ಸಾರ್ವಜನಿಕರ ಆಕರ್ಷಿಸಿದ ಸ್ವದೇಶಿ ಶಾಪಿಂಗ್‌ ಮೇಳ

ಯಲಹಂಕ: ಬಾಯಲ್ಲಿ ನೀರೂರಿಸುವ ಕೊಂಕನ್‌ ಗುಲ್ಕನ್‌, ಉತ್ತರ ಕರ್ನಾಟಕದ ಖಡಕ್‌ ರೊಟ್ಟಿ, ಶೇಂಗಾ ಚಟ್ನಿ, ಎಣ್ಣೆಗಾಯಿ ಪಲ್ಯ, ತರಹೇವಾರಿ ದೋಸೆ ರೀತಿಯ ಹತ್ತಾರು ತಿನಿಸುಗಳು. ಮನರಂಜನೆಗೆ ಸಂಗೀತ, ಮಕ್ಕಳನ್ನು ಖುಷಿಪಡಿಸಲು ಆಟಗಳು… 

ಯಲಹಂಕ ಉಪನಗರದ ನಿಸರ್ಗ ಆಟದ ಮೈದಾನದಲ್ಲಿ ಆಯೋಜಿಸಿರುವ ಮೂರು ದಿನಗಳ ಸ್ವದೇಶಿ ಶಾಪಿಂಗ್‌ ಮತ್ತು ಆಹಾರ ಮೇಳದಲ್ಲಿ ಕಂಡು ಬಂದ ದೃಶ್ಯಗಳಿವು. ಮೇಳದ ವಿಶೇಷ ಆಕರ್ಷಣೆಯಾಗಿ ಸಿರಿಧಾನ್ಯಗಳ ಪ್ರದರ್ಶನ, ಸಾಂಪ್ರದಾಯಿಕ ಉಡುಗೆಯ ಪ್ಯಾಶನ್‌ ಶೋ, ದಸರಾ ಗೊಂಬೆಗಳ ಪ್ರದ ರ್ಶನ, ಮ್ಯಾಜಿಕ್‌ ಶೋ, ಗೃಹೋಪಯೋಗಿ ಪೀಠೊಪಕರಣಗಳು, ಅಲಂಕಾರಿಕ ವಸ್ತ್ರಾಭರಣ ಹಾಗೂ ಲೈವ್‌ ಅಡುಗೆ ಪ್ರದರ್ಶನ ಕೂಡ ನಡೆಯಿತು. ಮೇಳಕ್ಕೆ ಶಾಸಕ ಎಸ್‌.ಆರ್‌.ವಿಶ್ವನಾಥ್‌ ಚಾಲನೆ ನೀಡಿದರು.

ಗಮನಸೆಳೆದ ಕಲಾವಿದ: ಮೇಳದಲ್ಲಿ ಎಲ್ಲರ ಗಮನ ಸೆಳೆದದ್ದು ಸಿರಿಧಾನ್ಯಗಳನ್ನು ಬಳಸಿ ದೇಶದ ಮಹಾನ್‌ ನಾಯಕರ ಭಾವಚಿತ್ರ ಬಿಡಿಸಿ ಕೊಡುವ ಮಧುಗಿರಿಯ ಶಿವಣ್ಣ. ಮೇಳಕ್ಕೆ ಭೇಟಿ ನೀಡಿದ ಜನರ ಬಯಕೆಯಂತೆ, ಸಿರಿಧಾನ್ಯಗಳನ್ನೇ ಬಳಸಿ ಚಿತ್ರಗಳನ್ನು ಸಿದ್ಧಪಡಿಸಿದ ಶಿವಣ್ಣ ಜನರ ಮನ ಗೆದ್ದಿದ್ದಾರೆ.

ರಾಗಿ, ಸಜ್ಜೆ, ನವಣೆ, ಕರಿ ಎಳ್ಳು, ಬಿಳಿ ಸಾಸಿವೆ, ಗಸಗಸೆ, ದಂಟಿನ ಬೀಜ, ಉಚ್ಚೆಳ್ಳು ಬಳಸಿ, ಮಹಾತ್ಮಗಾಂಧಿ, ಅಂಬೇಡ್ಕರ್‌ ,ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್‌ ಓಬಾಮಾ, ಪ್ರಧಾನಿ ನರೇಂದ್ರ ಮೋದಿ ಅವರ ಭಾವಚಿತ್ರಗಳನ್ನು ಬಿಡಿಸುವ ಶಿವಣ್ಣ, ಅದಕ್ಕೆ ಫ್ರೆàಮ್‌ ಹಾಕಿಕೊಡುತ್ತಾರೆ.