ವಿಮಾನ ನಿಲ್ದಾಣದಲ್ಲಿ ಕಳೆದ ವಸ್ತುಗಳು 20 ಸಾವಿರಕ್ಕೂ ಹೆಚ್ಚು

ದೇವನಹಳ್ಳಿ: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ 2017-18ರ ಸಾಲಿನಲ್ಲಿ ವಾರಸುದಾರರು ಇಲ್ಲದೆ 20.413 ವಸ್ತುಗಳು ಲಾಸ್ಟ್‌ ಅಂಡ್‌ ಫೌಂಡ್‌ ವಿಭಾಗದಲ್ಲಿ ದಾಖಲಾಗಿದೆ ಎಂದು ಬಿಐಎಎಲ್‌ನ ಮುಖ್ಯ ಕಾರ್ಯಾಚರಣೆ ಅಧಿಕಾರಿ ಜಾವೆದ್‌ ಮಲಿಕ್‌ ತಿಳಿಸಿದರು.

ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, 20413 ವಸ್ತುಗಳ ಪೈಕಿ 5686 ವಸ್ತುಗಳನ್ನು ಮಾಲಿಕರ ವಶಕ್ಕೆ ಒಪ್ಪಿಸಲಾಗಿದೆ. ಆಹಾರ ಸೇರಿದಂತೆ ಕೆಡಬಹುದಾದ 7153 ವಸ್ತುಗಳನ್ನು 24 ಗಂಟೆಗಳಲ್ಲಿ ವಿಲೇವಾರಿ ಮಾಡಲಾಗಿದೆ. ಉಳಿದಂತೆ ಬಿಟ್ಟು ಹೋದ ವಸ್ತುಗಳನ್ನು 90 ದಿನಗಳ ಒಳಗಾಗಿ ಪಡೆಯದಿದ್ದರೆ ಹರಾಜು ಹಾಕಿ ವಿಲೇವಾರಿ ಮಾಡಲಾಗುತ್ತದೆ ಎಂದು ತಿಳಿಸಿದರು.

2017-18ರ ಆರ್ಥಿಕ ವರ್ಷದಲ್ಲಿ 20,413 ವಸ್ತುಗಳನ್ನು ಸ್ವೀಕರಿಸಿದ್ದು ಪ್ರಯಾಣಿಕರು ವಿಮಾನ ನಿಲ್ದಾಣದ ಹಲವು ಪ್ರದೇಶಗಳಲ್ಲಿ ಮರೆತು ಬಿಟ್ಟು ಹೋಗಿದ್ದರು. ಅಲ್ಲದೆ, ಕೆಲವೊಂದು ನಿಷೇಧಿತ ವಸ್ತುಗಳನ್ನು ಸಿಐಎಸ್‌ಎಫ್ಗೆ ಒಪ್ಪಿಸಲಾಗಿದೆ. ಮಾಲಿಕರ ಪರವಾಗಿ ವಸ್ತು ಪಡೆಯಬೇಕಾದರೆ ಗುರುತಿನ ಚೀಟಿ, ಪ್ರಮಾಣ ಪತ್ರ, ವಸ್ತುಗಳ ಕುರಿತು ಮಾಹಿತಿ ನೀಡಬೇಕು ಎಂದು ಹೇಳಿದರು. 

ಎಲೆಕ್ಟ್ರಾನಿಕ್‌ ಉಪಕರಣ, ಸರ್ಕಾರದ ದಾಖಲೆ ಪತ್ರಗಳಂತಹ ವಸ್ತುಗಳನ್ನು ಸ್ವೀಕರಿಸಿದ ದಿನದಿಂದ 3 ತಿಂಗಳವರೆಗೆ ಉಳಿಸಿಕೊಳ್ಳಲಾಗುತ್ತದೆ. ನಂತರ ಸರ್ಕಾರಿ ದಾಖಲೆ ಪತ್ರಗಳನ್ನು ಸಂಬಂಧಿತ ಸರ್ಕಾರಿ ಇಲಾಖೆಗೆ ಹಿಂತಿರುಗಿಸಲಾಗುತ್ತದೆ. ಭಾರತೀಯ ಪಾಸ್‌ಪೋರ್ಟ್‌ಗಳನ್ನು ಪ್ರಾದೇಶಿಕ ಪಾಸ್‌ಪೋರ್ಟ್‌ ಕಚೇರಿಗೆ, ವಿದೇಶಿ ಪಾಸ್‌ಪೋರ್ಟ್‌ಗಳನ್ನು ಸಂಬಂಧಿತ ರಾಯಭಾರಿ ಕಚೇರಿಗಳಿಗೆ ತಲುಪಿಸಲಾಗುತ್ತದೆ ಎಂದು ಹೇಳಿದರು.

