ಭಾನುವಾರ (ಮೇ 12) “ವಿಶ್ವ ತಾಯಂದಿರ ದಿನ’. ಈ ಸಂದರ್ಭದಲ್ಲಿ ವಿಶೇಷವಾಗಿ ಕನ್ನಡದಲ್ಲಿ ತಾಯಂದಿರಿಗಾಗಿಯೇ ಮಾಡಲಾದ ಹೊಸ ಹಾಡುಗಳನ್ನು ಕೆಲ ಚಿತ್ರತಂಡಗಳು ಬಿಡುಗಡೆ ಮಾಡಿವೆ. ತಾಯಂದಿರ ದಿನದ ಪ್ರಯುಕ್ತ ನಟಿ ಅಪೇಕ್ಷಾ ಪುರೋಹಿತ್‌ ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿರುವ “ಸಾಗುತ ದೂರ ದೂರ…’ ಚಿತ್ರದ ತಾಯಿಯ ಮಹತ್ವವನ್ನು ಸಾರುವ ರ್ಯಾಪ್‌ ಶೈಲಿಯ ಹಾಡನ್ನು ನಟಿ ಅನು ಪ್ರಭಾಕರ್‌ ಬಿಡುಗಡೆಗೊಳಿಸಿದರು.
ರವಿತೇಜ ನಿರ್ದೇಶನದ “ಸಾಗುತ ದೂರ ದೂರ..’ ಚಿತ್ರದ ಹಾಡಿಗೆ ಕದ್ರಿ ಮಣಿಕಾಂತ್‌ ಸಂಗೀತ ಸಂಯೋಜನೆಯಿದ್ದು, ಡಾ. ವಿ ನಾಗೇಂದ್ರ ಪ್ರಸಾದ್‌ ಸಾಹಿತ್ಯವನ್ನು ಒದಗಿಸಿದ್ದಾರೆ. “ಖುಷಿಕನಸು ಕ್ರಿಯೇಷನ್‌’ ಬ್ಯಾನರ್‌ನಲ್ಲಿ ಅಮಿತ್‌ ಪೂಜಾರಿ ನಿರ್ಮಿಸುತ್ತಿರುವ ಈ ಚಿತ್ರ ಇದೇ ಜೂನ್‌ ತಿಂಗಳ ಕೊನೆಗೆ ತೆರೆಗೆ ಬರುವ ತಯಾರಿಯಲ್ಲಿದೆ.
ಇನ್ನು ತಾಯಂದಿರ ದಿನದ ಪ್ರಯುಕ್ತ “ಸಿಂಗ’ ಚಿತ್ರತಂಡ ಕೂಡ ವಿಶೇಷ ಹಾಡಿನ ಟೀಸರ್‌ ಅನ್ನು ಬಿಡುಗಡೆ ಮಾಡಿದೆ. ಚಿರಂಜೀವಿ ಸರ್ಜಾ, ಅದಿತಿ ಪ್ರಭುದೇವ ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸುತ್ತಿರುವ “ಸಿಂಗ’ ಚಿತ್ರದಲ್ಲಿ, ಹಿರಿಯ ನಟಿ ತಾರ ಅನುರಾಧ ತಾಯಿಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ತಾಯಿಯ ಕುರಿತಾಗಿರುವ ಈ ವಿಶೇಷವಾದ ಹಾಡನ್ನು ನಿರ್ದೇಶಕ ಜೋಗಿ ಪ್ರೇಮ್ ಹಾಡಿದ್ದಾರೆ.
ಧರ್ಮ ವಿಶ್‌ ಸಂಗೀತ ಸಂಯೋಜನೆ ಇರುವ ಈ ಹಾಡಿಗೆ ಡಾ. ವಿ ನಾಗೇಂದ್ರ ಪ್ರಸಾದ್‌ ಸಾಹಿತ್ಯ ಒದಗಿಸಿದ್ದಾರೆ. ಈಗಾಗಲೇ ನಿರ್ದೇಶಕ ಪ್ರೇಮ್ ಹಾಡಿರುವ ತಾಯಿಯ ಕುರಿತಾದ ಎಲ್ಲಾ ಹಾಡುಗಳು ಸೂಪರ್‌ ಹಿಟ್‌ ಆಗಿರುವುದರಿಂದ, ಈಗ ಈ ಹಾಡು ಕೂಡ ಸೂಪರ್‌ ಹಿಟ್‌ ಆ ಸಾಲಿಗೆ ಸೇರಲಿದೆ ಅನ್ನೋದು ಚಿತ್ರತಂಡದ ವಿಶ್ವಾಸದ ಮಾತುಗಳು.
ಇನ್ನು ವಿಜಯ್‌ ಕಿರಣ್‌ ನಿರ್ದೇಶನದ ಸಿನಿಮಾದ ನಿರ್ದೇಶನ “ಸಿಂಗ’ ಚಿತ್ರಕ್ಕೆ ಕಿರಣ್‌ ಹಂಪಾಪೂರ ಛಾಯಾಗ್ರಹಣವಿದ್ದು, ಉದಯ್‌ ಮೆಹ್ತಾ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಇನ್ನು, “ಜಯರಥ’ ಚಿತ್ರತಂಡವು ಅಮ್ಮಂದಿರ ದಿನಾಚರಣೆ ಪ್ರಯುಕ್ತ “ಅಮ್ಮಾ…ಅಮ್ಮ……..’ ಎಂಬ ಲಿರಿಕಲ್‌ ವಿಡಿಯೋವನ್ನು ಬಿಡುಗಡೆ ಮಾಡಿದೆ.
ಎಸ್‌.ಪ್ರೇಮ್‌ಕುಮಾರ್‌ರವರ ಸಂಗೀತಕ್ಕೆ ಚಂದ್ರು.ಎಸ್‌.ಎಲ್‌ರವರ ಸಾಹಿತ್ಯವಿದೆ. ವಿಜಯ ಪ್ರಕಾಶ್‌ರವರು ಈ ಹಾಡನ್ನು ಹಾಡಿದ್ದು “ಕಂದನ ಮೊದಲ ತೊದಲೆ ಅಮ್ಮಾನೆ…….’ ಎಂಬ ಪ್ರಾರಂಬಿಕ ಸಾಲಿನೊಂದಿಗೆ ಶುರುವಾಗುವ ಸಾಹಿತ್ಯವು ಹೃದಯ ಸ್ಪರ್ಶಿಯಾಗಿದೆ. ಅಜಯ್‌ ಸೂರ್ಯ ಈ ಚಿತ್ರದ ನಿರ್ದೇಶಕರು.
