Cricket: ಈಡನ್‌ ಮೈದಾನದಲ್ಲಿ ಗೋಡೆ ಕುಸಿತ!

ಕೋಲ್ಕತಾ: ಶನಿವಾರ ಇಲ್ಲಿನ ಈಡನ್‌ ಗಾರ್ಡನ್ಸ್‌ ಮೈದಾನದಲ್ಲಿ, ಬಾಂಗ್ಲಾದೇಶ-ನೆದರ್ಲೆಂಡ್ಸ್‌ ನಡುವೆ ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯ ನಡೆಯಲಿದೆ. ಅದಕ್ಕೂ ಎರಡು ದಿನಗಳ ಮುನ್ನವೇ ಒಂದು ಆತಂಕಕಾರಿ ಘಟನೆ ನಡೆದಿದೆ. ಮೈದಾನದ ಹೊರಗೋಡೆಯೊಂದು, ಅರ್ಥ್ ಮೂವರ್‌ ವಾಹನ ಬಡಿದು ಕುಸಿದಿದೆ. ನವೀಕರಣ ಕಾಮಗಾರಿ ನಡೆಯುತ್ತಿದ್ದ ಹಿನ್ನೆಲೆಯಲ್ಲಿ ಅರ್ಥ್ ಮೂವರ್‌ ಬಡಿದು ಹೀಗಾಗಿದೆ, ಇದರ ದುರಸ್ತಿಗೆ ಚಾಲನೆ ನೀಡಲಾಗಿದೆ ಎಂದು ಬಂಗಾಳ ಕ್ರಿಕೆಟ್‌ ಸಂಸ್ಥೆ ಸ್ಪಷ್ಟೀಕರಣ ನೀಡಿದೆ.

ಘಟನೆ ತುಸು ಗಂಭೀರ ಎನ್ನುವಂತಿದೆ. ಮೈದಾನದ ಗೇಟ್‌ ಸಂಖ್ಯೆ 3 ಮತ್ತು 4ರ ನಡುವೆ ಗೋಡೆಯ ಭಾಗವೊಂದು ಕುಸಿದಿದೆ. ಈ ಭಾಗ ಫ್ಲಡ್‌ಲೈಟ್‌ ಒಂದರ ಸಮೀಪದಲ್ಲಿದೆ. ತುಸು ಹೆಚ್ಚುಕಡಿಮೆಯಾಗಿದ್ದರೂ ಫ್ಲಡ್‌ಲೈಟ್‌ಗೆ ಹೊಡೆತ ಬೀಳುತ್ತಿತ್ತು. ಆಗ ಪಂದ್ಯ ನಡೆಸುವುದೇ ಕಷ್ಟ ಎನ್ನುವಂತಾಗುತ್ತಿತ್ತು. ಈಗಲೂ ಈ ಗೇಟ್‌ಗಳಿಂದ ಪ್ರೇಕ್ಷಕರಿಗೆ ಪ್ರವೇಶ ನೀಡುವುದು ಕಷ್ಟಸಾಧ್ಯವಾಗಿದೆ. ಶನಿವಾರ ಬಾಂಗ್ಲಾ-ನೆದರ್ಲೆಂಡ್ಸ್‌, ಮುಂದಿನ ಮಂಗಳವಾರ ಪಾಕಿಸ್ತಾನ-ಬಾಂಗ್ಲಾದೇಶ ನಡುವಣ ಪಂದ್ಯ ಇಲ್ಲಿ ನಡೆಯಲಿದೆ. ನ. 5ಕ್ಕೆ ಅತ್ಯಂತ ಮಹತ್ವದ ಭಾರತ-ದ.ಆಫ್ರಿಕಾ ಪಂದ್ಯ ಕೂಡ ಇಲ್ಲೇ ನಡೆಯಲಿದೆ.