ಹಾಗೆಯೇ ಕ್ರೆಡಿಟ್‌-ಡೆಬಿಟ್‌ಕಾರ್ಡ್‌, ಚೆಕ್‌ ಬುಕ್‌, ಪಾಸ್‌ ಬುಕ್‌ ಮುಂತಾದವನ್ನು 72 ಗಂಟೆಗಳ ನಂತರ ವಿಲೇವಾರಿ ಮಾಡಲಾಗುತ್ತದೆ. ಆಹಾರ ಮತ್ತಿತರ ಹಾಳಾಗುವಂತಹ ವಸ್ತುಗಳನ್ನು 24 ಗಂಟೆಗಳಲ್ಲಿ ವಿಲೇವಾರಿ ಮಾಡಲಾಗುತ್ತದೆ ಎಂದರು.

ಮರಳಿ ಪಡೆಯಲು ಕರೆ ಮಾಡಿ: ಪ್ರಯಾಣಿಕರ ಸಂಚಾರ ಹೆಚ್ಚುತ್ತಿದ್ದು ಅದಕ್ಕೆ ತಕ್ಕಂತೆ ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಕಳೆದುಹೋದ ವಸ್ತುಗಳ ಸಂಖ್ಯೆಯೂ ಹೆಚ್ಚುತ್ತಿದೆ. ಹಾಗೆಯೇ ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಕಳೆದುಹೋದ ವಸ್ತುಗಳನ್ನು ಮರಳಿ ಪಡೆಯಲು (ವಾರದ 24 ಗಂಟೆಗಳ ಸಹಾಯವಾಣಿ ಸಂಖ್ಯೆ) 080-6678 2257(ಭಾರತದ ನಿವಾಸಿಗಳಿಗೆ) ಮತ್ತು +9180 66782257ಗೆ)/ ಕರೆ ಮಾಡಬಹುದು ಅಥವಾ (lostandfound@bialairport.com)ಕ್ಕೆ ಮೇಲ್‌ ಮಾಡಬಹುದೆಂದು ಬಿಐಎಎಲ್‌ನ ಮುಖ್ಯ ಕಾರ್ಯಾಚರಣೆ ಅಧಿಕಾರಿ ಜಾವೆದ್‌ ಮಲಿಕ್‌ ತಿಳಿಸಿದರು.

ನಿಲ್ದಾಣದಲ್ಲಿ ಸಿಕ್ಕ ವಸ್ತುಗಳು: ಸಿಕ್ಕ ವಸ್ತುಗಳ ಪೈಕಿ 2492 ಸಾಮಾನ್ಯ ವಸ್ತು, 485 ವಾಚ್‌, ಪೆನ್‌, 367 ಮೊಬೈಲ್‌, ಅವುಗಳ ಬಿಡಿಭಾಗ, 37 ಲ್ಯಾಪ್‌ಟಾಪ್‌, 29 ಟ್ಯಾಬ್‌-ಐಪ್ಯಾಡ್‌, 7 ಕ್ಯಾಮರಾ ಸೇರಿದೆ. ಉಳಿದಂತೆ ಬ್ಯಾಗ್‌, ಬಟ್ಟೆ, ವೈದ್ಯಕೀಯ ಬಿಡಿಭಾಗ, ಅಡುಗೆ ಮನೆ ಉಪಕರಣ, ಪ್ರವಾಸ ಸಲಕರಣೆ, ಬಿಸಿಲು ಕನ್ನಡಕ, ಆಟಿಕೆ ಇತರೆ ಸಲಕರಣೆ ಸೇರಿವೆ.