ಬಿಹಾರ ಕಾಂಗ್ರೆಸ್‌ನ 11 ಶಾಸಕರ ರಾಜೀನಾಮೆ?

ಪಟ್ನಾ: ವಿಧಾನಸಭಾ ಚುನಾವಣೆ ಸೋಲಿನ ಮುಖಭಂಗದ ಬಳಿಕ ಬಿಹಾರ ಕಾಂಗ್ರೆಸ್‌ ಒಡೆದ ಮನೆಯಾಗಿದೆ. “ಕಾಂಗ್ರೆಸ್‌ನ 19 ಶಾಸಕರಲ್ಲಿ 11 ಮಂದಿ ಪಕ್ಷ ತೊರೆಯುವ ಸಾಧ್ಯತೆ ಇದೆ’ ಎಂದು ಕಾಂಗ್ರೆಸ್‌ ಮುಖಂಡ, ಮಾಜಿ ಶಾಸಕ ಭರತ್‌ ಸಿಂಗ್‌ ಮುನ್ಸೂಚನೆ ನೀಡಿದ್ದಾರೆ. “ಈ 11 ಮಂದಿ ಹಣ ಕೊಟ್ಟು ಟಿಕೆಟ್‌ ಪಡೆದು, ಈಗ ಎಂಎಲ್‌ಎ ಆದವರು. ಇವರ್ಯಾರೂ ಮೂಲತಃ ಕಾಂಗ್ರೆಸ್‌ನವರೇ ಅಲ್ಲ. ಇವರೆಲ್ಲ ಎನ್‌ಡಿಎ ಸೇರುವ ಸಾಧ್ಯತೆ ಇದೆ’ ಎಂದೂ ಭವಿಷ್ಯ ನುಡಿದಿದ್ದಾರೆ. 11 ಶಾಸಕರೊಂದಿಗೆ ರಾಜ್ಯಸಭೆ ಸದಸ್ಯ ಅಖೀಲೇಶ್‌ ಪ್ರಸಾದ್‌ ಸಿಂಗ್‌, ರಾಜ್ಯ ಘಟಕ ಅಧ್ಯಕ್ಷ ಮೋಹನ್‌ ಝಾ, ಹಿರಿಯ ಮುಖಂಡ ಸದಾನಂದ ಸಿಂಗ್‌ ಕೂಡ ಪಕ್ಷ ತೊರೆಯುವ ಸಂಭವವಿದೆ ಎಂದಿದ್ದಾರೆ.

ಆರ್‌ಜೆಡಿ ಜತೆಗಿನ ಮೈತ್ರಿಗೆ ನಾನು ಸದಾ ವಿರೋಧಿಸುತ್ತಲೇ ಬಂದಿದ್ದೇನೆ. ಈ ಮೈತ್ರಿಯೇ ಇಂದು ಪಕ್ಷದ ಸ್ವಯಂವಿನಾಶಕ್ಕೆ ಕಾರಣವಾಗಿದೆ ಎಂದು ಬೇಸರ ಹೊರ ಹಾಕಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿರುವ ಭಾಗಲ್ಪುರ ಶಾಸಕ ಅಜಿತ್‌ ಶರ್ಮಾ, “ಮಾಜಿ ಶಾಸಕರು ಕೊಟ್ಟ ಹೇಳಿಕೆಯಲ್ಲಿ ಹುರುಳಿಲ್ಲ. ಯಾರೊಬ್ಬರೂ ಪಕ್ಷ ತೊರೆಯುವುದಿಲ್ಲ’ ಎಂದಿದ್ದಾರೆ.