The Soul: ಸಾವಿನ ಬಳಿಕವೂ ಆತ್ಮ ಜೀವಂತ

ನ್ಯೂಯಾರ್ಕ್‌: ಸಾವು ಮತ್ತು ಆತ್ಮದ ವಿಚಾರಗಳು ಮನುಷ್ಯನ ಊಹೆಗೆ ಮೀರಿದ್ದಾಗಿದ್ದು, ಮರಣಾನಂತರ ಬದುಕೊಂದು ಇದೆಯಾ ಎಂಬ ಪ್ರಶ್ನೆ ಹಲವರಿಗೆ ಪ್ರಶ್ನೆಯಾಗಿಯೇ ಉಳಿದಿದೆ. ಇದರ ನಡುವೆ ಅಮೆರಿಕದ ರೇಡಿಯೇಷನ್‌ ಆನ್ಕಾಲಜಿಸ್ಟ್‌ ವೈದ್ಯರೊಬ್ಬರು ಬರೋಬ್ಬರಿ 5,000 ಸಾವುಗಳನ್ನು ಗಮನಿಸಿ, ಈ ಬಗ್ಗೆ ಅಧ್ಯಯನ ನಡೆಸಿ ಮೃತ್ಯುವಿನ ಬಳಿಕವೂ ಆತ್ಮ ಜೀವಂತವಾಗಿ ಇರುತ್ತದೆ ಎಂಬುದನ್ನು ಪ್ರತಿಪಾದಿಸಿದ್ದಾರೆ. ಈ ಕುರಿತ ಅವರ ಅಧ್ಯಯನ ವರದಿ ಇದೀಗ ವೈರಲ್‌ ಆಗಿದೆ.

ಅಮೆರಿಕದ ನಿಯರ್‌ ಡೆತ್‌ ಎಕ್ಸ್‌ಪೀರಿಯನ್ಸ್‌ ರೀಸರ್ಚ್‌ ಫೌಂಡೇಶನ್‌ನ ಸಂಸ್ಥಾಪಕರಾದ ಡಾ. ಜೆಫ್ಟಿ ಲಾಂಗ್‌ ಪ್ರಕಾರ, ಮನುಷ್ಯನ ಹೃದಯಬಡಿತ ನಿಂತು ಆತ ವೈದ್ಯಕೀಯವಾಗಿ ಮೃತನಾಗಿದ್ದಾನೆಂದು ಘೋಷಿಸಿದ ಬಳಿಕವೂ ಆತನ ಆತ್ಮಕ್ಕೆ ತನ್ನ ಸುತ್ತಲಿನ ಘಟನೆಗಳನ್ನು ಗ್ರಹಿಸುವ, ಅರ್ಥೈಸಿಕೊಳ್ಳುವ ಸಾಮರ್ಥ್ಯವಿರುತ್ತದೆಯಂತೆ. ಕುದುರೆ ಸವಾರಿ ನಡೆಸುತ್ತಿದ್ದ ಮಹಿಳೆಯೊಬ್ಬರು ಮಾರ್ಗ ಮಧ್ಯದಲ್ಲೇ ಸತ್ತಿದ್ದರೂ, ಆತ್ಮ ಮಾತ್ರ ಕುದುರೆ ಜತೆಗೆ ಮುನ್ನಡೆದು ಆ ಬಳಿಕದ ಘಟನೆಯನ್ನು ಗ್ರಹಿಸಿ ತಿಳಿಸಿತ್ತು ಎನ್ನುವ ಉದಾಹರಣೆಯನ್ನೂ ಜೆಫ್ಟಿ ನೀಡಿದ್ದಾರೆ.