನಪಟ್ಟಣ ತಾಲೂಕಿನ ಹೇಮಂತ್‌ಕುಮಾರ್‌ ಗಾಯಗೊಂಡ ಕ್ಯಾಬ್‌ ಚಾಲಕ. ಕೃತ್ಯ ಎಸಗಿದ ರಾಯಚೂರು ಜಿಲ್ಲೆ ದೇವದುರ್ಗ ತಾಲೂಕಿನ ನರಸಪ್ಪ(19) ಎಂಬಾತನನ್ನು ಬಂಧಿಸಲಾಗಿದೆ. ರಾಮನಗರ ಮೂಲದ ಹೇಮಂತ್‌ ಕುಮಾರ್‌, ನಗರದಲ್ಲಿ ಕ್ಯಾಬ್‌ ಚಾಲಕರಾಗಿ ಕೆಲಸ ಮಾಡುತ್ತಿದ್ದಾರೆ. ಡಿ.26ರಂದು ಆರೋಪಿ ನರಸಪ್ಪ ಬನಶಂಕರಿ ದೇವಾಲಯದಿಂದ ಅಂಜನಾಪುರಕ್ಕೆ ಕ್ಯಾಬ್‌ ಬುಕ್‌ ಮಾಡಿದ್ದಾನೆ. ಸ್ಥಳಕ್ಕೆ ಕ್ಯಾಬ್‌ ಬರುತ್ತಿದ್ದಂತೆ ಆತನೇ ಕ್ಯಾನ್ಸಲ್‌ ಮಾಡಿದ್ದಾನೆ. ಬಳಿಕ ಕ್ಯಾಬ್‌ ಬಳಿ ಬಂದ ಆರೋಪಿ ಕ್ಯಾನ್ಸಲ್‌ ಮಾಡಿದ ವಿಚಾರ ಹೇಳಿ, ಅಂಜನಾಪುರಕ್ಕೆ ಡ್ರಾಪ್‌ ಮಾಡುವಂತೆ ಹೇಮಂತ್‌ ಬಳಿ ಕೇಳಿಕೊಂಡಿದ್ದ.

ಹೀಗಾಗಿ ಕ್ಯಾಬ್‌ನಲ್ಲಿ ಕರೆದೊಯ್ಯುವಾಗ ಅಂಜನಾಪುರದ ಮಾಂಗಲ್ಯ ಅಪಾರ್ಟ್‌ಮೆಂಟ್‌ ಬಳಿ ಇಳಿದುಕೊಂಡ ಆರೋಪಿ, ಬಳಿಕ ಹೇಮಂತ್‌ಗೆ ಚಾಕು ತೋರಿಸಿ, ಚಿನ್ನದ ಸರ ಕೊಡುವಂತೆ ಹೇಳಿದ್ದಾನೆ. ಅದಕ್ಕೆ ಹೇಮಂತ್‌ ನಿರಾಕರಿಸಿದಾಗ, ತೋಳಿಗೆ ಚಾಕುವಿನಿಂದ ಇರಿದು ಗಾಯಗೊಳಿಸಿದ್ದಾನೆ. ಬಳಿಕ  5 ಸಾವಿರ ರೂ. ನಗದು ಕಿತ್ತುಕೊಂಡು ಕಾರಿನಿಂದ ಇಳಿದು ಪರಾರಿಯಾಗಲು ಯತ್ನಿಸಿದ್ದ. ಆಗ ಹೇಮಂತ್‌ ಕೂಗಿಕೊಂಡಿದ್ದಾರೆ. ಕೂಡಲೇ ಸ್ಥಳೀಯರು  ಆರೋಪಿ ಹಿಡಿದು ಹಿಗ್ಗಾಮುಗ್ಗಾ ಥಳಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ.