Saudi: ಸೌದಿಯಲ್ಲಿ ಮೊದಲ ಮದ್ಯದಂಗಡಿ!

ರಿಯಾದ್‌: ಸೌದಿ ಅರೇಬಿಯಾದಲ್ಲಿ ಇದೇ ಮೊದಲ ಬಾರಿಗೆ ಮದ್ಯದಂಗಡಿ ತೆರೆಯಲಾಗುತ್ತಿದೆ. ಆ ದೇಶದ ರಾಜಧಾನಿ ರಿಯಾದ್‌ನಲ್ಲಿ ತೆರೆಯುವ ಈ ಮದ್ಯದಂಗಡಿ ಕೇವಲ ಮುಸ್ಲಿಮೇತರ ರಾಜತಾಂತ್ರಿಕ ಅಧಿಕಾರಿಗಳಿಗೆ ಮಾತ್ರ ಮೀಸಲಾಗಿರಲಿದೆ.

ಮದ್ಯ ಖರೀದಿಸಲು ಗ್ರಾಹಕರು ಮೊಬೈಲ್‌ ಆ್ಯಪ್‌ ಮೂಲಕ ನೋಂದಣಿಯಾಗಬೇಕು. ಸೌದಿ ಅರೇಬಿಯಾ ವಿದೇಶಾಂಗ ಸಚಿವಾಲಯದಿಂದ ಅನುಮತಿ ಪಡೆಯಬೇಕು. ಜತೆಗೆ ಪ್ರತಿ ತಿಂಗಳ ಗರಿಷ್ಠ ಖರೀದಿ ಕೋಟಾ ಪ್ರಕಾರವೇ ಮದ್ಯ ಖರೀದಿಸಬೇಕಾಗುತ್ತದೆ ಎಂದು ಮೂಲಗಳು ತಿಳಿಸಿವೆ. ಸಂಪ್ರದಾಯಸ್ತ ಮುಸ್ಲಿಂ ದೇಶವಾಗಿರುವ ಸೌದಿ ಅರೇಬಿಯಾದಲ್ಲಿ ಇದು ಐತಿಹಾಸಿಕ ನಿರ್ಧಾರವಾಗಿದೆ. ಏಕೆಂದರೆ ಇಸ್ಲಾಂನಲ್ಲಿ ಮದ್ಯ ಸೇವನೆಗೆ ಸಂಪೂರ್ಣ ನಿಷೇಧವಿದೆ.