10 ಸಾವಿರ ಸಹಾಯಕ ಹುದ್ದೆ ಕಡಿತಕ್ಕೆ ನಿರ್ಧಾರ

ಹೊಸದಿಲ್ಲಿ: “ಸಹಾಯಕ್‌’ ಹುದ್ದೆಗೆ ಭರ್ಜರಿ ಕತ್ತರಿ ಹಾಕಲು ಭಾರತೀಯ ಸೇನೆ ನಿರ್ಧರಿಸಿದೆ. ಪ್ರಸ್ತುತ ಸೇನೆಯಲ್ಲಿ 40 ಸಾವಿರ ಸಹಾಯಕರು ಕರ್ತವ್ಯ ನಿರ್ವಹಿಸುತ್ತಿದ್ದು, ಈ ಪ್ರಮಾಣವನ್ನು ಶೇ.25ರಷ್ಟು ಅಂದರೆ 10 ಸಾವಿರ ಹುದ್ದೆಗಳನ್ನು  ಕಡಿತಗೊಳಿಸಲು ರಕ್ಷಣಾ ಇಲಾಖೆಯ ನಿರ್ದೇಶನ ಬಂದಿದೆ.

ಹಿರಿಯ ಅಧಿಕಾರಿಗಳ ಮೇಲೆ “ಸಹಾಯಕ್‌’ ಜವಾನರ ದೂರುಗಳು ಹೆಚ್ಚಾಗಿದ್ದನ್ನು ಕೇಂದ್ರ ಸರಕಾರ ಗಂಭೀರವಾಗಿ ಪರಿಗಣಿಸಿತ್ತು. ಬ್ರಿಟಿಷರ ಕಾಲದಿಂದ ಜಾರಿಯಲ್ಲಿರುವ ಈ ಪದ್ಧತಿಯ ವಿರುದ್ಧ ಆಕ್ಷೇಪಗಳೂ ಕೇಳಿಬಂದಿದ್ದವು. ಈ ಹಿನ್ನೆಲೆಯಲ್ಲಿ ಸಹಾಯಕರ ಸಂಖ್ಯೆಯನ್ನು ಹಂತಹಂತವಾಗಿ ತಗ್ಗಿಸಲು ಸೇನೆ ನಿರ್ಧರಿಸಿದೆ. ನೌಕಾದಳ, ಭಾರತೀಯ ವಾಯುಪಡೆಯಲ್ಲಿ ಈ ಪದ್ಧತಿ ಇಲ್ಲ. 

ಬದಲಿಗೆ ನಾಗರಿಕರು!: ಹಾಗೆ ತೆರವಾಗುವ 10 ಸಾವಿರ ಹುದ್ದೆಗಳಿಗೆ ಸಾಮಾನ್ಯ ನಾಗರಿಕರನ್ನು ನೇಮಿಸಿಕೊಳ್ಳಲು ಸೇನೆ ನಿರ್ಧರಿಸಿದೆ. ಸಹಾಯಕ್‌ ಹುದ್ದೆಯ ಈ ಕಡಿತ ನೀತಿ ದಿಲ್ಲಿಯಂಥ ಸೇನಾ ಘಟಕಗಳಿಗಷ್ಟೇ ಅನ್ವಯವಾಗಲಿದೆ. ಬೆಟಾಲಿಯನ್‌, ಬ್ರಿಗೇಡ್‌, ಡಿವಿಷನ್‌ಗಳಲ್ಲಿನ  ಸಹಾಯಕರು ಹಾಗೆಯೇ ಮುಂದುವರಿಯಲಿದ್ದಾರೆ.