ಜೀವದ ಗೆಳತಿ ನೆನಪಲ್ಲೇ ನೇಣಿಗೆ ಶರಣು

ಬೆಂಗಳೂರು: ಮೂರು ತಿಂಗಳ ಹಿಂದೆ ಆತ್ಮಹತ್ಯೆ ಮಾಡಿಕೊಂಡ ಪ್ರಾಣ ಸ್ನೇಹಿತೆಯ ನೆನಪಲ್ಲೇ ಮಾನಸಿಕ ಖನ್ನತೆಗೆ ಒಳಗಾಗಿದ್ದ ಬಿಕಾಂ ಪದವೀಧರೆ ಕೂಡ ನೇಣಿಗೆ ಕೊರಳೊಡ್ಡಿರುವ ಘಟನೆ ಶ್ರೀರಾಂಪುರ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ. ಭುವನೇಶ್ವರಿ (20) ನೇಣಿಗೆ ಶರಣಾದವರು.

ಲಕ್ಷ್ಮೀನಾರಾಯಣಪುರದ 5ನೇ ಕ್ರಾಸ್‌ನಲ್ಲಿ ಪೋಷಕರ ಜತೆ ವಾಸವಿದ್ದ ಭುವನೆಶ್ವರಿ, ಗುರುವಾರ ಸಂಜೆ 6 ಗಂಟೆ ಸುಮಾರಿಗೆ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಮನೆಗೆ ದಿನಸಿ ತರಲು ಹೋಗಿದ್ದ ತಾಯಿ ರಾಣಿ ಅವರು ವಾಪಸ್‌ ಬಂದು ನೋಡಿದಾಗ. ಮನೆಯ ಬಾಗಿಲು ಒಳಗಿನಿಂದ ಲಾಕ್‌ ಆಗಿತ್ತು. ಮಗಳನ್ನು ಹಲವು ಬಾರಿ ಕರೆದರೂ ಸ್ಪಂದಿಸದಿದ್ದಾಗ ಸ್ಥಳೀಯರ ನೆರವಿನಿಂದ ಬಾಗಿಲು ಮುರಿದು ಒಳಗೆ ಹೋಗಿ ನೋಡಿದಾಗ ಘಟನೆ ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದರು.

ಮೃತ ಭುವನೇಶ್ವರಿ ದ್ವಿತೀಯ ಪಿಯುಸಿಯಿಂದ ತನ್ನ ಸ್ನೇಹಿತೆ ರಶ್ಮಿ ಜತೆ ಗಾಢವಾದ ಸ್ನೇಹ ಹೊಂದಿದ್ದರು. ಹೀಗಾಗಿ ಬಿಕಾಂ ಪದವಿ ವ್ಯಾಸಂಗಕ್ಕಾಗಿ ಇಬ್ಬರೂ ಒಟ್ಟಿಗೇ ಶೇಷಾದ್ರಿಪುರಂ ಕಾಲೇಜು ಸೇರಿದ್ದರು. 6 ತಿಂಗಳ ಹಿಂದಷ್ಟೇ ಪದವಿ ಪೂರ್ಣಗೊಳಿಸಿದ ಗೆಳತಿಯರಿಬ್ಬರೂ, ಕೆಲಸ ಹುಡುಕುವ ಪ್ರಯತ್ನದಲ್ಲಿದ್ದರು. ಓದು ಮುಗಿದ ನಂತರವೂ ಆಗಾಗೆ ರಶ್ಮಿಯನ್ನು ಭುವನೇಶ್ವರಿ ಭೇಟಿ ಮಾಡುತ್ತಿದ್ದರು.

ಈ ಮಧ್ಯೆ ಕಳೆದ ಮೂರು ತಿಂಗಳ ಹಿಂದೆ ರಶ್ಮಿ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಆಕೆಯ ಅಂತ್ಯಸಂಸ್ಕಾರಕ್ಕೆ ಹೋಗಿಬಂದಿದ್ದ ಭುವನೇಶ್ವರಿ ಗೆಳತಿಯನ್ನು ಕಳೆದುಕೊಂಡ ಬಗ್ಗೆ ತಾಯಿ ಹಾಗೂ ತಂದೆಯ ಬಳಿ ಹೇಳಿಕೊಂಡು ಅಳುತ್ತಿದ್ದರು. ರಶ್ಮಿಯನ್ನು ಕಳೆದುಕೊಂಡಿದ್ದ ನೋವಿನಲ್ಲಿ ಖನ್ನತೆಗೊಳಗಾಗಿದ್ದ ಭುವನೇಶ್ವರಿ, ನಿದ್ರೆ ಮಾಡುವಾಗಲೂ ಕನವರಿಸುತ್ತಿದ್ದರು. ಹೀಗಾಗಿ ರಶ್ಮಿಯನ್ನು ಸಮಾಧಾನಪಡಿಸಿ, ಇತ್ತೀಚೆಗೆ ವೈದ್ಯರ ಬಳಿ ಚಿಕಿತ್ಸೆ ಕೊಡಿಸಲಾಗುತ್ತಿತ್ತು ಎಂದು ಆಕೆಯ ಪೋಷಕರು ತಿಳಿಸಿರುವುದಾಗಿ ಪೊಲೀಸ್‌ ಅಧಿಕಾರಿಯೊಬ್ಬರು ಹೇಳಿದ್ದಾರೆ.